រាជធានីភ្នំពេញ៖ អ្នកនាងយ៉ុង ចាន់កណ្និកា បានប្រកាសបញ្ចប់អាជីពចម្រៀង ខណៈនាងរយាលមួយរយៈពេលវែង ក្រោយចូលរោងការរយៈពេលប៉ុន្មានឆ្នាំមកនេះ ។ ការសម្រេចដើរចេញពីអាជីពចម្រៀងដែលបានជ្រោងនាងឲ្យមានកេរ្តិ៍ឈ្មោះនៅក្នុងវិថីសិល្បៈនេះស្របពេលគ្នានឹងអាជីពលក់គ្រឿងសម្អាងការតាមអនឡាញរបស់នាងកំពុងតែលូតលាស់ខ្លាំង ។
ការប្រកាសបញ្ចប់អាជីពចម្រៀងរបស់អ្នកនាងយ៉ុង ចាន់កណ្និកា នេះទំនងជាមិនចង់ឲ្យមានការប៉ះពាល់ទៅដល់ផ្នែករកស៊ីរបស់នាង ជាមួយសិល្បៈ ខណៈពេលដែលការផ្សាយលក់ឡេរបស់នាង ម្តងៗក៏មានការរិះគន់ខ្លាំងផងដែរទៅលើភាពសិចស៊ី ។
ក្នុងចំណោមតារាចម្រៀងស្រី យ៉ុង ចាន់កណ្និកា ត្រូវគេចាត់ទុកថា នាងគឺជាតារាចម្រៀងមួយដួងដែលនិយមចូលចិត្តលើកយកបទចម្រៀងពីដើមមកច្រៀងជាមួយនឹងសំឡេងដ៏ពីរោះ ។ នាងល្បីឈ្មោះខ្លាំង បន្ទាប់ពីច្រៀងបទ«វាចាស្រីឡង់សេ» ដែលនិពន្ធឡើងដោយលោកហ្វៃ សំអាង កាលពីប៉ុន្មានឆ្នាំកន្លងទៅ។ បន្ទាប់ពីនោះមកនាងបានក្តាប់ឱកាសទីផ្សារការងារបានយ៉ាងល្អ ដោយនាងបានបង្ហាញវត្តមានច្រៀងឲ្យផលិតកម្មក្នុងស្រុក និងក្រៅស្រុក ជាពិសេសនាងបានចេញមុខច្រៀងតាមឆាកតន្ត្រីនៅស្ថានីយទូរទស្សន៍នានាស្ទើរមិនដាច់រយៈ ។
យ៉ាងណាក្តីភាពលេចធ្លោនៅក្នុងអាជីពចម្រៀងរបស់នាងបានបាត់ទៅវិញ បន្តិចម្តងៗ ក្រោយពេលដែលនាងសម្រេចចិត្តចូលរោងការជាមួយបុរសដែលជាមន្ត្រីប៉ូលិស និងបច្ចុប្បន្ននាងទទួលបានចំណងដៃកូនស្រីម្នាក់ហើយដែរ ។
ក្រោយពីរៀបការមានកូនហើយនោះ យ៉ុង ចាន់កណ្និកា ហាក់មិនសូវជានឹកនាកាន់ក្បាលមេក្រូច្រៀងឡើងឡើយ ប៉ុន្តែនាងបានចេញមុខយ៉ាងផុសផុលតាមបណ្តាញសង្គមហ្វេសប៊ុក ក្នុងនាមជាអ្នកលក់ឡេមួយរូបទៅវិញ ។ ការផ្សព្វផ្សាយពីការលក់គ្រឿងសម្អាងរបស់នាងតាមហ្វេសប៊ុកមានក៏មានភាពល្បីល្បាញផងដែរ បន្ទាប់ពីនាងបានផ្លាស់ប្តូរឥរិយាបថរបស់នាងស្ទើរ១០០អង្សាសេ ដោយហ៊ានបញ្ចេញនូវភាពសិចស៊ីខ្លាំង ដែលនាងមិនដែលធ្លាប់ធ្វើពីមុនមក។
ការបញ្ចេញនូវភាពសិចស៊ីនេះ យ៉ុង ចាន់កណ្និកា ទទួលរងការរិះគន់ និងការប្រមាថពីមហាជនមួយចំនួនផងដែរ បើទោះបីជាការបង្ហាញទាំងនេះ គឺគ្រាន់ជាការឡង់សេដើម្បីលក់ផលិតផលសម្អាងការរបស់នាងក៏ដោយ ។ ពួកគេទាំងនោះបានចាត់ទុកការឡាយលក់ឡេដែលមានភាពសិចស៊ីរបស់ យ៉ុង ចាន់កណ្និកា ហាក់ជារឿងមួយមិនសមរម្យ ដ្បិតនាងជាតារាមួយរូបដែលធ្លាប់មានប្រជាប្រិយភាព ហើយនាងក៏មានស្វាមីដែលមានមុខមាត់ម្នាក់នៅក្នុងសង្គមផងនោះ ។ ទោះជាយ៉ាងណានាងហាក់មិនឈឺក្បាលវិលមុខចំពោះពាក្យរិះគន់ទាំងនោះឡើយ ដោយហេតុថា នេះគ្រាន់តែជាមុខរបររកស៊ីរបស់នាង ៕
ចែករំលែកព័តមាននេះ