អ្នកមានធម៌រមែងមានឥស្សរភាពលើកិលេសនិងអាសវៈទាំងពួង និងជាអ្នកមានសុខភាពផ្លូវចិត្តល្អ ព្រោះមិននឹកស្តាយរឿងរ៉ាវក្នុងអតីតកាលតាមជាប់ខ្លួន និងមិនរំពឹងគិតទៅដល់អនាគត គឺមានជីវិតរស់នៅតែជាមួយនឹងខណៈពេលបច្ចុប្បន្នតែម្យ៉ាងគត់ ។
បើតាមផ្លូវព្រះពុទ្ធសាសនា អ្នកស្គាល់ធម៌អាថ៌មិនថាអ្នកបួសឬគ្រហស្ថរមែងមើលឃើញនូវអាថ៌កំបាំងរបស់ធម្មជាតិ ហើយរីករាយជាមួយសភាវៈទាំងឡាយដោយចិត្តដ៏បរិសុទ្ធ ប្រាសចាកនូវគំនិតថា អញ អ្វីៗជារបស់អញ របស់យើង របស់ពួកយើង ជាអ្នករីករាយជាមួយជីវិតដ៏ផូរផង់ ជាអ្នកសង្រួមឥន្ទ្រិយល្អហើយ មានតែសេចក្តីស្ងប់ចិត្ត មិនមាននូវការខ្វាយខ្វល់រឿងលាភសក្ការៈអ្វីឡើយ ។
នៅពេលចិត្តមិនមានសេចក្តីលោភ សេចក្តីក្រោធ និងសេចក្តីវង្វេង ជាអ្នកមិនប្រកាន់ខ្លួន មិនចេះមោះហ្មងក្នុងអារម្មណ៍ដូច្នេះហើយ ក៏រមែងជាអ្នករស់នៅដោយចិត្តបរិសុទ្ធ និងបានជាទីស្រឡាញ់នៃអ្នកផងទាំងពួងគ្រប់ទិសទី ព្រោះតែអំណាចនៃចិត្តមេត្តា ករុណា មានការយល់ចិត្ត យល់ថ្លើមអ្នកដទៃ និងមានចិត្តទូលាយជួយអ្នកដទៃដោយភក្តីភាពមិនគិតពីផលប្រយោជន៍នោះ ។
ចែករំលែកព័តមាននេះ