សហភាពអឺរ៉ុប ៖ មេធាវី២រូបកាលពីថ្ងៃទី៣ មិថុនា បានស្នើដល់តុលាការព្រហ្មទណ្ឌអន្តរជាតិ CPI ឲ្យកាត់ក្ដីសហភាពអឺរ៉ុប និងបណ្ដាប្រទេសជាមាជិក ពីបទឧក្រិដ្ឋប្រឆាំងមនុស្សជាតិ។
មេធាវីទាំង២រូបនោះបានលើកហេតុផល ពីការស្លាប់ជនអន្តោប្រវេសន៍ ច្រើនពាន់នាក់ក្នុងសមុទ្រមេឌីទែរ៉ាណេដោយស្វែងរក រត់គេចចេញពីលីប៊ី។ មេធាវីជនជាតិបារាំង-អេស្ប៉ាញ លោកJUAN BRANCOនិងមេធាវីជនជាតិអ៊ីស្រាអែលលោកOMAR SHATH ដែលអ្នកទាំង២រស់នៅក្រុងប៉ារីសគូសបញ្ជាក់ថា បានបញ្ជូនបណ្ដឹងមួយច្បាប់មាន២៤៥ទំព័រ ដល់អគ្គរដ្ឋអាជ្ញាតុលាការCPI លោកស្រីFATOU BENSOUDA។
យោងតាមអ្នកច្បាប់ទាំង២រូបនោះថា សំណុំរឿងនេះមានភស្ដុតាងគ្រប់គ្រាន់នៃការចូលរួមដៃ របស់បណ្ដាអ្នកទទួលខុសត្រូវជាន់ខ្ពស់និងរបស់បណ្ដាភ្នាក់ងារសហភាពអឺរ៉ុប និងបណ្ដាប្រទេសជាសមាជិក ក្នុងអំពើឧក្រិដ្ឋទាំងឡាយប្រឆាំងមនុស្សជាតិ ប្រព្រឹត្តតាមរយៈការអនុវត្តនយោបាយអន្តោប្រវេសន៍ របស់សហភាពអឺរ៉ុបក្នុងតំបន់សមុទ្រមេឌីទែរ៉ាណេនិងនៅលីប៊ី ចាប់តាំងពីឆ្នាំ២០១៤មក។ មនុស្សជាង១២.០០០នាក់បានត្រូវស្លាប់ ចាប់តាំងពីពេលនោះមកនៅសមុទ្រមេឌីទែរ៉ាណេ ពេលពួកគេប៉ុនប៉ងមកកាន់អឺរ៉ុបចេញពីលីប៊ី។ តាមពិតនោះជាផ្លូវអន្តោប្រវេសន៍តាមសមុទ្រ ដែលមានមនុស្សស្លាប់ច្រើនបំផុតនៃពិភពលោក។
លោកJUAN BRANCO និងលោកOMAR SHATHយល់ថា សហភាពអឺរ៉ុបបានប្រើនយោបាយអន្តោប្រវេសន៍ ផ្អែកលើការបណ្ដោយឲ្យពួកអន្តោប្រវេសន៍ដែលជួបអាសន្នក្នុងសមុទ្រឲ្យពួកគេស្លាប់។ ទិសដៅតែមួយគត់បំភ័យពួកអន្តោប្រវេសន៍ កុំឲ្យផ្សងព្រេងរត់ភៀសខ្លួនមកកាន់អឹរ៉ុប។ រួចពេលយុទ្ធសាស្ត្រនេះត្រូវបរាជ័យ មកពីមានប្រតិបត្តិការជួយសង្គ្រោះរបស់បណ្ដាអង្គការក្រៅរដ្ឋាភិបាល ទើបសហភាពអឹរ៉ុបអំពាវនាវដល់កងឆ្មាំឆ្នេរសមុទ្រលីប៊ី ឃាត់ចាប់ហើយបញ្ជូនពួកអន្តោប្រវេសន៍ ទៅកាន់ជំរំឃុំឃាំងអមនុស្សធម៌នានានៅលីប៊ី៕ (កែសម្រួលដោយ ៖ បុប្ផា)
ចែករំលែកព័តមាននេះ