រាជធានីភ្នំពេញ ៖ ដើម្បីបង្ហាញពីផលិតផលក្នុងស្រុកឲ្យអន្តរជាតិបានដឹងនោះសម្តេចតេជោហ៊ុន សែន នាយករដ្ឋមន្ត្រីបានឲ្យដឹងថា សម្តេចនឹងយកនំបញ្ចុកទទួលភ្ញៀវអន្តរជាតិនៅ គេហដ្ឋានរបស់សម្តេចម្តង ។ សម្តេចបានលើកឡើងថា ការយកនំបញ្ចុកទទួលភ្ញៀវនេះ បន្ទាប់ពីសម្តេចធ្លាប់បានយកផលិតផលដែលផលិតក្នុងស្រុកមួយចំនួនទទួលភ្ញៀវអន្តរជាតិហូបរួចហើយ ។ មានប្រសាសន៍ក្នុងពិធីប្រគល់សញ្ញាបត្រដល់និស្សិតផ្នែកសុខាភិបាលមកពីសាកលវិទ្យាល័យពុទ្ធិសាស្ត្រ នាព្រឹកថ្ងៃទី៦ ខែមិថុនានេះ ។
សម្តេចបញ្ជាក់ថា ៖«អីញ្ចឹងទេ ជំរុញផលិតផលក្នុងស្រុក ! ខ្ញុំនិយាយដោយស្មោះ ខ្ញុំសរសើរឡាវណាស់ ទោះបីជាតាំងពីជំនាន់ឆ្នាំ១៩៧៩ រហូតមកដល់ពេលនេះ គឺ៤០ឆ្នាំក្រោយមកឡាវមិនដែលចោលបាយដំណើបហូបជា មួយឡាប និង… គាត់មិនដែលចោលទេ ។ អីញ្ចឹងទេយើងទេយើងលេងអានឹងមើល ។ អាឡូវខ្ញុំដាក់បណ្តើរៗ ហើយក្នុងការទទួលភ្ញៀវអន្តរជាតិថ្នាក់នាយករដ្ឋមន្ត្រីដូចជា អាម៉ុក សម្លរកកូ … ហើយថ្ងៃក្រោយដាក់សម្លម្ជូរ«…» ហើយថ្ងៃក្រោយរដាក់នំបញ្ចុកម្តង» ។
សម្តេចក៏បានលើកឡើងថា ៖«ថ្ងៃក្រោយខ្ញុំគិតថា ម្ហូបដំបូងគេដាក់នំបញ្ចុកឲ្យហូបតែម្តង! ប៉ុន្តែរកវិធីដាក់នំបញ្ចុកយ៉ាងម៉េច កុំឲ្យភ្ញៀវពិបាកទទួលទាន ព្រោះវាត្រូវប្រើចង្កឹះចាប់ហូប តែអ្នក ខ្លះអត់ចេញចាប់ចង្កឹះហូបទេ»។ សម្តេចក៏បានលើកឡើងថា ការហូបនំបញ្ចុកនេះ គឺជាការជំរុញនៅការប្រើប្រាស់នូវផលិតផលជាតិរបស់កម្ពុជាតែម្តង ដែលទោះបីតិច ឬច្រើនមានអន្តរសកម្មទៅលើតម្លៃអង្ករ ត្រយ៉ូងចេក សណ្តែកគួរ និងរបស់មួយចំនួនទៀតទាក់ទង និងអំបោយនំបញ្ចុកផងដែរ ។ លើសពីនេះទៅទៀត ធ្វើឲ្យអ្នកបើកហាងនំបញ្ចុកច្រើនផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ