បេកាំង៖ យោងតាមភ្នាក់ងារសារព័ត៌មាន Bangkok Post កាលពីថ្ងៃទី១ មិថុនា កន្លងមកបានឲ្យដឹងថា ប្រទេសចិនបានបង្កើនពន្ធជាផ្លូវការលើផលិតផលនាំចូលពីសហរដ្ឋអាមេរិកប្រមាណ៦០ប៊ីលានដុល្លារ ខណៈដែលពួកគេត្រៀមខ្លួនចេញបញ្ជីខ្មៅដែលមានឈ្មោះក្រុមហ៊ុនបរទេសដែលមិនគួរឲ្យជឿជាក់ដែលអ្នកវិភាគនិយាយថាមានគោលដៅដាក់ទណ្ឌកម្មលើសហរដ្ឋអាមេរិក និងក្រុមហ៊ុនបរទេសដែលឈប់ផ្គត់ផ្គង់ផលិតផលដល់ក្រុមហ៊ុន Huawei ។
ពន្ធថ្មីនេះមានអត្រាពី ៥ទៅ២៥% និងត្រូវបានប្រកាសដើម្បីឆ្លើយតបនឹងការសម្រេចចិត្តរបស់សហរដ្ឋអាមេរិកដែលបានតម្លើងពន្ធពី៥%ទៅ ២៥% លើផលិតផលចិនប្រមាណ២០០ប៊ីលានដុល្លារ ។ សហរដ្ឋអាមេរិកនិងប្រទេសចិនបានបន្តជម្លោះពាណិជ្ជកម្មរបស់ពួកគេសាជាថ្មីកាលពីខែមុនពេលដែលការចរចាក្នុងសហរដ្ឋអាមេរិកត្រូវបានបញ្ចប់ដោយមិនអាចសម្រេចបានកិច្ចព្រមព្រៀង ។
ភាពតានតឹងបានកើនឡើងក្នុងកំឡុងពេលប៉ុន្មានសប្តាហ៍កន្លងមកនេះបន្ទាប់ពីសហរដ្ឋអាមេរិកសម្រេចដាក់ Huawei ក្នុងបញ្ជីខ្មៅដែលរឹតបន្តឹងការធ្វើអាជីវកម្មរបស់ក្រុមហ៊ុននេះជាមួយនេងក្រុមហ៊ុនអាមេរិក ។ ដើម្បីឆ្លើយតប ក្រសួងពាណិជ្ជកម្មចិនបាននិយាយកាលពីថ្ងៃសុក្រថាពួកគេនឹងចេញបញ្ជីខ្មៅមួយដែរដែលមានឈ្មោះបុគ្គលដែលមិនអាចទុកចិត្តបានដែលលុបបំបាត់កិច្ចសន្យាពាណិជ្ជកម្ម និងឈប់ផ្គត់ផ្គង់ដល់ក្រុមហ៊ុនចិន ។
លោក Andrew Polk ដែលជាសេដ្ឋវិទូមួយរូបមកពី Trivium China បាននិយាយថា វាមានគោលដៅលើក្រុមហ៊ុនផ្គត់ផ្គង់ដល់ Huawei ដូចជា Intel, Qualcomm, ARM ជាដើម ដូច្នេះក្រុមហ៊ុនអ៊ឺរ៉ុប កូរ៉េខាងត្បូអ និងជប៉ុនប្រហែលជាត្រូវតែពិចារណាសាជាថ្មីពីការអនុវត្តការសម្រេចចិត្តរបស់សហរដ្ឋអាមេរិកឬទេ ។ លោកបានបន្ថែមថា ប្រទេសចិនចង់ធ្វើឲ្យការកាត់ផ្តាច់ទំនាក់ទំនងអាជីវកម្មជាមួយនឹង Huawei ក្លាយជាជម្រើសដ៏ពិបាកមួយ ។
សារព័ត៌មានក្នុងស្រុក Global Times បាននិយាយថាបញ្ជីខ្មៅថ្មីនឹងក្លាយជាឧបសគ្គការពារក្រុមហ៊ុនចិន។ ប៉ុន្តែអតីតមន្ត្រីរដ្ឋាភិបាលចិនបានព្រមានកាលពីថ្ងៃសុក្រថាសង្គ្រាមពាណិជ្ជកម្មអាចនឹងបន្តកើតមានឡើងរាប់ទសវត្សទៀត ៕
កែសម្រួលដោយ ៖ សំណាង
ចែករំលែកព័តមាននេះ