រាជធានីភ្នំពេញ ៖ មន្ត្រីជាន់ខ្ពស់ និងជាអ្នកនាំពាក្យគណបក្សប្រជាជនកម្ពុជាលោក សុខ ឥសាន បានអះអាងថា យុទ្ធនាការហូបនំបញ្ចុក នៅថ្ងៃទី៩ ខែមិថុនាខាងមុខនេះសមាជិកគណបក្សប្រជាជនកម្ពុជានឹងមានចំនួនច្រើនជាងអតីតសមាជិកគណបក្សប្រឆាំង ។ លោក សុខ ឥសាន បានឲ្យដឹងតាមប្រព័ន្ធតេឡេក្រាម នៅថ្ងៃទី៤ មិថុនាថា យុទ្ធនាការហូបនំបញ្ចុក គឺជាវិធីយកពូថៅវាយក្បាលដែកគោល គណបក្សប្រជាជនកម្ពុជាបានបើកយុទ្ធនាការហូបនំបញ្ចុក នៅថ្ងៃទី៩ ខែមិថុនា ២០១៩ ហូបរួមគ្នានៅទូទាំងប្រទេស ។
លោកបន្តថា សមាជិកគណបក្សប្រជាជនកម្ពុជាពិតជាមានចំនួនច្រើនលើសលុប លើក្រុមឧទ្ទាមក្រៅច្បាប់ (CNRP) យ៉ាងពិតប្រាកដ ពីព្រោះគ្រាន់តែអ្នកបោះឆ្នោតគាំទ្រគណបក្សប្រជាជនកម្ពុជាមាន ៧៧, ៧៨% ឬ៨៣,០២% នៃប្រជាជនមានឈ្មោះក្នុងបញ្ជីរបោះឆ្នោត និងបានទៅបោះឆ្នោត ។ ការលើកឡើងរបស់អ្នកនាំពាក្យគណបក្សកាន់អំណាចនេះបន្ទាប់ពីលោកសម រង្ស៊ី អតីតប្រធានគណបក្សសង្គ្រោះជាតិបានអំពាវនាវដល់សមាជិកជនខ្លួនធ្វើទិវាហូបនំបញ្ចុក នៅថ្ងៃទី៩ ខែមិថុនា ហើយថា បើខាងសមាជិកគណបក្សប្រជាជនកម្ពុជាហៅហូបក៏ហូបជាមួយគ្នាទៅ ។
យ៉ាងណាក្តីលោក សុខ ឥសានបានលើកឡើងថា ក្រុមឧទ្ទាមមានសង្ឃឹមថា បានស៊ីនំបញ្ចុកជាមួយគណបក្សប្រជាជនកម្ពុជា គឺជាការអត់ផ្លូវទេ សម្រាប់ក្រុមមេឧទ្ទាមក្រៅច្បាប់ ។ លោកបញ្ជាក់ថា «កុំឆ្លៀតឱកាសបើកទូលាយរបស់គណបក្សប្រជាជនកម្ពុជាចង់មកប្លមដែរនោះ ។ គណបក្សប្រជាជនកម្ពុជបើកភ្លើងខៀវស្វាគមន៍ តែចំពោះអតីតសមាជិកតែប៉ុណ្ណោះ »។ ជាមួយគ្នានោះដែរ លោកសុខ ឥសាន ក៏បានលើកឡើងថា ផ្លូវដែលមេក្រុមឧទ្ទាមក្រៅច្បាប់ កំពុងធ្វើ គឺជានយោបាយរបស់មេឧទ្ទាមក្រៅច្បាប់ គឺចង់ចូលស្រុក ។ ប៉ុន្តែដោយសារខ្លួនជាប់សាលដីការបស់តុលាការ ទើបមេឧទ្ទាមក្រៅច្បាប់នេះមិនហ៊ានអើតក្បាលចូលមកក្នុងស្រុកដោយគ្រាន់តែប្រើការឃោសនាបោកប្រាស់អ្នកជឿយកលុយ និងបន្តអាជីពនយោបាយតាមមហិច្ឆតារបស់ខ្លួន ។ លោកក៏បានបញ្ជាក់ថា«ឥឡូវសភាពការណ៍ទុំជោរហើយ ក្រុមឧទ្ទាមក៏កាន់តែចូលជ្រៅទៅក្នុងអត់លទ្ធភាពវិលចូលស្រុកដែលធ្វើឲ្យជីវិតនយោបាយរបស់ពួកគេត្រូវបញ្ចប់ជាស្ថាពរ» ។
សូមជម្រាបថា តាមការសង្កេតបន្ទាប់ពីប្រមុខដឹកនាំគណបក្សកាន់អំណាច និងអតីតប្រមុខដឹកនាំគណបក្សប្រឆាំងបានប្រកាសយក ថ្ងៃទី៩ ខែមិថុនា ជាថ្ងៃហូបនំបញ្ចុកមកនៅលើបណ្តាញសង្គមឃើញអ្នកលេងហ្វេសប៊ុកបង្ហោះរូបនំបញ្ចុកយ៉ាងព្រោងព្រាត ។ ការយកថ្ងៃហូបនំបញ្ចុកនេះដែរ បានធ្វើផ្តល់ឱកាសចំពោះអ្នកធ្វើអាជីវកម្មនំបញ្ចុក ប៉ុន្តែក៏មានវិបត្តិផងដែរព្រោះគ្មាននំបញ្ចុកសម្រាប់ហូប បើសិនអ្នកមានចំនួនច្រើនពោល គឺនៅទូទាំងប្រទេសនោះ ៕ កែសម្រួលដោយ ៖សុឃាក់
ចែករំលែកព័តមាននេះ