រាជធានីភ្នំពេញ ៖តារាចម្រៀង និងសម្តែងអ្នកនាងឡាយ លក្ខិណា បានសម្រេចចិត្តវិលចូលពិភពសិល្បៈវិញប្រមាណជិត២ឆ្នាំចុងក្រោយនេះ ទទួលបានការងារពីផលិតករ និងអ្នកដឹកនាំកម្មវិធីសិល្បៈនានាជាបន្តបន្ទាប់ ។ មិនតែប៉ុណ្ណោះមានការចាប់អារម្មណ៍ពីសម្រស់របស់នាង ដែលនៅតែស្រស់ផូរផង់គាប់ភ្នែក ថ្វីបើមានវ័យច្រើនបន្តិចហើយក្តី ។ តើអ្នកនាងលក្ខិណា មានវិធីសាស្ត្របែបណាក្នុងការថែរក្សាសម្រស់របស់ខ្លួន ?
អ្នកនាងឡាយ លក្ខិណា ឲ្យដឹងថា«យ៉ាងណាក៏មើលឃើញថាសម្រស់តារា ប្អូនៗជំនាន់ក្រោយគឺមានភាពស្រស់ស្អាតមួយបែបម្នាក់តាមជំនាន់។ ក្នុងជំនាន់នាងខ្ញុំភាគច្រើនស្អាតពីធម្មជាតិ គ្រាន់តែយើងប្រើផលិតផលណាឲ្យត្រូវស្បែកមុខស្បែកខ្លួននោះល្អ ។ ណាមួយផលិតករឬអ្នកដឹកនាំនៅពេលជ្រើសរើសតារាណាគាត់មើលម៉ត់ចត់ណាស់ឲ្យសមតាមមុខមាត់សម្រស់បែបខ្មែរ ។
មកដល់បច្ចុប្បន្នការកែកុនសម្រស់គឺជាកត្តាសំខាន់ហើយ នាងខ្ញុំមិនមានការយល់ឃើញថាកែកុនមិនល្អ ឬល្អបែបណាអាស្រ័យលើការពេញចិត្ត គ្រាន់តែត្រូវជ្រើសរើសគ្លីនិកណាដែលល្អមានជំនាញអាចទុកចិត្ត។ ជាពិសេសបើចង់នៅក្មេងកុំកើតទុក្ខច្រើនពេក បើមានបញ្ហាកុំផ្តេកផ្តួលរកអ្នកជួយជាគំនិតយោបល់ ហើយហាត់ប្រាណ ញ៉ាំអាហារដែលជួយសម្រស់ ។
ចំពោះ ប្អូនៗជំនាន់ក្រោយប្រសិនបើកំពុងមានទីផ្សារ គួរយើងចាប់ឱកាសបង្កើតមុខរបរឬឆ្លៀតសន្សំលុយទុកឲ្យច្រើនកុំខ្ជះខ្ជាយ ហើយទុកដាក់ស្រណុកគិតគូរទៅថ្ងៃក្រោយក្រែងអាចបង្កើតអាជីពថ្មីចាយទុនខ្លួនឯង »។ អ្នកនាងឡាយ លក្ខិណា នៅតែស្រស់ផូរផង់បែបនេះ នាងនិយាយបញ្ជាក់ថាខ្ញុំមិនមានកែកុនត្រង់ចំណុចណាមួយទេ គឺលក្ខណៈធម្មជាតិសុទ្ធសាធ »។
ចំពោះរឿងស្នេហា អ្នកនាងឡាយ លក្ខិណា ឲ្យដឹងថាកំពុងមើលចិត្តបុរសម្នាក់ តែសុំមិនទាន់បញ្ចេញអត្តសញ្ញាណទេ រង់ចាំលទ្ឋផលល្អប្រសើរជាងនេះនឹងបង្ហាញជូនមហាជន ។ អនុស្សាវរីយ៍កាលគ្រាកន្លងមក ឡាយ លក្ខិណា ចូលប្រឡូកសិល្បៈតាំងពីឆ្នាំ១៩៩៣ ដែលកាលណោះនាងចូលរួមប្រឡងក្នុងកម្មវិធីប្រឡងចម្រៀងកុមារនៅស្ថានីយទូរទស្សន៍ជាតិ ។ នាងបានជាប់ចំណាត់ថ្នាក់លេខ២ ដោយពេលនោះនាងទើបតែអាយុ១៣ឆ្នាំប៉ុណ្ណោះ ។
ក្រោយមកអ្នកនាងឡាយ លក្ខិណា បានចូលរួមសម្តែងភាពយន្ដរឿង«កាកី៩៥»របស់លោកហ្វៃ សំអាង និងបានសម្តែងចម្រៀងកាយវិការជាច្រើនបទ ។ អ្នកនាងឡាយ លក្ខិណា កេរ្តិ៍ឈ្មោះលូតឡើងខ្លាំងក្នុងអំឡុងឆ្នាំ២០០០ ហើយត្រូវបានចាត់ទុកជាស្រីស្អាតក្នុងចំណោមស្រីស្អាតទាំងបួនគឺស្រី តូចចំណាន ពេជ្រ ច័ន្ទបូរមី សៀម ស្រីណុច និងរូបនាង ។ អ្នកនាងឡាយ លក្ខិណា ត្រូវបានលោក ទិត្យ ថាវរិទ្ធ ជ្រើសរើសឲ្យធ្វើជាពិធីការនីនៅក្នុងកម្មវិធីនាទីចុងក្រោយ របស់ស្ថានីយទូរទស្សន៍ ជាតិធ្វើឲ្យនាងកាន់តែមានកេរ្តិ៍ឈ្មោះល្បីមួយកម្រិតទៀត ។
ឡាយ លក្ខិណា បានដកខ្លួនចេញពីពិភពសិល្បៈនៅក្នុងឆ្នាំ២០០៥ ដោយសារមមាញឹកក្នុងមុខរបររកស៊ី ។ រយៈពេលច្រើនឆ្នាំក្រោយមកដោយសារតែមានការជំរុញពីមិត្តសិល្បៈ រួមផ្សំនឹងចិត្តមិនដាច់អាល័យពីសិល្បៈផង នាងក៏ត្រឡប់មកចាប់អាជីពវិញ ។ ពេលនេះនាងបានតាំងចិត្តចូលប្រឡូកឲ្យបានសកម្មដូចមុន ៕ (កែសម្រួលដោយ ៖ បុប្ផា)
ចែករំលែកព័តមាននេះ