ញូយ៉ក ៖ យោងតាមភ្នាក់ងារសារព័ត៌មាន Reuters បានឲ្យដឹងកាលពីថ្ងៃទី៣ មិថុនា កន្លងមកថា តម្លៃប្រេងបានធ្លាក់ចុះកាលពីថ្ងៃចន្ទ ព្រោះតែជម្លោះពាណិជ្ជកម្មរវាងសហរដ្ឋអាមេរិកជាមួយនឹងម៉ិកស៊ិក និងប្រទេសចិនកាន់តែជំរុញដល់កង្វល់ទាក់ទិននឹងការធ្លាក់ចុះនៃតម្រូវការប្រេងឆៅទូទាំងពិភពលោក…
ញូយ៉ក ៖ យោងតាមភ្នាក់ងារសារព័ត៌មាន Reuters បានឲ្យដឹងកាលពីថ្ងៃទី៣ មិថុនា កន្លងមកថា តម្លៃប្រេងបានធ្លាក់ចុះកាលពីថ្ងៃចន្ទ ព្រោះតែជម្លោះពាណិជ្ជកម្មរវាងសហរដ្ឋអាមេរិកជាមួយនឹងម៉ិកស៊ិក និងប្រទេសចិនកាន់តែជំរុញដល់កង្វល់ទាក់ទិននឹងការធ្លាក់ចុះនៃតម្រូវការប្រេងឆៅទូទាំងពិភពលោក ។
តម្លៃប្រេងរបស់ក្រុមហ៊ុន Brent ស្មើ ៦១.២៨ដុល្លារក្នុងមួយបារ៉ែល ឬធ្លាក់ចុះអស់ ១.២% ខណៈដែលតម្លៃប្រេង West Texas Intermediate (WTI) បានធ្លាក់ចុះអស់ ០.៥% មកស្មើ ៥៣.២៥ដុល្លារក្នុងមួយបារ៉ែល ។
ប្រទេសម៉ិកស៊ិកបាននិយាយថា ពួកគេនឹងបដិសេធសំណើររបស់អាមេរិកក្នុងការទទួលអ្នកសុំសិទ្ធិជ្រកកោនពីអាមេរិកកណ្តាលប្រសិនបើបញ្ហានេះត្រូវបានលើកឡើងក្នុងកិច្ចប្រជុំនាសប្តាហ៍នេះជាមួយនឹងរដ្ឋាភិបាលលោកប្រធានាធិបតី ដូណាល់ ត្រាំ ដែលកំពុងតែគម្រាមថានឹងដាក់ពន្ធព្រោះតែបញ្ហាជនអន្តោប្រវេសន៍ ។ ស្ថានការនេះកំពុងតែតានតឹងឡើង ខណៈដែលសង្គ្រាមពាណិជ្ជកម្មរវាងសហរដ្ឋអាមេរិក និងប្រទេសចិនកំពុងតែប៉ះពាល់ដល់តម្លៃប្រេងរួចទៅហើយ ។
លោក Jim Ritterbusch ដែលមកពី Ritterbush and Associates បាននិយាយថា «ការផ្តោតសំខាន់ត្រូវបានងាកពីការផ្គត់ផ្គង់ទៅតម្រូវការវិញខណៈដែលកិច្ចព្រមព្រៀងពាណិជ្ជកម្មរវាងសហរដ្ឋអាមេរិកនិងប្រទេសចិនកាន់តែមានភាពស្រពេចស្រពិល និងខណៈដែលកង្វល់ទាក់ទិននឹងផលប៉ះពាល់នៃពន្ធលើការលូតលាស់សេដ្ឋកិច្ចពិភពលោកត្រូវបានងាកទៅម៉ិកស៊ិក»។
ការអន់ថយនៃទីផ្សារភាគហ៊ុន Wall Street របស់សហរដ្ឋអាមេរិកក៏បានប៉ះពាល់ដល់តម្លៃប្រេងដែរ ។ លើសពីនេះទៅទៀត ការដែលអារ៉ាប៊ីសាអូឌីតផ្តល់មុខសញ្ញាថាអង្គការនៃប្រទេសនាំចេញប្រេង (OPEC) និងសម្ព័ន្ធមិត្តនឹងបន្តខិតខំរក្សាលំនឹងភាពទីផ្សារនៅឆមាសទីពីរនាឆ្នាំនេះបានជួយកាត់បន្ថយការខាតបង់កាលពីថ្ងៃចន្ទ ។
រដ្ឋមន្ត្រីថាមពល Khalid al-Falih របស់អារ៉ាប៊ីសាអូឌីតបាននិយាយថា «ពួកយើងនឹងខិតខំរក្សាលំនឹងភាពទីផ្សារក្រោយខែមិថុនា។ សម្រាប់ខ្ញុំវាមានន័យថា កាត់បន្ថយប្រេងក្នុងស្តុកពីចំនួនដែលកំពុងតែកើនឡើងនេះ» ៕
កែសម្រួលដោយ ៖ សំណាង
ចែករំលែកព័តមាននេះ