រាជធានីភ្នំពេញ ៖ ប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែន បានប្តេជ្ញាខិតខំជំរុញលំហូរពាណិជ្ជកម្មជាមួយម៉ាឡេស៊ី ដើម្បីឲ្យក្លាយជាលំហូរពាណិជ្ជកម្មសេរី ។ មានប្រសាសន៍ក្នុងជំនួបជាមួយពិភាក្សាជាមួយលោក Eldeen Hasaaini Binh Mohd Hashim ដែលត្រូវបានតែងតាំងជាអគ្គរដ្ឋទូតវិសាមញ្ញា និងពេញសមត្ថភាព នៅកម្ពុជានាព្រឹកថ្ងៃទី៤ ខែមិថុនា នៅវិមានសន្តិភាព ។
សម្ដេចតេជោក៏បានមានប្រសាសន៍ផងដែរថា ទំនាក់ទំនងរវាងកម្ពុជា និងម៉ាឡេស៊ីបានឈានដល់កម្រិតមួយដែលមិនធ្លាប់មាន ហើយអ្វីដែលជាគោលបំណង និងសេចក្តីប៉ងប្រាថ្នារបស់សម្ដេច គឺធ្វើយ៉ាងណាជំរុញពាណិជ្ជកម្មរវាងប្រទេសទាំងពីរឲ្យកាន់តែធំបន្ថែមទៀត ហើយលើសពីនោះទៀត គឺធ្វើយ៉ាង ណាជំរុញលំហូរ ពាណិជ្ជកម្មរ វាងប្រទេសទាំងពីរឲ្យមានលំហូរដោយសេរី ស្របតាមយន្តការគោលការណ៍ និងគោលនយោបាយរបស់អាស៊ានមិនតែប៉ុណ្ណោះត្រូវជំរុញឱ្យមានលំហូរពាណិជ្ជកម្មរវាងប្រទេសអាស៊ាន និងអាស៊ានផងដែរ ។
សម្ដេចតេជោនាយករដ្ឋមន្ត្រីក៏បានធ្វើការណែនាំឲ្យធ្វើយ៉ាងណាជំរុញកិច្ចព្រមព្រៀងពាណិជ្ជកម្មប្រទេសទាំងពីរផង និងជំរុញកិច្ចព្រមព្រៀងមិនយកពន្ធត្រួតគ្នានៃប្រទេសទាំងពីរផង ដើម្បីធ្វើយ៉ាងណាសម្រួលដល់ការវិនិយោគពាណិជ្ជកម្មយើងទាំងពីរ ហើយសម្តេចតេជោក៏បានជូនពរលោកឯកអគ្គរដ្ឋទូតថ្មី ទទួលបាននូវភាពជោគជ័យក្នុងបេសកកម្មការងារនៅកម្ពុជា ។ ក្នុងជំនួបនោះដែរលោក Eldeen Hasaaini Binh Mohd Hashim (អែលឌីន ហួសៃនី ប៊ីន ម៉ូត ហាស៊ីម) ឯកអគ្គរដ្ឋទូតម៉ាឡេស៊ី ប្រចាំនៅកម្ពុជា បានកោតសរសើរយ៉ាងខ្លាំង ចំពោះសម្តេចតេជោ ហ៊ុន សែន ដែលជាមេដឹកនាំមួយរូបដែលបានដឹកនាំប្រទេស កម្ពុជាពីប្រទេសដែលមានសង្គ្រាមមកជាប្រទេសដែលមានសុខសន្តិភាព ប្រជាធិបតេយ្យ និងជាប្រទេសដែលមានការអភិវឌ្ឍន៍ និងរីកចម្រើន ។
លោកឯកអគ្គរដ្ឋទូតម៉ាឡេស៊ីថ្មីក៏បានជម្រាបជូនសម្ដេចតេជោនាយករដ្ឋមន្ត្រីថា ក្នុងបេសកកម្មការងាររបស់លោកនៅកម្ពុជា នៅពេលនេះគឺទី១-ធ្វើយ៉ាងណាជំរុញទំនាក់ទំនងកម្ពុជា និងម៉ាឡេស៊ីឲ្យកាន់តែមានការរីកចម្រើនឡើងថែមទៀត ។ ទី២-ជំរុញរាល់កិច្ចព្រមព្រៀងអនុស្សារណៈទាំងឡាយ ដែលបានចុះហត្ថលេខាកន្លងមកឲ្យដំណើរការទៅមុខ ។ ទី៣-ជំរុញពាណិជ្ជកម្មកម្ពុជា និងម៉ាឡេស៊ីអោយមានទំហំកាន់តែធំឡើង ជាពិសេសការនាំអង្ករចេញពីកម្ពុជាទៅម៉ាឡេស៊ី ព្រមទាំងធ្វើយ៉ាងណាជំរុញការវិនិយោគម៉ាឡេស៊ី នៅកម្ពុជាឱ្យក្លាយទៅជាវិនិយោគធំលំដាប់ទី១ នៅកម្ពុជា ៕កែសម្រួលដោយ ៖សុឃាក់
ចែករំលែកព័តមាននេះ