សហរដ្ឋអាមេរិក-ចិន ៖ ប្រទេសចិនកាលពីថ្ងៃទី២មិថុនា បានបន្តឹងសំឡេងថែមទៀតក្នុងសង្គ្រាមពាណិជ្ជកម្មជាមួយសហរដ្ឋអាមេរិក ដោយបដិសេធការទទួលខុសត្រូវលើបរាជ័យនៃការចរចា ហើយក៏ពុំមើលឃើញច្រកចេញនៃវិបត្តិក្នុងពេលខ្លីមួយដែរ។ ការគំរាមកំហែងរបស់អាមេរិកហ៊ុមព័ន្ធលោហធាតុមួយចំនួន បញ្ជូលក្នុងបញ្ជីខ្មៅបណ្ដាសហគ្រាសបរទេស ដំឡើងពន្ធនិងការប្រើវោហាសាសន៍នៃសង្គ្រាម ក្នុងរយៈពេលតែប៉ុន្មានថ្ងៃ…
សហរដ្ឋអាមេរិក-ចិន ៖ ប្រទេសចិនកាលពីថ្ងៃទី២មិថុនា បានបន្តឹងសំឡេងថែមទៀតក្នុងសង្គ្រាមពាណិជ្ជកម្មជាមួយសហរដ្ឋអាមេរិក ដោយបដិសេធការទទួលខុសត្រូវលើបរាជ័យនៃការចរចា ហើយក៏ពុំមើលឃើញច្រកចេញនៃវិបត្តិក្នុងពេលខ្លីមួយដែរ។
ការគំរាមកំហែងរបស់អាមេរិកហ៊ុមព័ន្ធលោហធាតុមួយចំនួន បញ្ជូលក្នុងបញ្ជីខ្មៅបណ្ដាសហគ្រាសបរទេស ដំឡើងពន្ធនិងការប្រើវោហាសាសន៍នៃសង្គ្រាម ក្នុងរយៈពេលតែប៉ុន្មានថ្ងៃ ក្រុងប៉េកាំងឈានយ៉ាងម៉ឺងម៉ាត់ទៅរកការវាយបកវិញ ជិត១ឆ្នាំក្រោយការចាប់ផ្ដើមការប្រឈមមុខដាក់គ្នាខាងសេដ្ឋកិច្ចជាមួយក្រុងវ៉ាស៊ិនតោន។
ដោយលើកពាក្យស្លោកនៃយុទ្ធនាការឃោសនាបោះឆ្នោត របស់លោកដូណាល់ត្រាំសម្រាប់ដណ្ដើមអាណត្តិទី២ អនុរដ្ឋមន្ត្រីព័ត៌មានចិន លោកGUO WEIMINថ្លែងនៅក្រុងប៉េកាំងថា សង្គ្រាមពាណិជ្ជកម្មនឹងមិនផ្ដល់អានុភាពសីុដាច់គេដល់អាមេរិក ដូចពាក្យស្លោករបស់លោកត្រាំឡើយ។
លោកដូណាល់ត្រាំកាលពីខែកក្កដាឆ្នាំ២០១៨បានប្រកាសពីការបង្កើនពន្ធគយលើបណ្ដាផលិតផលចិន ហើយចិនបានតបតវិញដោយដំឡើងពន្ធគយលើបណ្ដាផលិតអាមេរិកនាំចូលស្រុកខ្លួនដែរ។ លោកGUO WEIMINនិយាយថា ចាប់តាំងពីពេលនោះមកតម្លៃទំនិញនិងការចំណាយខាងផលិតកម្មមានការឡើងខ្ពស់នៅសហរដ្ឋអាមេរិក ហើយការនាំចេញរបស់ខ្លួនទៅកាន់ចិនមានការចុះថយ រួចកំណើនសេដ្ឋកិច្ចពិភពលោករងការគំរាមកំហែង។
ឯកសារមាន២១ទំព័រដែលនិយាយពីជំហររបស់ចិនត្រូវបានចេញផ្សាយបន្ទាប់ពីការចូលជាធរមាននៃពន្ធគយថ្មីមានទឹកប្រាក់សរុប៦០ពាន់លានដុល្លារ នៃផលិតផលអាមេរិកនាំចូលចិនក្នុងមួយឆ្នាំៗ ជាការឆ្លើយតបចំពោះបណ្ដាទណ្ឌកម្មចុងក្រោយរបស់អាមេរិក អនុវត្តចាប់ពីដើមខែឧសភាទៅ មានទឹកប្រាក់២០០ពាន់លានដុល្លារនៃបណ្ដាផលិតផលចិន។
ទន្ទឹមគ្នានេះដែរនៅឯសិង្ហបុរី រដ្ឋមន្ត្រីការបរទេសចិនអះអាងថា ចិននឹងឆ្លើយតបវិញចំពោះការវាយលុករបស់អាមេរិក។ រដ្ឋមន្ត្រីរូបនោះឧត្ដមសេនីយWEI FENGHE ក្នុងវេទិកាអន្តរជាតិស្ដីពីសន្តិសុខនៅសិង្ហ្បុរីអះអាងថា ប្រសិនបើអាមេរិកចង់និយាយគ្នានោះ យើងនឹងបើកទ្វារចំហ។ ប្រសិនបើគេចង់បានការប្រឈមមុខដាក់គ្នា នោះយើងត្រៀមខ្លួនតបតវិញ។ លោកថាអាមេរិកជាអ្នកទទួលខុសត្រូវលើបរាជ័យនៃការចរចា ព្រោះតែខ្លួនកែប្រែការទាមទារជាច្រើនលើក។ លោកថាលោកពុំទទួលបានព័ត៌មានលើលទ្ធភាពនៃការជួបគ្នាទ្វេភាគី រវាងលោកត្រាំនិងសមភាគីចិនលោកស៊ីជីនពីង នាដំណាច់ខែមិថុនានៅទីក្រុងតូក្យូ ខាងក្រៅកិច្ចប្រជុំកំពូលរបស់G20 ឡើយ។
ទន្ទឹមនឹងការប៉ះទង្គិចគ្នាខាងពាណិជ្ចកម្ម មហាយក្សទាំង២ក៏មានជម្លោះនឹងគ្នាខាងបច្ចេកវិទ្យាទៀត ដោយកាលពីខែមុនក្រុងវ៉ាសិុនតោន បានបញ្ចូលក្នុងបញ្ជីខ្មៅខ្លួន ក្រុមហ៊ុនតេឡេកូមយក្សចិនHUAWEI។ ចំណែកក្រុងប៉េកាំងបានឆ្លើយតបវិញ ដោយកាលពីថ្ងៃទី៣១ឧសភាប្រកាសពីការបង្កើតបញ្ជីខ្មៅមួយ នៃបណ្ដាសហគ្រាសបរទេសដែលរកសីុពុំត្រឹមត្រូវ។
ម្យ៉ាងទៀតចិនបានប្រកាសពីការបង្កើនពន្ធគយចាប់ពីថ្ងៃទី១មិថុនាទៅ ពី១០%ដល់២០% និងរហូតដល់២៥% លើទំនិញអាមេរិកទាំងអស់នាំចូលចិន ដែលយកពន្ធរួចហើយតំណាងឲ្យទឹកប្រាក់៦០ពាន់លានដុល្លារ នៃការនាំចូលប្រចាំឆ្នាំ។ ផលិតផលអាមេរិក៥៤១០មុខទាក់ទិននឹងការដំឡើងពន្ធបន្ថែមនោះ ក្នុងនោះ២៤៩៣មុខយកពន្ធ២៥%។ បណ្ដាផលិតផលទាំងនោះមានដូចជា ទឹកអប់ គ្រឿងតុបតែងកាយ របស់របរចង្ក្រានបាយ របស់របរកីឡា្ ឧបករណ៍ភ្លេង ស្រា ស្រោមអនាម័យ ពេជ្ញ រ៉ូបូឧស្សាហកម្ម សំបកកង់រថយន្ត ក្រណាត់ ឈើនិងរបស់របរក្មេងលេងជាដើម៕ (កែសម្រួលដោយ ៖ បុប្ផា)
ចែករំលែកព័តមាននេះ