ប្រទេសវៀតណាម ៖ ភ្នាក់ងារសារព័ត៌មាន Viet Nam News បានរាយការណ៍មកកាលពីថ្ងៃទី១ខែមិថុនាកន្លងមកថា អាស៊ីអាគ្នេយ៍ ជាពិសេសប្រទេសវៀតណាមនឹងមើលឃើញមានខ្សែសង្វាក់ផ្គត់ផ្គង់កាន់តែច្រើនប្តូរទីតាំងទៅប្រសិនបើមានការធ្វើឲ្យបច្ចេកវិទ្យានិងសមត្ថភាពផលិត និងកិច្ចសហប្រតិបត្តិការក្នុងតំបន់កាន់តែប្រសើរឡើង។
យោងទៅតាមធនាគារ HSBC បានឲ្យដឹងថា ខ្សែសង្វាក់ផ្គត់ផ្គង់កំពុងតែប្តូរទីតាំងទៅកាន់តំបន់អាស៊ីអាគ្នេយ៍ព្រោះតែការលូតលាស់សេដ្ឋកិច្ច និងទីផ្សារក្នុងតំបន់ ជាពិសេសព្រោះជម្លោះពាណិជ្ជកម្ម និងកំណើនការចំណាយក្នុងការផលិតកំពុងតែប៉ះពាល់ដល់ទីផ្សារដទៃ។
លោក Pham Hong Hai ដែលជានាយកប្រតិបត្តិរបស់ធនាគារ HSBC Viet Nam បាននិយាយថា “ការផ្លាស់ប្តូរនៃការធ្វើពាណិជ្ជកម្មពិភពលោកកំពុងតែបង្កឲ្យអាជីវកម្មត្រួតពិនិត្យការវិនិយោគលើខ្សែសង្វាក់ផ្គត់ផ្គង់ និងយុទ្ធសាស្ត្រសមត្ថភាពផលិតកម្មសាជាថ្មី ប៉ុន្តែពួកយើងមិនទាន់មើលឃើញការផ្លាស់ប្តូរធំមកកាន់អាស៊ីអាគ្នេយ៍ អាស៊ីខាងត្បូង និងផ្នែកដទៃនៃពិភពលោកទេ”។
លោក Hai បានបន្តថា “ការផ្លាស់ប្តូរនៃខ្សែសង្វាក់ផ្គត់ផ្គង់គឺជានិន្នាការដែលកើតមានឡើងជាច្រើនឆ្នាំមកហើយព្រោះតែបម្លាស់ប្តូររចនាសម្ព័ន្ធនៃបច្ចេកវិទ្យាក្នុងការផលិត ការចំណាយផ្នែកពលកម្ម និងទីផ្សារថ្មីៗ។ ក្នុងកំឡុងពេល១០ឆ្នាំមកនេះ អាស៊ាន និងវៀតណាមត្រូវបានចាត់ទុកជាជម្រើសទីតាំងផលិតកម្មដ៏ទាក់ទាញសម្រាប់ក្រុមហ៊ុនពហុជាតិ…”។
ប្រទេសដែលមានបណ្តាញហេដ្ឋារចនាសម្ព័ន្ធនិងផលិតកម្មស្រាប់ដូចជាវៀតណាមនឹងក្លាយជាប្រទេសដែលទទួលបានអត្ថប្រយោជន៍ច្រើនជាងគេនៃការផ្លាស់ប្តូរនេះ។ កត្តាដែលសំខាន់សម្រាប់ក្រុមហ៊ុនតូចនិងធំរួមមានថាតើអាស៊ាន និងវៀតណាមអាចផ្តល់ការចំណាយផលិតកម្មដែលមានភាពប្រកួតប្រជែងឬទេ ហើយតើបច្ចេកវិទ្យា និងការបង្កើតថ្មីកំពុងតែជំរុញដល់ប្រសិទ្ធិភាពក្នុងការផលិតទេ។
រដ្ឋាភិបាលនឹងត្រូវអប់រំដល់ក្រុមហ៊ុយអន្តរជាតិពីក្របខណ្ឌច្បាប់ អត្ថប្រយោជន៍ពន្ធ និងតំបន់ពាណិជ្ជកម្មសេរី ព្រមទាំងអភិវឌ្ឍន៍កំពង់ផែ និងផ្លូវរថភ្លើងព្រមទាំងហេដ្ឋារចនាសម្ព័ន្ធសម្រាប់ដឹកជញ្ជូនដទៃជាដើម។ រដ្ឋាភិបាលអាស៊ានក៏ត្រូវតែបង្ហាញពីផ្លូវសម្រាប់ការផ្តួចផ្តើមរយៈពេលវែងក្នុងការលុបបំបាត់ឧបសគ្គមិនមែនពន្ធទាក់ទិននឹងលំហូរផលិតផលក្នុងតំបន់អាស៊ានដែរ ព្រមទាំងអភិវឌ្ឍន៍ពលករមានជំនាញ និងការពារសិទ្ធិកម្មសិទ្ធិបញ្ញាជាដើម។ (កែសម្រួលដោយ ៖ បុប្ផា)
ចែករំលែកព័តមាននេះ