ប្រទេសឥណ្ឌា ៖ យោងតាមភ្នាក់ងារសារព័ត៌មាន Reuters កាលពីថ្ងៃសៅរ៍កន្លងមកបានឲ្យដឹងថា រដ្ឋាភិបាលឥណ្ឌាបាននិយាយថាពួកគេនឹងបន្តព្យាយាមស្ថាបនាទំនាក់ទំនងសេដ្ឋកិច្ចរឹងមាំជាមួយនឹងសហរដ្ឋអាមេរិកបើទោះជាលោកប្រធានាធិបតីដូណាល់ត្រាំ (Donald Trump) បានសម្រេចចិត្តបញ្ចប់ការផ្តល់អត្ថប្រយោជន៍ពាណិជ្ជកម្មដល់ឥណ្ឌាចាប់ពីថ្ងៃទី ៥ខែមិថុនាខាងមុខពិតមែន។
មន្ត្រីរដ្ឋាភិបាលឥណ្ឌាធ្លាប់បាននិយាយថា ប្រទេសឥណ្ឌាអាចនឹងបង្កើនពន្ធលើផលិតផលនាំចូលពីសហរដ្ឋអាមេរិកប្រមាណ២០មុខប្រសិនបើលោកប្រធានាធិបតីត្រាំដកឥណ្ឌាចេញពីបញ្ជីប្រទេសដែលទទួលបានអត្ថប្រយោជន៍ពាណិជ្ជកម្មពីសហរដ្ឋអាមេរិក។
រដ្ឋាភិបាលឥណ្ឌាបាននិយាយក្នុងសេចក្តី ថ្លែងការណ៍មួយដែលបានចេញដោយក្រសួង ពាណិជ្ជកម្មថា “ដូចសហរដ្ឋអាមេរិកនិងប្រទេសដទៃដែរ ប្រទេសឥណ្ឌានឹងរក្សាអត្ថប្រយោជន៍ជាតិក្នុងបញ្ហាទាំងនេះ”។
អត្ថប្រយោជន៍ទាំងនេះត្រូវបានផ្តល់ទៅឥណ្ឌាតាមរយៈប្រព័ន្ធអនុគ្រោះពន្ធ (GSP) របស់សហរដ្ឋអាមេរិកដែលអនុញ្ញាតឲ្យមានការនាំចូលផលិតផលឥណ្ឌាប្រមាណ៥.៦ប៊ីលានដុល្លារដោយមិនជាប់ពន្ធក្នុងមួយឆ្នាំ។ ឥណ្ឌាគឺជាប្រទេសដែលទទួលបានអត្ថប្រយោជន៍ពីកម្មវិធីនេះច្រើនជាងគេ។
រដ្ឋាភិបាលឥណ្ឌាបានបន្តថាពួកគេគិតថាបញ្ហានេះជាផ្នែកមួយនៃទំនាក់ទំនងសេដ្ឋកិច្ចជាមួយនឹងសហរដ្ឋអាមេរិក ហើយពួកគេនឹងបន្តស្ថាបនាទំនាក់ទំនងជាមួយនឹងសហរដ្ឋអាមេរិកទាំងផ្នែកសេដ្ឋកិច្ចនិងរវាងប្រជាជន។ ពួកគេបានបន្ថែមថា ពួកគេជឿជាក់ថាប្រទេសទាំងពីរនឹងបន្តសហការគ្នាយ៉ាងដិតដល់ដើម្បីពង្រឹងទំនាក់ទំនងទាំងនេះ។ សហរដ្ឋអាមេរិកបានពន្យាពេលធ្វើការសម្រេចចិត្តក្នុងការលុបបំបាត់អត្ថប្រយោជន៍ទាំងនេះសម្រាប់ឥណ្ឌារហូតដល់ថ្ងៃទី ២៣ខែឧសភាកន្លងមកនេះ។
សហរដ្ឋអាមេរិកមិនពេញចិត្តនឹងការដែលប្រទេសឥណ្ឌារឹតបន្តឹងច្បាប់ដែលប៉ះពាល់ដល់ក្រុមហ៊ុនអាមេរិកធំៗ និងជួយដល់ក្រុមហ៊ុនក្នុងស្រុក។ ជាពិសេសគឺការរឹតបន្តឹងច្បាប់ស្តីពីការធ្វើពាណិជ្ជកម្មលើប្រព័ន្ធអេឡិចត្រូណិចដែលបានប៉ះពាល់ដល់ក្រុមហ៊ុន Amazon និង Walmart របស់សហរដ្ឋអាមេរិកជាដើម៕ (កែសម្រួលដោយ ៖ បុប្ផា)
ចែករំលែកព័តមាននេះ