រាជធានីភ្នំពេញ ៖ លោក ស សុខា រដ្ឋលេខាធិការក្រសួងអប់រំ យុវជន និងកីឡា និងជាប្រធានសហព័ន្ធកីឡាប៊ូលនិងប៉េតង់កម្ពុជា ដែលទើបជាប់ឆ្នោតកាលពីពេលថ្មីៗ កន្លងទៅនេះ បានក្រើនរំលឹកទៅដល់អត្តពលិក កីឡាប៊ូលនិងប៉េតង់ជម្រើសជាតិទាំងអស់ត្រូវតែយកចិត្តទុកដាក់ខិតខំប្រឹងប្រែងហ្វឹកហាត់ឱ្យបានខ្លាំងដើម្បីឈានទៅដណ្ដើមមេដាយមាសពីព្រឹត្តិការណ៍ប្រកួតនៅលើឆាកអន្តរជាតិ។
លោកមានប្រសាសន៍បែបនេះនៅក្នុងឱកាសជួបសំណេះសំណាលជាមួយគ្រូបង្វឹក កីឡាករ កីឡាការិនីជម្រើសជាតិមកពីសមាគមនិងក្លិប កីឡាប៊ូលនិងប៉េតង់ នៅសាលប្រជុំមជ្ឈមណ្ឌលជាតិហ្វឹកហ្វឺនកីឡា កាលពីល្ងាចថ្ងៃទី២៩ ឧសភា ឆ្នាំ២០១៩។
លោក ស សុខា បានមានប្រសសន៍ថា សព្វថ្ងៃវិស័យកីឡាប៊ូលនិងប៉េតង់កម្ពុជា កំពុងមានការរីកចម្រើនខ្លាំងដោយធ្លាប់ដណ្ដើមយកមេដាយមាសយ៉ាងច្រើនពីព្រឹត្តិការណ៍ប្រកួតនៅលើឆាកអន្តរជាតិទាំងព្រឹត្តិការណ៍កីឡាអាស៊ីនិងពិភពលោក ។ ដូច្នេះអត្តពលិកទាំងអស់ត្រូវតែខិតខំប្រឹងប្រែងបន្តទៀត ។
លោកបានលើកឡើងថា វិន័យគឺជាកត្តាចម្បងដែលកីឡាករកីឡាការិនីទាំងអស់ត្រូវតែយកចិត្តទុកដាក់ឱ្យបានខ្លាំងបំផុត ហើយអ្វីដែលសំខាន់បំផុតគឺការហ្វឹកហាត់តែម្ដង ។ បើហ្វឹកហាត់ត្រឹមមួយថ្ងៃ៣ម៉ោងនៅតែមិនអាចឈ្នះគេទៀតត្រូវហ្វឹកហាត់ឱ្យបាន៤ម៉ោងឬ៥ម៉ោងទៅរឿងអីដែលមិនអាចទៅរួចនោះ ។ ចំណែកគ្រូបង្វឹកក៏ដូចគ្នាដែរ ត្រូវតែហ៊ានអារកាត់ចំពោះកីឡាករ កីឡាការិនីណាដែលខ្សោយ ហាត់មិនរីកចម្រើនត្រូវតែដូរ ចេញ ។ លោកបានធ្វើការប្រៀបធៀបជាមួយកីឡាករ កីឡាការិនីបណ្ដាប្រទេសជិតខាង ជាពិសេសនៅក្នុងតំបន់អាស៊ី គឺយើងនៅខ្សោយជាងគេឆ្ងាយណាស់។
ពាក់ព័ន្ធនឹងបញ្ហាដូចរៀបរាប់ខាងលើលោកប្រធានសហព័ន្ធបានជំរុញទៅដល់កីឡាករ កីឡាការិនីជើងចាស់ដែលសម្បូរបទពិសោធន៍ ត្រូវចេះស្រឡាញ់និងជួយគ្នាដូចបងប្អូន ដោយជួយបង្ហាត់បង្រៀនដល់ក្មេងៗជំនាន់ក្រោយទាំងបច្ចេកទេស និងចិត្តសាស្ត្រ។ លោកបានបញ្ជាក់ថា មានកត្តាចំនួន៣ដែលនាំឱ្យយើងតែងទទួលនូវការបរាជ័យ ទី១កត្តាគ្រួសារ ទី២កត្តាខ្លួនឯង និងទី៣កត្តាសម្ភារហ្វឹកហាត់៕ (កែវសម្រួលដោយ ៖ បុប្ផា)
ចែករំលែកព័តមាននេះ