ខេត្តត្បូងឃ្មុំ ៖ លំនៅឋានប្រជាពលរដ្ឋ១ខ្នងមានទំហំ១២គុណ២០ម៉ែត្រ ខាងលើឈើ ខាងក្រោមថ្ម ត្រូវព្រះអគ្គីលេបត្របាក់ខ្ទេច សល់តែជើងតាងធ្វើឱ្យបាត់បង់ប្រាក់សរុបខ្ទង់ម៉ឺនដុល្លារឯណោះ បង្កឱ្យមានការភ្ញាក់ផ្អើលកាលពីម៉ោង២រសៀល ថ្ងៃទី៣១ ឧសភា ២០១៩ ស្ថិតក្នុងភូមិសេរីសុខា ឃុំក្រែក ស្រុកពញាក្រែក។
បើតាមនគរបាលខេត្តត្បូងឃ្មុំប្រាប់ឲ្យដឹងថា លំនៅឋានរងគ្រោះខាងលើមានម្ចាស់ឈ្មោះ ធីម ញ៉ ភេទស្រី អាយុ៦៥ឆ្នាំ មានមុខរបរលក់ដូរ ។ ក្នុងពេលដែលមានភ្លើងឆេះតំបូងនោះកម្លាំងមូលរដ្ឋានបានរាយការណ៍មកលោកស្នងការនគរបាលខេត្ត ហើយកម្លាំងសមត្ថកិច្ចក៏ប្រញាប់ចេញមកជួយអន្តរាគមន៍ ក្រោយមកក៏ឃើញរថយន្តរបស់អធិការដ្ឋាននគរបាលស្រុកពញាក្រែកដែលនៅកៀកជាងគេបានមកដល់។
មន្ត្រីនគរបាលខេត្តប្រាប់បន្តថា បន្ទាប់មកគេឃើញរថយន្តរបស់នគរបាលក្រុងសួង មេមត់ តំបែរ ស្រុកត្បូងឃ្មុំ ស្នងការដ្ឋាននគរបាលខេត្ត រួមនឹងរថយន្តរបស់ក្រុមហ៊ុនចំការកៅស៊ូក្រែកសរុប៩គ្រឿងបានសហការគ្នាបាញ់ទឹកដើម្បីទប់ស្កាត់មិនឲ្យឆេះរាលដល់ផ្ទះរបស់ពលរដ្ឋជិតខាងនោះទេ ។ ក្រោយមកក៏គ្រប់គ្រងស្ថានការទាំងស្រុង ហើយក៏គ្មានមនុស្សណាម្នាក់រងគ្រោះថ្នាក់ដល់អាយុជីវិតឡើយ។
មន្ត្រីនគរបាលដដែលបន្តថា ចំពោះទ្រព្យសម្បត្តិវិញបាត់បង់ដូចជា ផ្ទះ១ខ្នង ប្រាក់ដុល្លារ៦៥.០០០ដុល្លារ ប្រាក់រៀលចំនួន១៥លានរៀល ម្រេច៥តោន ម៉ូតូ៤គ្រឿង និងសម្ភារៈមួយចំនួនទៀតផងដែរ ។ ហើយមូលហេតុដែលបង្កឲ្យមានគ្រោះអគ្គិភ័យកើតឡើងនោះ ដោយសារតែឆ្លងចរន្តអគ្គិសនី៕ (កែសម្រួលដោយ ៖ បុប្ផា)
ចែករំលែកព័តមាននេះ