ប្រទេសចិន-រុស្សុី៖ ប្រធានាធិបតីចិនលោកសីុជីនពីងបានទៅកាន់រុស្សុី កាលពីថ្ងៃទី៥មិថុនា ដែលមានទិសដៅបើកសករាជថ្មីនៃមិត្តភាព និងពង្រឹងភាពជាដៃគូសេដ្ឋកិច្ចរវាងមហាអំណាចទាំង២ ខណៈចិនកំពុងមានសង្គ្រាមពាណិជ្ជកម្មជាមួយសហរដ្ឋអាមេរិក ។
ប្រមុខរដ្ឋចិនទៅកាន់រុស្សុី ដើម្បីបំពេញទស្សកិច្ចផ្លូវរដ្ឋនិងចូលរួមក្នុងវេទិកាសេដ្ឋកិច្ចអន្តរជាតិនៅទីក្រុងសាំងប៉េទ័រស្បួរ ។ អំឡុងពេលនៃទស្សនកិច្ចនេះ លោកសីុនិងសមភាគីរុស្សុីលោកវ្ល៉ាឌីមៀរពូទីន ត្រូវគូសវាសផែនការមួយ សម្រាប់ការពង្រីកនាពេលអនាគតទំនាក់ទំនងទ្វេភាគី និងផ្ដោតលើភាពជាដៃគូយុទ្ធសាស្ត្រ ជាសាកលរវាងប្រទេសទាំង២ ឲ្យដល់កម្រិតថ្មីមួយ ។
ទស្សនកិច្ចរយៈពេល៣ថ្ងៃនោះរបស់លោកសីុនៅរុស្សុី នាំឲ្យមានការចាប់អារម្មណ៍ខ្លាំង ខណៈទំនាក់ទំនងចិន-រុស្សុី កំពុងតែឈានទៅរកការចាប់ដំណើរថ្មីមួយ ៧០ឆ្នាំក្រោយការបង្កើតទំនាក់ទំនងការទូតជាមួយ
គ្នា ។ អនុរដ្ឋមន្ត្រីការបរទេសចិន លោកZHANG HANHUI ក្នុងសន្និសីទសារព័ត៌មានមួយថ្លែងថា លោកសីុនិងលោកពូទីននឹងចុះហត្ថលេខា ឬក៏ចូលរួមក្នុងការចុះហត្ថលេខាលើឯកសារសំខាន់ៗនៃកិច្ចសហប្រតិបត្តិការ ហើយចូលរួមក្នុងកិច្ចប្រជុំមួយ ដែលប្រារព្ធខួបលើកទី៧០នៃទំនាក់ទំនងការទូតរវាងប្រទេសទាំង២។
ខណៈទំនាក់ទំនងទ្វេភាគីកាន់តែជិតស្និទ្ធ កិច្ចសហប្រតិបត្តិការជាក់ស្ដែង រវាងមហាប្រទេសទាំង២ ក៏បង្កើនយ៉ាងរហ័សផងដែរ។ ការផ្លាស់ប្ដូរទ្វេភាគីបានឡើងដល់កម្រិតកំពូលថ្មី ដល់១០៨ពាន់លានដុល្លារក្នុងឆ្នាំ២០១៨ ដែលនោះជាសង្វាក់ខ្ពស់មួយ ក្នុងចំណោមដៃគូពាណិជ្ជកម្មសំខាន់ៗរបស់ចិន។ កិច្ចសហប្រតិបត្តិការត្រូវបានបង្កើនក្នុងផ្នែកថាមពល នុយក្លេអ៊ែរនិងអវកាស។
នាវាដំបូងដែលដឹកឧស្ម័នធម្មជាតិរាវ មកពីឧបទ្វីបរុស្សុីយ៉ាម៉ាល់ ក្នុងតំបន់អាក់ទិក បានបើកឆ្លងកាត់សមុទ្រ ឆ្ពោះមកកាន់ប្រទេសចិន ហើយឧស្ម័នរាវជាច្រើនលានតោនថែមទៀត នឹងត្រូវផ្ដល់ឲ្យក្នុង១ឆ្នាំៗ ។ បំពង់បង្ហូរឧស្ម័នទី២ចិន-រុស្សុី ត្រូវបានដាក់ឲ្យប្រើប្រាស់ក្នុងឆ្នាំ២០១៨។ ប្រទេសទាំង២ក៏ចុះហត្ថលេខាផងដែរ លើកិច្ចព្រមព្រៀងនានា ដែលសំដៅពង្រីកកិច្ចសហប្រតិបត្តិការ នុយក្លេអ៊ែរនិងអភិវឌ្ឍន៍រួមគ្នាលើការផលិតយន្តហោះពាណិជ្ជកម្មធំៗ។
ក្នុងពេលមានភាពតានតឹងខ្លាំងរវាងរុស្សុីនិងពួកលោកខាងលិច ការផ្លាស់ប្ដូរពាណិជ្ជកម្មរវាងក្រុងប៉េកាំងនិងក្រុងមូស្គូត្រូវបានបង្កើនដល់២៥%ក្នុងឆ្នាំ២០១៨។ រុស្សុីដែលសេដ្ឋកិច្ចរងការវាយប្រហារធ្ងន់ដោយ សារទណ្ឌកម្មរបស់ពួកអឺរ៉ុបនិងអាមេរិកចាប់តាំងពីឆ្នាំ២០១៤មក ដោយសារវិបត្តិអ៊ុយក្រែន ធ្វើឲ្យរុស្សុីងាកចេញពីទីផ្សារអឺរ៉ុបមកកាន់ទីផ្សារចិន ។
ចិនក៏ជាអ្នកបោះទុនវិនិយោគធំបំផុតមួយក្នុងសេដ្ឋកិច្ចរុស្សុីដែរ ហើយជួយទ្រទ្រង់ដល់ហិរញ្ញវត្ថុសាធារណៈក៏ដូចជាឯកជននៅរុស្សុីពិសេសមកពីទណ្ឌកម្ម។ មុនចេញ ដំណើរមកកាន់រុស្សុី លោកសីុបានថ្លែងទៅកាន់បណ្ដាសារព័ត៌មានរុស្សុីថា សេដ្ឋកិច្ចចិននឹងមានកត្តាអនុ គ្រោះគ្រប់គ្រាន់ សម្រាប់ទ្រទ្រង់ដល់ការអភិវឌ្ឍន៍ប្រកបដោតស្ថេរភាពនិងស្ថិតស្ថេរ ៕ (សម្រួលដោយ៖ ស្រីណា)
ចែករំលែកព័តមាននេះ