រាជធានីភ្នំពេញ ៖ មន្ត្រីជាន់ខ្ពស់ និងជាអ្នកនាំពាក្យគណបក្សប្រជាជនកម្ពុជាបាន ចំអកទៅកាន់អតីតមន្ត្រីបក្សប្រឆាំងថា បានរិះគន់ និងចោទប្រកាន់រាជរដ្ឋាភិបាលរឿងបាត់ទឹកដីកម្ពុជាក្រោម ប៉ុន្តែខ្លួនមានសញ្ជាតិបារាំងមិនប្តឹងតវ៉ានោះទេ ។ ការលើកឡើងរបស់អ្នកនាំពាក្យបក្សប្រជាជនកម្ពុជានេះ…
រាជធានីភ្នំពេញ ៖ មន្ត្រីជាន់ខ្ពស់ និងជាអ្នកនាំពាក្យគណបក្សប្រជាជនកម្ពុជាបាន ចំអកទៅកាន់អតីតមន្ត្រីបក្សប្រឆាំងថា បានរិះគន់ និងចោទប្រកាន់រាជរដ្ឋាភិបាលរឿងបាត់ទឹកដីកម្ពុជាក្រោម ប៉ុន្តែខ្លួនមានសញ្ជាតិបារាំងមិនប្តឹងតវ៉ានោះទេ ។ ការលើកឡើងរបស់អ្នកនាំពាក្យបក្សប្រជាជនកម្ពុជានេះ បន្ទាប់ពីលោកអ៊ុំ សំអាន អតីតអ្នកតំណារាស្ត្រគណបក្សសង្គ្រោះជាតិបានចោទប្រកាន់រាជរដ្ឋាភិបាលថា ជាអ្នកកាត់ទឹកដីកម្ពុជាក្រោមឲ្យវៀតណាម ។
លោកសុខ ឥសាន បានឲ្យដឹងតាមប្រព័ន្ធតេឡេក្រាមយ៉ាងដូច្នេះថា សួរថា អ្នកដែល លើកបញ្ហាទាមទារយកដែនដីកម្ពុជាក្រោមមកវិញមានបានទាមទារដែរប្ញទេ ? ។ លោកបញ្ជាក់ថា៖«បានតែស្រែកដាក់កំហុសលើគេឯង តែខ្លួនអត់បានធ្វើអ្វីទាំងអស់ ទោះបីអ្នកខ្លះមានសញ្ជាតិជាបារាំង និងកំពុងរស់ប្រទេសបារាំងក៏ដោយក៏មិនព្ញហើបមាត់ប្តឹងបារាំង ដែលបានយកដែនដីកម្ពុជាក្រោមទៅឲ្យវៀតណាមដែរ ។
ដូច្នេះ គួរខ្មែរគ្រប់រូបបញ្ឈប់នូវបញ្ហាលាបពណ៌ដាក់កំហុសឲ្យគ្នា ចំពោះអ្វីដែលជាកាកសំណល់នៃប្រវត្តិសាស្ត្រមកធ្វើបច្ចុប្បន្នភាពនយោបាយវាយប្រហារគ្នាដែលនាំឲ្យបែកបាក់សាមគ្គីភាពផ្ទៃក្នុងខ្មែរនោះឡើយ»។ លោកក៏បានអំពាវនាវយ៉ាងដូច្នេះថា គួរនាំគ្នាយកបទពិសោធន៍ប្រវត្តិសាស្ត្រមករៀនសូត្រ ដើម្បីជៀសវាងកុំឲ្យកើតមានឡើងជាថ្មី ហើយរួបរួមគ្នាជាធ្លុងមួយការពារកសាង និងអភិវឌ្ឈន៍ប្រទេសឲ្យមានការរីកចម្រើនតាមឲ្យទាន់បណ្តាប្រទេសនានានៅលើពិភពលោកវិញជាការល្អប្រសើរសមស្របតាមសំណូមពរចង់បានរបស់ប្រជាជនកម្ពុជា ។
ចំណែកលោក អ៊ុំ សំអាន អតីតសមាជិកសភាគណបក្សសង្គ្រោះជាតិបានសរសេរលើ បណ្តាញសង្គមយ៉ាងដូច្នេះថា សម្តេចតេជោហ៊ុន សែន នាយករដ្ឋមន្ត្រីជាអ្នកកាត់ទឹកដីឲ្យវៀតណាមតាមរយៈផ្តល់ដីសម្បទានសេដ្ឋកិច្ចដែលមានរយៈពេល៩៩ឆ្នាំ ។ ប៉ុន្តែការលើកឡើងរបស់អតីតមន្ត្រីជាន់ខ្ពស់បក្សប្រឆាំងនេះ ត្រូវបានអ្នកនាំពាក្យគណបក្សកាន់អំណាចលោកសុខ ឥសាន បានលើកឡើងថា ថ្ងៃទី៤ ខែមិថុនា ឆ្នាំ២០១៩ គឺជាខួប៧០ឆ្នាំ នៃការបាត់បង់ទឹកដីកម្ពុជាក្រោមនេះ គឺជាព្រឹត្តិការណ៍ប្រវត្តិសាស្ត្រដែលបានប ន្សល់ទុកឲ្យកូនខ្មែរចងចាំ និងទុកជាបទពិសោធន៍ដែលគួរជៀសវាងកុំឲ្យជាន់ដានប្រវត្តិសាស្ត្រដ៏ជូរចត់នេះអាចកើតឡើងជាថ្មីនៅពេលបច្ចប្បន្ន និងតទៅអនាគតទៀត ។
លោកថា នៅឆ្នាំ១៩៣៩ អាណានិគមនិយមបារាំងបានផ្ទេរការគ្រប់គ្រងរដ្ឋបាលលើ កោះត្រល់ទៅឲ្យរដ្ឋបាលកូសាំងស៊ីន ។ នៅថ្ងៃទី៤ ខែមិថុនា ឆ្នាំ១៩៤៩ អាណានិគមនិយមបារាំងបានប្រគល់ដែនដីកម្ពុជាក្រោមទាំងមូល ដែលរួមទាំងកោះត្រល់ផងទៅឲ្យស្តេចបាវដាយនៃប្រទេសអណ្ណាម បន្ទាប់ពីមានការអនុម័តរបស់សភាកូសាំងស៊ីន និងសភានៃសហភាពបារាំង និងសេចក្តីសម្រេចរបស់លោកប្រធានាធិបតីបារាំងផង រួចមក ដោយគ្មានការតវ៉ាណាមួយពីអាជ្ញាធរកម្ពុជាឡើយ ។
លោកបញ្ជាក់ថា៖« ការបាត់បង់ដែនដីកម្ពុជាក្រោម គឺជាការបាត់បង់ដ៏គួរឲ្យសោកស្តាយជាទីបំផុត តែហួសពីលទ្ធភាពដែលអាចធ្វើទៅបានក្នុងការទាមទារមកឲ្យប្រជាជាតិ កម្ពុជាវិញ គ្រាន់តែបានចាត់ទុកថា ជាផលវិបាកនៃប្រវត្តិសាស្ត្រប៉ុណ្ណោះ» ។ ជាមួយគ្នានោះដែរអ្នកនាំពាក្យគណបក្សប្រជាជនក៏បានលើកឡើងថា ការបាត់បង់ដែនដីកម្ពុជាក្រោមត្រូវបានអ្នកនយោបាយយកមកធ្វើអាជីវកម្មកេងចំណេញខាងនយោបាយបោកប្រាស់ប្រជាជន ដាក់កំហុសទៅលើគណបក្សនយោបាយជាគូប្រកួត ដើម្បីមហិច្ឆតាចង់បានសន្លឹកឆ្នោតតែប៉ុណ្ណោះ ៕ កែសម្រួលដោយ ៖ សុឃាក់
ចែករំលែកព័តមាននេះ