ហាណូយ ៖ ឧបនាយករដ្ឋមន្ត្រីវៀតណាមលោក Vuong Dinh Hue បានសង្កត់ធ្ងន់អំពីសារៈសំខាន់នៃការគ្រប់គ្រងគុណភាពនិងលទ្ធភាពទទួលបានផ្លែគូលែន ដែលជាផ្លែឈើពិសេសរបស់ខេត្ត Bac Giang…
ហាណូយ ៖ ឧបនាយករដ្ឋមន្ត្រីវៀតណាមលោក Vuong Dinh Hue បានសង្កត់ធ្ងន់អំពីសារៈសំខាន់នៃការគ្រប់គ្រងគុណភាពនិងលទ្ធភាពទទួលបានផ្លែគូលែន ដែលជាផ្លែឈើពិសេសរបស់ខេត្ត Bac Giang ភាគខាងជើងរបស់វៀតណាម ដើម្បីបំពេញនូវតម្រូវការនាំចេញសម្រាប់ប្រទេសចិននិងទីផ្សារសក្តានុពលក្រៅប្រទេសផ្សេងៗទៀត។
លោក Hue បានធ្វើសេចក្តីថ្លែងការណ៍នៅឯវេទិកាមួយស្តីពីការផលិតនិងការប្រើប្រាស់កាកសំណល់និងការលើកកម្ពស់ទេសចរណ៍ដែលបានប្រារព្ធឡើងនៅខេត្ត Bac Giang ដោយអ្នកដាំដុះក្នុងស្រុកបានចាប់ផ្តើមប្រមូលផល ដោយសារតែរដូវប្រមូលផលផ្លែឈើគូលែនបានមកដល់ហើយសម្រាប់ឆ្នាំនេះ។
ឧបនាយករដ្ឋមន្ត្រីវៀតណាមលោក Vuong Dinh Hue បានស្នើដល់ក្រសួងនិងវិស័យពាក់ព័ន្ធឱ្យបន្ថែមផ្លែឈើក្នុងស្រុកនិងផលិតផលផ្សេងទៀតទៅក្នុងបញ្ជីជាតិផលិតផលកសិកម្មដែលនាំចេញទៅទីផ្សារចិន។ លោកក៏បានស្នើឱ្យពួកគេផ្តល់ជូននូវព័ត៌មានទីផ្សារនិងជួយខេត្តមួយនេះ ពង្រីកការប្រើប្រាស់ក្នុងស្រុកនិងបរទេសតាមរយៈកម្មវិធីលើកកម្ពស់ពាណិជ្ជកម្មនៅក្រៅប្រទេស។
លោក Hue បាននិយាយបន្តទៀតថា «យើងត្រូវជួយអាជីវកម្មរបស់ប្រជាកសិករឱ្យទទួលបានបច្ចេកវិទ្យាទំនើប ដើម្បីអភិរក្សនិងកែច្នៃផលិតផលផ្លែគូលែននិងអភិវឌ្ឍផលិតផលទេសចរណ៍ផ្សេងៗ»។ លោកបាននិយាយថាអាជ្ញាធរមូលដ្ឋាននិងដៃគូនៅក្នុងប្រទេសចិនត្រូវការពង្រឹងទំនាក់ទំនងពាណិជ្ជកម្មដើម្បីបង្កើតលក្ខខណ្ឌដ៏ល្អបំផុតសម្រាប់អ្នកជួញដូរជនជាតិចិនដើម្បីទិញផ្លែគូលែន នៃខេត្តមួយនេះហើយវិនិយោគលើសេវាកម្មកសិកម្មនិងទេសចរណ៍។
លោក Hue បាននិយាយថា «នីតិវិធីរដ្ឋបាលសម្រាប់ដៃគូរចិនត្រូវតែមានលក្ខណៈសាមញ្ញដើម្បីជួយនាំចេញផ្លែគូលែនទៅកាន់ប្រទេសចិនក្នុងរយៈពេលខ្លីបំផុត» ។ នៅក្នុងវេទិកានេះអ្នកប្រឹក្សាពាណិជ្ជកម្មនៅស្ថានទូតចិនប្រចាំនៅទីក្រុងហាណូយ Ho Doa Gin បានកោតសរសើរដល់គុណភាពនៃផ្លែឈើផ្លែគូលែនវៀតណាម ដោយនិយាយថាវាត្រូវគ្នានឹងចំណង់ចំណូលចិត្តរបស់អតិថិជនចិន។ លោកបានបន្តទៀតថា ចិននឹងបង្កើតលក្ខខណ្ឌអំណោយផលសម្រាប់ការនាំចូលផលិតផល។ អ្នកចែកចាយក្នុងស្រុកធំៗ ជាច្រើនដូចជាក្រុមហ៊ុន Saigon Co.op និង BigC ក៏មានគម្រោងទិញនិងលក់ផ្លែគូលែននៃខេត្ត Bắc Giang ផងដែរ។
តំណាងក្រុមហ៊ុន Central Group Vietnam ដែលជាម្ចាស់នៃខ្សែសង្វាក់ផ្សារទំនើប BigC បាននិយាយថាក្រុមហ៊ុននេះកំពុងគាំទ្រយ៉ាងសកម្មដល់ការផលិតនិងការលក់ដូររបស់ ផ្លែគូលែន Bắc Giang ។
អ្នកតំណាងខាងលើបាននិយាយថា «សម្រាប់រដូវកាលប្រមូលផលផ្លែគូលែនឆ្នាំនេះ យើងប្តេជ្ញាទិញផ្លែគូលែនចំនួន ៣៥០ តោននៅទូទាំងប្រទេស។ នៅថ្ងៃនេះក្រុមហ៊ុន Central Group Vietnam បានសន្យាទិញវត្ថុចំនួន ៦ កុងតឺន័រ ដើម្បីលក់នៅផ្សារធំ Big C និងផ្សារទំនើប Lan Chi ដែលជាដៃគូយុទ្ធសាស្ត្ររបស់យើង។ អ្នកតំណាងម្នាក់បានបន្ថែមទៀតថា «ផ្លែឈើគូលែនចំនួនកុងតឺន័រ នឹងត្រូវបាននាំចេញទៅប្រទេសថៃនៅឆ្នាំនេះទៀតផង» ។
អនុប្រធានគណៈកម្មាធិការប្រជាជនខេត្ត Bac Giang បានអោយដឹងថាពេលនេះខេត្តរបស់លោកកំពុងតែដើរដល់រដូវប្រមូលផលផ្លែគូលែនសម្រាប់ឆ្នាំ 2019 ។ លោកបានបន្តថា «យើងប្តេជ្ញាបង្កើតលក្ខខណ្ឌអំណោយផលបំផុតដើម្បីជួយដល់អ្នកដាំដុះពាណិជ្ជកម្មនិងទាំងឈ្មួញក្នុងស្រុកនិងបរទេសក្នុងការប្រមូលផលកែច្នៃនិងលក់ផ្លែគូលែន»។
ខេត្ត Bac Giang ត្រូវបានគេស្គាល់ថាជាតំបន់ដាំដុះផ្លែឈើប្រមូលផ្តុំធំជាងគេនៅភាគខាងជើងនៃប្រទេសវៀតណាមដោយមានផ្ទៃដីសរុបជិត ៥០.០០០ ហិកតា។ ចំការផ្លែគូលែនដាំដុះលើផ្ទៃដីជាង ២៨,០០០ ហិកតានេះត្រូវបានគេចាត់ទុកថាជាមជ្ឈមណ្ឌលដ៏ធំបំផុតនៅក្នុងប្រទេសដែលមានទិន្នផលប្រចាំឆ្នាំជាង ១៥០,០០០ តោន។ ឈ្មោះយីហោរបស់ផ្លែគូលែន Bac Giang ត្រូវបានការពារនៅក្នុងប្រទេសចំនួនប្រាំបីរួមមាន កូរ៉េខាងត្បូង ចិន ជប៉ុន សឹង្ហបូរី និងអូស្ត្រាលី។ កាលពីឆ្នាំមុនផ្លែឈើគូលែននេះត្រូវបានបញ្ជាក់ដោយអង្គការកំណត់ត្រាអាស៊ីអាគ្នេយ៍ថាជាផ្នែកមួយនៃអាហារពិសេសទាំង ១០ នៅអាស៊ីអាគ្នេយ៍ ៕ (កែសម្រួលដោយ បុប្ផា)
ចែករំលែកព័តមាននេះ