រាជធានីភ្នំពេញ ៖ ទីម័រឡេស្តេបានប្រកាសថា នឹងយកប្រទេសកម្ពុជា គឺជាគំរូក្នុងការដឹកនាំ កសាង និងអភិវឌ្ឍប្រទេស ។ នេះបើតាមការអះអាងរបស់រដ្ឋមន្ត្រីក្រសួងការបរទេស និងសហប្រតិបត្តិការនៃសាធារណរដ្ឋប្រជាធិបតេយ្យទីម័រឡេស្តេ ។ ក្នុងជំនួបពិភាក្សាជាមួយ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នាព្រឹកថ្ងៃទី៤ ខែមិថុនា នៅវិមានព្រឹទ្ធសភាលោក លោកឌីយ៉ូនីស្យូ ដា កូសតា បាបូ សូរេស (Dionisio da Costa Babo Soares) រដ្ឋមន្ត្រីការបរទេសទីម័រឡេស្តេបានលើកឡើងថា ដំណើរទស្សនកិច្ចនាឱកាសនេះពិតជាមានសារសំខាន់ដល់ការពង្រឹងចំណងមិត្តភាព កិច្ចសហប្រតិបត្តិការរវាងប្រទេស ដើម្បីជាគុណប្រយោជន៍ដ៏ធំធេងប្រជាជន និងប្រទេសទាំងពីរទាំងក្នុងពេលបច្ចុប្បន្ន និងអនាគត ។
លោកថា គោលបំណងនៃដំណើរទស្សនកិច្ចនាឱកាសនេះ គឺទីមួយ ដើម្បីពង្រឹងពង្រីកទំនាក់ទំនង និងកិច្ចសហប្រតិបត្តិការទ្វេភាគីរវាងប្រទេសកម្ពុជា និងប្រទេសទីម័រឡេស្តេ និងទីពីរពិភាក្សាគ្នាក្នុងក្របខណ្ឌពហុភាគីក្នុងបរិបទអង្គការអាស៊ាន ។ លោករដ្ឋមន្ត្រីបញ្ជាក់ថា ៖« ប្រទេសកម្ពុជា និងប្រទេសទីម័រឡេស្តេមានប្រវត្តិសាស្ត្រ និងអតីតកាលដូចគ្នាក្នុងបរិបទសង្គ្រាមដែលប្រទេសទាំងពីរបានជួបប្រទះ ហើយប្រទេសកម្ពុជា គឺជាប្រទេសគំរូមួយក្នុងការដឹកនាំកសាង និងការអភិវឌ្ឍប្រទេស» ។
វឌ្ឍនភាពផ្នែកសេដ្ឋកិច្ចនេះ គឺជាបទពិសោធន៍សម្រាប់ប្រទេសទីម័រឡេស្តេ ក្នុងការសិក្សា ស្វែងយល់ ។ នៅក្នុងឱកាសនោះដែរ សម្តេចវិបុលសេនាភក្តី សាយ ឈុំ បានថ្លែងអំណរ គុណចំពោះលើកឡើងរបស់លោកឌីយ៉ូនីស្យូ ដា កូសតា បាបូ សូរេស ដែលបានថ្លែងសរសើរអំពីទំនាក់ទំនងមិត្តភាពសាមគ្គីភាព និងកិច្ចសហប្រតិបត្តិការដ៏ល្អប្រពៃរវាងប្រជាជននៃប្រទេសទាំងពីរក៏ដូចជា ការរីកចម្រើនរបស់ប្រទេសកម្ពុជា នាពេលបច្ចុប្បន្ន ។ សម្តេចប្រធានព្រឹទ្ធសភាបានសម្តែងនូវសេចក្តីរីករាយដោយបានមើលឃើញទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំងពីរមានការរីកចម្រើន ។
ការរីកចម្រើននេះស្តែងឡើងតាមរយៈការផ្លាស់ប្តូរទស្សនកិច្ចរវាងថ្នាក់ដឹកនាំកំពូល ថ្នាក់ដឹកនាំជាន់ខ្ពស់ និងថ្នាក់ដឹកនាំជំនាញក៏ដូចជា ការគាំទ្រគ្នាទៅវិញទៅមកនៅក្នុងក្របខ័ណ្ឌកិច្ចសហប្រតិបត្តិការអន្តរជាតិ ។
សម្តេចប្រធានព្រឹទ្ធសភា សូមលើកទឹកចិត្តចំពោះរដ្ឋាភិបាលបនៃប្រទេសទាំពីរក្នុងការជំរុញកំណើនពាណិជ្ជកម្មជំរុញការផ្លាស់ប្តូរទេសចរណ៍វប្បធម៌ និងការផ្លាស់ប្តូរមនុស្សរវាងប្រទេសទាំងពីរ ។ ជាចុងក្រោយសម្តេចប្រធានព្រឹទ្ធសភាបានគូសបញ្ជាក់ថា ដូចអ្វីដែលលោករដ្ឋម ន្ត្រីបានលើកឡើងអំពីការគាំទ្ររបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងសម្តេច ហេងសំរិន ប្រធានរដ្ឋសភានៃព្រះរាជាណាចក្រកម្ពុជា ចំពោះប្រទេសទីម័រឡេស្តេជាមាជិកអាស៊ានសភាកម្ពុជាក៏សូមគាំទ្រសភាទីម័រឡេស្តេជាសមាជិកផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ