ប្រទេសថៃ៖ ភ្នាក់ងារសារពត៌មាន Bangkok Post បានឲ្យដឹងកាលពីថ្ងៃច័ន្ទកន្លងមកថា សហភាពអ៊ឺរ៉ុប (EU) បានយល់ព្រមអនុញ្ញាតឲ្យប្រទេសថៃចរចាកូតានាំចេញសម្រាប់ផលិតផលចំនួន៣១ប្រភេទ ។ សំណើរនេះត្រូវបានលើកឡើងដោយអ្នកតំណាងពាណិជ្ជកម្មប្រចាំប្រទេសថៃកាលពីខែធ្នូនាឆ្នាំមុន ។
អ្នកស្រី Auramon Supthaweethum ដែលជាប្រធាននាយកដ្ឋានចរចាពាណិជ្ជកម្មបានឲ្យដឹងថា «ការចរចានឹងគ្របដណ្តប់កូតាសម្រាប់ផលិតផលចំនួន ៣១ ប្រភេទដែលប្រទេសថៃបានស្នើមុនពេល EU និងចក្រភពអង់គ្លេសចាប់ផ្តើមការចរចាលើ Brexit» ។ ផលិតផលទាំងនេះរួមមានផលិតផលបក្សីចំនួន ៩, ផលិតផលអង្ករចំនួន ៩, ផលិតផលដំឡូងចំនួន ៤, ផលិតផលត្រីនិងបង្គារចំនួន ៦ និងផលិតផលអាហារផ្សេងៗចំនួន ៣មុខទៀត ។
អ្នកស្រីបានបន្ថែមថា ការចរចានេះពិតជាសំខាន់ណាស់ព្រោះ «នៅឆ្នាំ ២០១៧ EU បានទិញផលិតផលទាំងនេះសរុបប្រមាណ១.៤ប៊ីលានដុល្លារឯណោះ»។ ប្រទេសថៃក៏បានស្នើសំណើរស្រដៀងគ្នាទៅកាន់ចក្រភពអង់គ្លេសដែរ។ អ្នកស្រី Auramon ក៏បានបន្ថែមថា «កាលពីខែមិនា ប្រទេសថៃបានដាក់សំណើរជាផ្លូវការដើម្បីស្នើសុំសិទ្ធិទទួលបានកូតានាំចេញសម្រាប់ផលិតផលចំនួន ៣០ មុខ»។
សំណើរដែលបានស្នើទៅអ្នកតំណាងពាណិជ្ជកម្មចក្រភពអង់គ្លេសគ្របដណ្តប់កូតានាំចេញផលិតផលបក្សីចំនួន ១០, ផលិតផលអង្ករចំនួន ៧, ផលិតផលដំឡូងចំនួន ៣, ផលោតផលត្រីនិងបង្គារចំនួន ៦ និងផលិតផលអាហារផ្សេងៗចំនួន៤ ។
អ្នកស្រីបានបន្តថា «ពួកយើងបានស្នើដល់ចក្រភពអង់គ្លេសឲ្យពន្លឿនសេចក្តីសម្រេចលើសំណើរសុំការចរចាលើកូតានាំចេញផលិតផលទាំង ៣០ ប្រភេទ» ។ អ្នកស្រីក៏បានបន្ថែមថា កាលពីឆ្នាំ ២០១៧ ចក្រភពអង់គ្លេសបាននាំចូលផលិតផលទាំង ៣០ មុខប្រមាណ៦២៧.៦លានដុល្លារ ៕
កែសម្រួលដោយ ៖ សំណាង
ចែករំលែកព័តមាននេះ