រាជធានីភ្នំពេញ ៖ តំណាងស្ថានទូតរបស់ម៉ាឡេស៊ីប្រចាំនៅកម្ពុជាបានលើកឡើងថាក្នុងរយៈពេលជាង ២៤ ឆ្នាំកន្លងទៅនេះ ពោលចាប់តាំងពីឆ្នា ១៩៩៤ រហូតដល់ឆ្នាំ ២០១៨ គម្រោងវិនិយោគរបស់ម៉ាឡេស៊ីនៅកម្ពុជាមានចំនួន១៣៧គម្រោង ដែលមានទឹកប្រាក់វិនិយោគសរុបចំនួន២,៧ពាន់លានដុល្លារអាមេរិក ហើយអគ្គរដ្ឋទូតថ្មីរបស់ម៉ាឡេស៊ី ប្រចាំកម្ពុជា ប្ដេជ្ញាថាខ្លួននឹងដណ្ដើមចំណាត់ថ្នាក់ជាអ្នកវិនិយោគកំពូលនៅកម្ពុជាឡើងវិញ ខណៈកាលពីឆ្នាំ ២០០៦ ប្រទេសនេះបានជាប់ចំណាត់កំពូលម្ដងរួចមកហើយនោះ ។
ប្រាកដណាស់រយៈពេលប៉ុន្មានឆ្នាំចុងក្រោយនេះកម្ពុជាទទួលបាននូវកំណើននៃវិនិយោគផ្ទាល់ពីបរទេសចូលមកកម្ពុជា ជាក់ស្តែងក្នុងឆ្នាំ២០១៨ កន្លងទៅគឺមានកំណើន ១០% ធៀបនឹងឆ្នាំ២០១៧ ពោលមានទំហំជាង ៣,០ ប៊ីលានដុល្លារអាមេរិក ដែលត្រូវបានបង្ហូរចូលទៅក្នុងវិស័យហិរញ្ញវត្ថុ ទូរគមនាគមន៍ អចលទ្រព្យ និងទំនិញកម្មន្តសាលមិនមែនវាយនភ័ណ្ឌ ដែលក្នុងនោះថ្នាក់ដឹកនាំរាជរដ្ឋាភិបាលកម្ពុជាបានចាត់ទុក «ការវិនិយោគផ្ទាល់ពីបរទេសចូលមកកម្ពុជា គឺជាកត្តាគន្លឹះមួយ ជួយដល់ការអភិវឌ្ឍសេដ្ឋកិច្ចជាតិ និងសម្រេចនូវគោលដៅអភិវឌ្ឍន៍របស់ខ្លួនផងដែរ» ។
យ៉ាងណាមិញ ក្នុងបទសម្ភាសន៍ជាមួយអ្នកសារព័ត៌មានកោះសន្តិភាពកាលពីពេលថ្មីៗនេះ លោក Eldeen Husaini Mohd Hashim ឯកអគ្គរដ្ឋទូតម៉ាឡេស៊ីប្រចាំព្រះរាជាណាចក្រកម្ពុជា បានមានប្រសាសន៍ថា នៅក្នុងអាណត្តិរបស់លោកជាទូតសុឆន្ទៈ ប្រចាំកម្ពុជាលោក «នឹងធ្វើយ៉ាងណាឱ្យវិនិយោគិនម៉ាឡេស៊ីមកវិនិយោគនៅកម្ពុជាឱ្យបានកាន់តែច្រើនទៅតាមវិស័យផ្សេងៗ ក្នុងនោះលោកបានមើលឃើញពីវិស័យមួយចំនួន ដែលមានសក្ដានុពលវិនិយោគ ដូចជាវិស័យសំណង់និងអចលនទ្រព្យ ដែលវិនិយោគម៉ាឡេស៊ីគួរបណ្ដាក់ទុនវិនិយោគ ជាក់ស្ដែងតម្រូវការលំនៅឋាននៅកម្ពុជាកាន់តែច្រើន ជាពិសេសផ្ដោតលើលំនៅឋានតម្លៃសមរម្យហើយលោកគិតថាវិនិយោគិនម៉ាឡេស៊ី អាចមានលទ្ធភាពក្នុងការដាក់ទុនវិនិយោគច្រើន» ។
លោក Eldeen Husaini Mohd Hashim បានមានប្រសាសន៍បន្តទៀតថា ក្រៅពីវិស័យ សំណង់ និងអចលនទ្រព្យ កម្ពុជាក៏មានសក្ដានុពលវិនិយោគលើវិស័យកសិកម្មផងដែរ ដែលជាវិស័យមួយអាចឱ្យវិនិយោគិនម៉ាឡេស៊ីដាក់ទុនវិនិយោគដើម្បីនាំចេញ ជាក់ស្ដែងវិស័យស្រូវអង្ករ ជាវិស័យមួយដែលវិនិយោគិនម៉ាឡេស៊ីគួរដាក់ទុន ផលិតស្រូវនិងនាំចេញទៅកាន់ប្រទេសម៉ាឡេស៊ីដោយផ្ទាល់តែម្ដង ។ លោកឯកអគ្គរដ្ឋទូត បានមានប្រសាសន៍បន្តថា «បើតាមការសិក្សាស្ថានដីកម្ពុជាឃើញថាមានភាពល្អប្រសើរ និង អាចដាំដុះដំណាំសរីរាង្គបានច្រើនសម្រាប់នាំចេញទៅកាន់ទីផ្សារអន្តរជាតិ» ។ លោកបានបន្តទៀតថា ទន្ទឹមនឹងការនាំវិនិយោគិនម៉ាឡេស៊ីមកកាន់ប្រទេសកម្ពុជាហើយនោះ ក្នុងអាណត្តិលោកជាទូតនៅកម្ពុជា លោកនឹងផ្សព្វផ្សាយពីសក្ដានុពលវិនិយោគម៉ាឡេស៊ីដល់វិនិយោគិនកម្ពុជាវិញ ដើម្បីអោយវិនិយោគិនកម្ពុជា អាចដាក់ទុនវិនិយោគនៅប្រទេសម៉ាឡេស៊ី ហើយវិស័យដែលវិនិយោគិនខ្មែរ អាចដាក់ទុនវិនិយោគនៅម៉ាឡេស៊ីបាននោះ គឺវិស័យកសិកម្មដូចគ្នាដែរ ដែលមានបន្លែនិងផ្លែឈើ ពីព្រោះបន្លែនិងផ្លែឈើដែលដាំដុះនៅក្នុងប្រទេសម៉ាឡេស៊ី ភាគច្រើនជាបន្លែនិងផ្លែឈើសរីរាង្គ ដូច្នេះ វិនិយោគិនខ្មែរអាចវិនិយោគដាំដុះនៅម៉ាឡេស៊ី ហើយនាំមកកម្ពុជាវិញ បានដូចគ្នាដែរ ។
លោកបានបន្ថែមថា «ដើម្បីរឹតចំណងមិត្តភាពរវាងប្រទេសកម្ពុជា ម៉ាឡេស៊ី នឹងរឹតចំណងខាងវិស័យយោធាបន្ថែមទៀតផងដែរ ខណៈវិស័យនេះ ប្រទេសទាំងពីរហាក់នៅមានកម្រិតនៅឡើយ» ។
យោងតាមបាយការណ៍របស់ស្ថានទូតម៉ាឡេស៊ីប្រចាំកម្ពុជា បានអោយដឹងផងដែរថា កម្ពុជា គឺជាប្រទេសទីផ្សារសំខាន់ផងដែរ ក្នុងវិស័យទេសចរណ៍របស់ម៉ាឡេស៊ី ក្នុងនោះកាលពីឆ្នាំ ២០១៨កន្លងទៅទេសចរកម្ពុជាប្រមាណជាង៩ម៉ឺននាក់ បានទៅទស្សនានៅប្រទេសម៉ាឡេស៊ី ដែលមានកំណើនរហូតដល់ ១១៤,៥ ភាគរយ ហើយទេសចរម៉ាឡេស៊ីវិញ ក៏បានមកទស្សនានៅកម្ពុជាមានចំនួនជាង២០ម៉ឺននាក់ផងដែរ មានកំណើន១២,២ភាគរយធៀបនឹងឆ្នាំ ២០១៧ ។
ដោយឡែកក្នុងរយៈ១ត្រីមាសដំបូងក្នុងឆ្នាំ ២០១៩នេះ កំណើនភ្ញៀវទេសចរកម្ពុជាទៅទស្សនានៅម៉ាឡេស៊ី ក៏មានប្រមាណ២៨,៤ភាគរយផងដែរ ខណៈក្នុងឆ្នាំ ២០១៩ទាំងមូល ម៉ាឡេស៊ីកំណត់គោលដៅ ទាក់ទាញទេសចរកម្ពុជាអោយបាន១០ម៉ឺន៩០០នាក់ទៅទស្សនានៅតំបន់ទេសចរណ៍សំខាន់ៗរបស់ខ្លួន និង១១ម៉ឺននាក់នៅក្នុងឆ្នាំ ២០២០ខាងមុខ ។ បច្ចុប្បន្ននេះ ម៉ាឡេស៊ី មានជើង ហោះហើរត្រង់មកកម្ពុជានិងពីកម្ពុជាទៅម៉ាឡេស៊ីវិញ ចំនួន៦ជើងក្នុងមួយថ្ងៃ តាមរយៈក្រុមហ៊ុន Malaysia Airline , AirAsia Airline និងក្រុមហ៊ុនអាកាសចរណ៍ Malindo Air ៕កែសម្រួលដោយ ៖សុឃាក់
ចែករំលែកព័តមាននេះ