ខេត្តកណ្ដាល ៖ ករណីផ្ទុះអាវុធជាច្រើនគ្រាប់បង្កអោយមានការភ្ញាក់ផ្អើលទាំងកណ្តាលយប់និងធ្វើអោយនារីៗដែលបម្រើការងារនៅក្នុងខារ៉ាអូខេប៊ីហ្គោលនោះបានរត់បាតជើងសព្រាតដោយព្រលឹងចុងសក់ មិនតែប៉ុណ្ណោះធ្វើអោយអ្នកបើករថយន្តកុងតឺន័រភ័យលួសព្រលឹងដោយសារគ្រាប់កាំភ្លើងហោះផ្លោងទៅចំកញ្ចក់រថយន្ត ដែលកំពុងធ្វើដំណើរនៅមុខទីតាំងនោះ ។
មិនបានប៉ុន្មានម៉ោងផង លោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាលដឹកនាំកម្លាំងចុះទៅទីតាំងនោះបានកំណត់មុខសញ្ញាបានហើយខ្មាន់កាំភ្លើងនោះមានឈ្មោះសាន សុច ភេទប្រុស អាយុ៣៨ឆ្នាំ មុខរបរយោធា មានទីលំនៅភូមិព្រែកហូរលិច សង្កាត់ព្រែកហូរ ក្រុងតាខ្មៅ ខេត្តកណ្តាល ។ ហេតុការណ៍បង្កអោយមានការភ្ញាក់ផ្អើលនេះបានកើតឡើងនៅវេលាម៉ោង២០និង៣០នាទីថ្ងៃទី០២ ខែមិថុនា ឆ្នាំ២០១៩ នៅចំណុចហាងខារ៉ាអូខេ B-Gold ភូមិព្រែករាំង សង្កាត់កំពង់សំណាញ់ ក្រុងតាខ្មៅ ខេត្តកណ្តាល ។
លោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាលបានអោយដឹងថា ខ្មាន់កាំភ្លើងបន្ទាប់ពីធ្វើការបាញ់ហើយបានបន្សល់ទុកមានស្រោមកាំភ្លើងពណ៌ខ្មៅចំនួន០១ សោម៉ូតូ១ចង្កោម (កូនសោម៉ូតូ១ កូនសោរថយន្ត១ តេឡេរថយន្ត១) គ្រាប់កាំភ្លើងខ្លីម៉ាកឡុក ចំនួន០៤ បាញ់ផ្ទុះអស់៣គ្រាប់ (លេខA-USA 9MM-LUGER) ។
បន្ទាប់មកជនសង្ស័យបានជិះម៉ូតូ១គ្រឿងម៉ាកហុងដា C125 ពណ៌ខ្មៅ សេរី២០១៩ ចូលផឹកស៊ីច្រៀងខារ៉ាអូខេ នៅហាង B Gold បន្ទប់លេខ 888 ជាមួយមិត្តភក្តិ ប្រុស០២នាក់ទៀតមិនស្គាល់ឈ្មោះ ។ រួចមកក៏បានឈ្លោះប្រកែកគ្នា ហើយគេឃើញជនសង្ស័យដើរចេញមកក្រៅហាងចាក់កែបម៉ូតូយកកាំភ្លើងខ្លីម៉ាកឡុកពណ៌ខ្មៅ យកដើរចូលទៅបាញ់ក្នុងហាងបាញ់ចំនួន០៤គ្រាប់ ហើយផ្ទុះ០៣គ្រាប់ ហើយស្រែកថា «អញឈ្មោះ អាសុច អាណាខ្លាំងចេញមក អញបាញ់ឲ្យងាប់!!» រួចហើយជិះម៉ូតូតាមផ្លូវ១១៥ ទៅទិសខាងលិចរួចបាញ់ឡើងលើ០១គ្រាប់ទៀត តែមិនបណ្តាលអោយមានអ្នករបួសហើយគេចខ្លួនបាត់ទៅ ។
លោកស្នងការបានអោយដឹងទៀតថា លោកបានបញ្ជាអោយតាមចាប់ខ្លួនយោធានោះមកហើយ ដើម្បីធ្វើការសាកសួរចាត់ការទៅតាមនីតិវិធីច្បាប់ ៕ កែសម្រួលដោយ ៖សុឃាក់
ចែករំលែកព័តមាននេះ