ប្រទេសស៊ូដង់់ ៖ យោងតាមក្រុមគ្រូពេទ្យស្និទ្ធពួកអ្នកតវ៉ាថា ការបង្ក្រាបយ៉ាងបង្ហូរឈាមទីតាំងបាតុកម្មនៅក្រុងខាទុម ដោយកងយោធាស៊ូដង់កាលពីថ្ងៃទី៣ មិថុនា បណ្ដាលឲ្យមនុស្សស្លាប់យ៉ាងតិច៣០នាក់ ហើយជាច្រើនរយនាក់រងរបួស។ អំពើហិង្សានោះត្រូវបានថ្កោលទោសដោយសហគមន៍អន្តរជាតិ។
ក្រុមប្រឹក្សាយោធាដែលកាន់អំណាចបណ្ដោះអាសន្ននៅស៊ូដង់ បានបដិសេធរាល់ការបង្ក្រាបដោយកម្លាំងទីតាំងបាតុកម្មនោះ។ ទោះបីយ៉ាងណាក្រុមសម្ព័ន្ធភាព ដើម្បីសេរីភាព និងការផ្លាស់ប្ដូរ ដែលជាអ្នកនាំមុខក្នុងការធ្វើបាតុកម្មតវ៉ាបានលើកឡើងថា មានសាកសពអ្នកស្លាប់ជាច្រើនដោយការបង្ក្រាបនោះ ដែលយើងនៅមិនទាន់អាចប្រមូលយកចេញបាន។
តាមតុល្យការបណ្ដោះអាសន្នចុងក្រោយរបស់ខ្លួន គណៈកម្មាធិការកណ្ដាលនៃក្រុមគ្រូពេទ្យស្និទ្ធការតវ៉ានិយាយថា រាប់ឃើញសាកសពមនុស្សជាង៣០នាក់ ហើយមនុស្សច្រើនរយនាក់រងរបួស។ អង្គការនោះលើកពីការលំបាក ក្នុងការរាប់ចំនួនពិតប្រាកដនៃអ្នកស្លាប់ មកពីការឡោមព័ទ្ធបណ្ដាមន្ទីរពេទ្យពីសំណាក់កងកម្លាំងសន្តិសុខ។ បណ្ដាគ្រូពេទ្យរងការវាយដំនិងចាប់ខ្លួន។
ជាប្រតិកម្មតបចំពោះការបង្ក្រាបបង្ហូរឈាមនេះ សមាគមបណ្ដាអ្នកវិជ្ជាជីវៈស៊ូដង់ ជាតួអង្គគន្លឹះនៃការបះបោរ បានអំពាវនាវដល់ប្រជាជនឲ្យលើកគ្នាធ្វើបាតុកម្ម នាថ្ងៃទី៤ មិថុនា ជាថ្ងៃបុណ្យបញ្ចប់រ៉ាម៉ាដាន ដើម្បីសូត្រធម៌ជូនដល់បណ្ដាជនរងគ្រោះនិងដើម្បីតវ៉ាដោយសន្តិវិធីក្រោយសូត្រធម៌រួច។
ចាប់តាំងពីថ្ងៃទី៦ មេសាមក បាតុករច្រើនពាន់នាក់ បានមកបោះជំរំតវ៉ានៅមុខទីបញ្ជាការដ្ឋានយោធាក្រុងខាទុម ដោយអំពាវដល់កងយោធាឲ្យផ្ដួលរំលំប្រធានាធិបតី លោកOMAR EL BECHIR។ ចាប់តាំងពីកងទ័ពផ្ដួលរំលំ ប្រធានាធិបតីរូបនេះពីថ្ងៃទី១១មេសាមក ពួកបាតុករនៅទាមទាររដ្ឋអំណាចស៊ីវិលមួយ និងការចាកចេញរបស់បណ្ដាឧត្ដមសេនីយពីអំណាច។
នារសៀលថ្ងៃទី៣ មិថុនា កងទាហាននៃកងកម្លាំងជួយទ្រទ្រង់រហ័សជាច្រើននាក់ត្រូវបានដាក់ពង្រាយ តាមបណ្ដោយវិថីសំខាន់នៃក្រុងខាទុម។ កងកម្លាំងទាំងនេះត្រួតពិនិត្យច្រកចេញចូលស្ពាននានាកាត់ទន្លេនីល។ នាព្រឹកព្រហាមគេស្ដាប់ឮស្នូរកាំភ្លើងមកពីទីតាំងបោះជំរំតវ៉ា រួចតាមវិថីទាំងឡាយនៃរដ្ឋធានី មានដាក់ពង្រាយកងកម្លាំងសន្តិសុខដ៏ច្រើន។
នាចុងរសៀលក្នុងសេចក្ដីប្រកាសមួយក្រុមប្រឹក្សាយោធាថ្លែងថា កងទ័ពបានធ្វើប្រតិបត្តិការដើម្បីបោសសម្អាតទីតាំងបោះជំរំធ្វើបាតុកម្មមួយចំនួន ដែលមានសកម្មភាពខុសច្បាប់នានា។ ក្រុមប្រឹក្សាយោធាស៊ូដង់នាពេលថ្មីៗនេះ បានបរិហារពីសកម្មភាពជ្រុលនិយមនានានៅជុំវិញទីតាំងបោះជំរំធ្វើបាតុកម្ម ដោយចាត់ទុកសម្មភាពទាំងនេះថា គំរាមកំហែងដល់សន្តិសុខជាតិ ហើយសន្យាបញ្ចេញប្រតិកម្មជាមួយការប្ដេជ្ញាចិត្ត៕ (កែសម្រួលដោយ ៖ បុប្ផា)
ចែករំលែកព័តមាននេះ