សង្គ្រាមពាណិជ្ជកម្ម ៖ យោងតាមសារព័ត៌មានអាមេរិក BLOOBERG ថា ប្រទេសវៀតណាមជាអ្នកចំណេញច្រើនជាងគេបំផុត ពីសង្គ្រាមពាណិជ្ជកម្មរវាងចិន និងសហរដ្ឋអាមេរិក។ នេះជាផលវិបាកនៃការប្ដូរទិសដៅបញ្ជាទិញរបស់អាមេរិក ទៅរកទីផ្សារឯទៀតៗក្រៅពីចិន ដើម្បីគេចពីការយកពន្ធគយខ្ពស់លើបណ្ដាទំនិញចិន។
ដោយយោងលើការសិក្សាមួយរបស់ក្រុមហ៊ុនហិរញ្ញវត្ថុជប៉ុនNOMURA HOLDING សារព័ត៌មានBLOOBERG សរសេរថា ក្នុងត្រីមាសទី១នៃឆ្នាំ២០១៩នេះ ការចំណេញរបស់វៀតណាមមកពីសង្គ្រាមពាណិជ្ជកម្មចិន-អាមេរិក មានប្រមាណជា៧,៩%នៃផលទុនជាតិសរុបរបស់ប្រទេសនោះ។
បន្ទាប់ពីវៀតណាមអ្នកចំណេញធំទី២នៃសង្រា្គមពាណិជ្ជកម្មនោះគឺតៃវ៉ាន់ ដែលមានប្រមាណជា២,១% នៃផលទុនជាតិសរុប។ ប្រទេសស៊ីលី ម៉ាឡេស៊ី និងអាហ្សង់ទីន ក៏ជាអ្នកចំណេញច្រើនពីសង្គ្រាមពាណិជ្ជកម្មនេះដែរ។ ពួកគេស្ថិតក្នុងចំណោមTOP5នៃអ្នកចំណេញពីភាពតានតឹងពាណិជ្ជកម្មដោយសារការកើនឡើងនៃការបញ្ជាទិញរបស់ចិន។
មុននេះ BLOOBERG ធ្លាប់បានគណនា ពីការខាតបង់ជាសាកល សម្រាប់សេដ្ឋកិច្ចពិភពលោក មកពីសង្គ្រាមពាណិជ្ចកម្មរវាងមហាយក្សទាំង២។ តាមការវាយតម្លៃនានាថា ផលទុនសរុបរបស់ពិភពលោកអាចធ្លាក់ចុះដល់៦០០ពាន់លានដុល្លារក្នុងឆ្នាំ២០២១៕ (កែសម្រួលដោយ ៖ បុប្ផា)
ចែករំលែកព័តមាននេះ