ប្រទេសថៃ ៖ លោកប្រាយុទ្ធចាន់អូចាប្រមុខរបបយោធាថៃ ដែលកាន់អំណាចចាប់តាំងពីរដ្ឋប្រហារឆ្នាំ២០១៤មក កាលពីយប់ថៃ្ងទី៥មិថុនាត្រូវបានសភាថៃអនុម័ត ឲ្យកាន់តំណែងនាយករដ្ឋមន្ត្រីបន្តទៀត ដែលលើកនេះសម្រាប់រដ្ឋាភិបាលស៊ីវិលមួយ។
ឧត្ដមសេនីយអាយុ៦៥ឆ្នាំរូបនោះទទួលបានការគាំទ្រដល់៥០០សំឡេង ទល់នឹង២៤៤សំឡេងសម្រាប់គូប្រជែងតែម្នាក់គត់ មហាសេដ្ឋីវ័យក្មេងប្រមុខក្រុមចម្រុះប្រឆាំង ក្នុងការបោះឆ្នោតរបស់សភាទាំង២។ នេះជាលទ្ធផលដែលចេញផ្សាយតាមទូរទស្សន៍។
ជ័យជម្នះរបស់លោកប្រាយុទ្ធចាន់អូចាពិតជាទទួលបាន ព្រោះរដ្ឋធម្មនុញ្ញថ្មីថៃដែលអនុម័តកាលពីឆ្នាំ២០១៧ ឲ្យកងទ័ពជ្រើសតាំងព្រឹទ្ធសមាជិកទាំង២៥០រូប។ ដូច្នេះលោកត្រូវការសំឡេងតែ១២៦ទៀតប៉ុណ្ណោះ ក្នុងចំណោមសមាជិកសភាទាំង៥០០រូប ដើម្បីរក្សាតំណែងនាយករដ្ឋមន្ត្រី។ ចំនួននេះលោកទទួលបានដោយស្រួលកាលពីយប់ថ្ងៃទី៥មិថុនា ក្រោយរយៈពេល២ខែនៃការលៃលករបស់គណបក្ស PALANG PRACHARATរបស់លោក ដែលប្រមូលបានគណបក្សអ្នកអភិរក្សនិយមជាច្រើនចូលរួមធ្វើសម្ព័ន្ធភាព ពិសេសគណបក្សចាស់ជាងគេបំផុតគឺគណបក្សប្រជាធិបតេយ្យ។
ប្រឈមមុខនឹងលោកប្រាយុទ្ធ មហាសេដ្ឋីវ័យក្មេងលោកTHANATHORN JUANGROONGRUANGKIT ស្ថាបនិកគណបក្សប្រឆាំងថ្មីFUTURE FORWARD ពុំអាចប្រៀបផ្ទឹមជាមួយលោកប្រាយុទ្ធបានឡើយ។ ក្រោយប្រកាសពីបរាជ័យរបស់លោក ប្រមុខគណបក្សប្រឆាំងថ្មីរូបនោះថ្លែងថា ពេលនេះពុំមែនកំណត់ពីការបញ្ចប់មួយឡើយ តែជាការចាប់ផ្ដើមមួយ។ យើងនឹងធ្វើការកាន់តែសកម្មថែមទៀតសម្រាប់អនាគតកូនចៅយើង។
ព្រះមហាក្សត្រថ្មីថៃ មហាវ៉ាជីរ៉ាឡុងកនកាលពីដើមខែឧសភា ពេលព្រះអង្គឡើងគ្រងរាជ្យជាផ្លូវការ ទ្រង់លើកពីភាពចាំបាច់នៃឯកភាពរបស់ប្រទេសព្រះអង្គ។ មុនការបោះឆ្នោតសភា ព្រះមហាក្សត្រថៃទ្រង់ស្នើឲ្យគាំទ្របណ្ដាមនុស្សល្អៗ ដើម្បីរារាំងកុំឲ្យមានភាពចលាចលក្នុងប្រទេស ដែលនោះជាសេចក្ដីថ្លែងការណ៍មួយដែលត្រូវគេមើលឃើញថា ជាការគាំទ្រចំពោះពួកយោធាបាត់ទៅហើយ។
ចំណែកអតីតអភិបាលធនាគារថៃលោកCHATUMONGOL SONAKUL ដែលជាប់ឆ្នោតចូលក្នុងសភា ហើយចូលខាងគណបក្សរបស់កងយោធាថ្លែងថា ទីបំផុតនាយករដ្ឋមន្ត្រីថ្មីនឹងមានការងារជាច្រើនដែលត្រូវធ្វើ ដើម្បីធ្វើឲ្យប្រទេសកាន់តែទំនើបហើយកាត់បន្ថយវិសមភាពដែលមានខ្ពស់ក្នុងផ្ទៃប្រជាជន។
លោកប្រាយុទ្ធត្រូវបានពួកអ្នកគាំទ្រលោក មើលឃើញថា ជាមនុស្សដែលអាចរក្សាស្ថេរភាព និងរារាំងមិនឲ្យថៃធ្លាក់ក្នុងវិបត្តិនយោបាយ ដែលប្រទេសជួបប្រទះជាញឹកញាប់។ ប៉ុន្តែពួកអ្នកប្រឆាំងគូសបញ្ជាក់ថា ចាប់តាំងពីឆ្នាំ២០១៤មក លោកប្រាយុទ្ធបរាជ័យ ក្នុងការកែទម្រង់ប្រទេស និងក្នុងការធ្វើឲ្យសេដ្ឋកិច្ចប្រទេសមានភាពទំនើប ព្រមទាំងមិនអាចកាត់បន្ថយវិសមភាពសង្គម៕ (កែសម្រួលដោយ ៖ បុប្ផា)
ចែករំលែកព័តមាននេះ