ខេត្តបន្ទាយមានជ័យ ៖ លំនៅឋានទើបសាងសង់ថ្មីរបស់ពលរដ្ឋជាង៤០ខ្នង នៅចំណុច៦៧១ ស្ថិតក្នុង
ឃុំទួលពង្រ ស្រុកម៉ាឡៃ ត្រូវបានប្រជាសហគមន៍ការពារព្រៃឈើឃុំទួលពង្រ ចុះរុះរើដោយចោទថា
បានសាងសង់ប៉ះចំដីព្រៃសហគមន៍ ។ ការចុះរុះរើនេះ ធ្វើឡើងនៅព្រឹកថ្ងៃទី០៣ មិថុនា ដោយក្រុមប្រជា
សហគមន៍ចោទប្រកាន់ ឯប្រជាពលរដ្ឋបានស្រែកថា «ជារឿងអយុត្តិធម៌» ។
ក្រុមប្រជាសហគមន៍ ដែលចុះទៅរុះរើលំនៅឋានពលរដ្ឋមានគ្នាជាង១០០នាក់ ប្រដាប់ដោយកាំបិត ពូថៅច្រូងច្រាង ដឹកនាំដោយលោកសាន ស៊ីម ប្រធានសហគមន៍ ការពារព្រៃឈើឃុំទួលពង្រ និងអមដោយនគរបាល អាវុធហត្ថ និងប្រជាការពារភូមិ ប៉ុន្តែដើម្បីការពារសន្តិសុខ ខ្លាចក្រែងកើតមានអំពើហិង្សាកើតឡើង។
លំនៅឋានពលរដ្ឋចំនួន៤៣ខ្នង ត្រូវបានក្រុមប្រជាសហគមន៍ខាងលើ រុញផ្តួល ខ្លះរុះរើកម្ទេច ។ ខណៈ ម្ចាស់លំនៅឋាននិយាយថា ពួកគាត់ព្យាយាមសុំអង្វររុះរើខ្លួនឯង ដើម្បីកុំឲ្យខូចខាតទ្រព្យសម្បត្តិ ប៉ុន្តែក្រុមប្រជាសហគមន៍ មិនអនុញ្ញាត ។ ក្រុមពលរដ្ឋថា មាន់ ទា ដែលពួកគាត់ចិញ្ចឹមតាមផ្ទះ ពេលនេះមិនដឹងថា
រត់ទៅណាអស់ហើយទេ ។
លោកសាន ស៊ីម ប្រធានសហគមន៍ការពារព្រៃឈើ ឃុំទួលពង្រ បានប្រាប់កោះសន្តិភាពថា លំនៅឋាន ដែលរុះរើទាំងអស់ គឺជាសំណង់សាងសង់លើទីតាំងដីព្រៃសហគមន៍ ។ លោកបន្តថា កន្លងមក ធ្លាប់ជូន ដំណឹងជារឿយៗ តែពលរដ្ឋមិនស្តាប់ ។ លោកថា ដីព្រៃសហគមន៍ មានទទឹង1000ម៉ែត្រ និងបណ្តោយ5000ម៉ែត្រ តែថា ខាងលោករុះរើតែសំណង់ណា ដែលសាងសង់ចូលដីព្រៃសហគមន៍តែប៉ុណ្ណោះ ។ លោកបញ្ជាក់ថា ប្រជាសហគមន៍ការពារព្រៃឈើរបស់លោកមាន៥ភូមិ ក្នុងឃុំទួលពង្រ និងមានពលរដ្ឋ1000គ្រួសារ។
លោកហ៊ឹម យឺន តំណាងពលរដ្ឋចំណុច៦៧១ (ទីតាំងកើតហេតុ) និយាយថា សំណង់ពលរដ្ឋជាង៤០ខ្នងខាងលើ មិនបានសាងសង់ប៉ះដីព្រៃសហគមន៍ទេ។ លោកបន្តថា ការចុះរុះរើរបស់ក្រុមប្រជាសហគមន៍
នេះមិនមានឯកសារលាយលក្ខណ៍អក្សរជូនដំណឹងជាមុន ឬជួបពិភាក្សាជាមួយក្រុមការងារលោកឡើយ ។ហើយថា ដីព្រៃសហគមន៍មានបង្គោលព្រំត្រឹមត្រូវ ពីជ្រុងមួយទៅជ្រុងមួយ។ តំណាងពលរដ្ឋរូបនេះ ប្រាប់ថា លោកនឹងប្តឹងតវ៉ាទៅថ្នាក់លើ ដើម្បីទាមទាររកយុត្តិធម៌ជូនម្ចាស់លំនៅឋានទាំងអស់ ។
លោកអែម សុខា អភិបាលស្រុកម៉ាឡៃប្រាប់តាមទូរស័ព្ទថា កាចុះរុះរើសំណង់អនាធិបតេយ្យរបស់ប្រជាសហគមន៍ជារឿងត្រឹមត្រូវ ព្រោះបើទុកវាអាចទៅជាចលនាបំផុសដីធ្លីឈ្នះ បានដីចាញ់បានលុយ ។ (សម្រួលដោយ៖ ស្រីណា)
ចែករំលែកព័តមាននេះ