ខេត្តកណ្ដាល ៖ នៅព្រឹកថ្ងៃទី០៣ មិថុនា លោកឧត្តមសេនីយ៍ត្រី សំ តុលា មេបញ្ជាការកងរាជអាវុធហត្ថខេត្តកណ្តាល បានប្រាប់កោះសន្តិភាពតាមទូរសព្ឌ័ថា៖ ខ្មាន់កាំភ្លើងដែលបាញ់ចំនួនបួនគ្រាប់នៅក្នុងខារ៉ា…
ខេត្តកណ្ដាល ៖ នៅព្រឹកថ្ងៃទី០៣ មិថុនា លោកឧត្តមសេនីយ៍ត្រី សំ តុលា មេបញ្ជាការកងរាជអាវុធហត្ថខេត្តកណ្តាល បានប្រាប់កោះសន្តិភាពតាមទូរសព្ឌ័ថា៖ ខ្មាន់កាំភ្លើងដែលបាញ់ចំនួនបួនគ្រាប់នៅក្នុងខារ៉ា អូខេ ប៊ី ហ្គោល បង្កការភ្ញាក់ផ្អើលពេញក្រុងតាខ្មៅទាំងកណ្តាលយប់នោះ«បានចូលខ្លួនមកសារភាពហើយនៅកងរាជអាវុធហត្ថក្រុងតាខ្មៅ ហើយត្រូវកម្លាំងជំនាញកំពុងធ្វើការសាកសូរ និងចាត់ការតាមនីតិវិធី» ។
សូមរំលឹកថា ករណីផ្ទុះអាវុធជាច្រើនគ្រាប់ ដែលបង្កឱ្យមានការភ្ញាក់ផ្អើលកណ្តាលយប់នោះ បានធ្វើឱ្យ
នារីៗដែលបំរើការងារនៅក្នុងខារ៉ាអូខេ ប៊ី ហ្គោល រត់បាតជើងសព្រាតព្រលឹងចុងសក់រៀងៗខ្លួន មិន តែប៉ុណ្ណោះ ធ្វើអោយអ្នកបើករថយន្តកុងតឺន័រមួយគ្រឿង ភ័យលស់ព្រលឹង ដោយសារគ្រាប់កាំភ្លើងហោះផ្លោងទៅចំកញ្ចក់រថយន្តបែកខ្ចាយពេលដែលកំពុងបើកបរ ។ ខ្មាន់កាំភ្លើងនេះជាយោធា ឈ្មោះសាន សុច ភេទប្រុស អាយុ៣៨ឆ្នាំ មានទីលំនៅភូមិព្រែកហូរលិច សង្កាត់ព្រែកហូរ ក្រុងតាខ្មៅ ។
ហេតុការណ៍បង្ករអោយមានការភ្ញាក់ផ្អើលនេះ បានកើតឡើងនៅវេលាម៉ោង២០និង៣០នាទីថ្ងៃទី០២ មិថុនា នៅក្នុងហាងខារ៉ាអូខេ ប៊ី ហ្គោល (B-Gold) ភូមិព្រែករាំង សង្កាត់កំពង់សំណាញ់ ក្រុងតាខ្មៅ ដែលជាហាងធំមួយមានល្បីឈ្មោះយូរមកហើយខាងសប្បាយៗ និងខាងរត់ចែកជើងគ្នា ។ បន្ទាប់ពីបាញ់ដ៏កក្រើករួចមក បានបន្សល់ទុកស្រោមកាំភ្លើងពណ៌ខ្មៅចំនួន០១ សោរម៉ូតូ១ចង្កោមមាន កូនសោម៉ូតូ១ កូនសោរថយន្ត១ តេឡេរថយន្ត១ គ្រាប់កាំភ្លើងខ្លី ម៉ាកឡុកចំនួន០៤ បាញ់ផ្ទុះអស់៣គ្រាប់(លេខA-USA 9MM-LUGER)។
ខ្មាន់កាំភ្លើងបានជិះម៉ូតូ១គ្រឿង ម៉ាកហុងដា C125 ពណ៌ខ្មៅ ស៊េរី២០១៩ ចូលផឹកស៊ីច្រៀងខារ៉ាអូខេ នៅហាងB Gold បន្ទប់លេខ888 ជាមួយមិត្តភក្ដិ ប្រុសពីរនាក់ទៀត មិនស្គាល់ឈ្មោះ ។ ពេលគ្រឿងស្រវឹងចូលក្នុងខ្លួនហើយស្រាប់តែឈ្លោះប្រកែកគ្នា បន្ទាប់មកគេឃើញមន្ត្រីយោធារូបនេះ ដើរចេញមកក្រៅហាងចាក់សោកែបម៉ូតូយកកាំភ្លើងខ្លីម៉ាកឡុកពណ៌ខ្មៅ កាន់ដើរចូលទៅបាញ់ក្នុងហាងចំនួន០៤គ្រាប់ តែផ្ទុះ៣គ្រាប់ ហើយស្រែកថា «អញឈ្មោះ អាសុច អាណាខ្លាំងចេញមក អញបាញ់ឲ្យងាប់» រួចហើយដើរចេញមកវិញឡើងជិះម៉ូតូតាមផ្លូវ១១៥ ទៅទិសខាងលិចរួចបាញ់ឡើងលើ០១គ្រាប់ទៀតយកជ័យ តែមិនបណ្តាលឱ្យមានអ្នករបួសទេ ហើយក៏គេចខ្លួនបាត់ទៅ ។
ក្រោយពេលភ្ញាក់ផ្អើល រត់ជាន់គ្នាទាំងយប់មក សមត្ថកិច្ចក៏បានទៅធ្វើអន្តរាគមន៍ក្នុងហាងនេះ ដោយប្រមូលបានរូបភាពអ្នកក្លាហានដៃកាន់កាំភ្លើងខ្លីតាមកាមេរ៉ាសុវត្តិភាពដើម្បីកំណត់មុខសញ្ញា ។ ទំនងអ្នកបាញ់ដេកអត់លក់ទេពេញមួយយប់ ។ លុះព្រឹកឡើងស្វាងស្រាក៏ចូលមកសារភាពនៅកងរាជអាវុធហត្ថយ៉ាងសុភាព មិនហ៊ានកាចដូចពីយប់ទេ ។
តាមព័ត៌មានចុងក្រោយបានឱ្យដឹងថា មន្ត្រីយោធាដែលរពឹសដៃខាងបាញ់កាលពីយប់នៅហាងខារ៉ាអូខ នៅរសៀលថ្ងៃ៣ មិថុនា ត្រូវបានតុលាការចោទប្រកាន់២បទល្មើស គឺ ១-ធ្វើឱ្យខូចខាតដោយអចេតនានិង២-ប្រើប្រាស់អាវុធដោយគ្មានការអនុញ្ញាត ។ មន្ត្រីយោធារូបនេះ ត្រូវបានសម្រេចឃុំខ្លួនបណ្ដោះអាសន្ននៅពន្ធនាគារ ។ (សម្រួលដោយ៖ ស្រីណា)
ចែករំលែកព័តមាននេះ