រាជធានីភ្នំពេញ ៖ រហូតមកដល់ថ្ងៃទី២៩ ឧសភា សមត្ថកិច្ចនៅមិនទាន់ចាប់ខ្លួនបុរសជាជនដៃដល់បាននៅឡើយទេ ដោយកំពុងតែធ្វើការស្រាវជ្រាវតាមរកចាប់ខ្លួនបន្តយកផ្តន្ទាទោសទៅតាមច្បាប់ ។ គួររំលឹកថា បុគ្គលិកហាងថតរូបយីហោ«ល្អពេញចិត្ត»ម្នាក់ បានរងរបួសក្បាលយ៉ាងធ្ងន់…
រាជធានីភ្នំពេញ ៖ រហូតមកដល់ថ្ងៃទី២៩ ឧសភា សមត្ថកិច្ចនៅមិនទាន់ចាប់ខ្លួនបុរសជាជនដៃដល់បាននៅឡើយទេ ដោយកំពុងតែធ្វើការស្រាវជ្រាវតាមរកចាប់ខ្លួនបន្តយកផ្តន្ទាទោសទៅតាមច្បាប់ ។ គួររំលឹកថា បុគ្គលិកហាងថតរូបយីហោ«ល្អពេញចិត្ត»ម្នាក់ បានរងរបួសក្បាលយ៉ាងធ្ងន់ និងបានស្លាប់បាត់បង់ជីវិត នៅពេលក្រុមគ្រួសារព្យាយាមដឹកយកទៅសង្គ្រោះនៅឯប្រទេសវៀតណាម ក្រោយពីរូបគេត្រូវបុរសជាជនដៃដល់ន ិងជាបុគ្គលិកធ្វើការជាមួយគ្នាម្នាក់ វាយសំពងក្បាលនឹងដែកបំពង់ទីបឥតដកដៃ ។
តាមប្រភពព័ត៌មានថា ពួកគេទាំង២នាក់ធ្លាប់មានទំនាស់រឿងស្នេហាត្រីកោណ ដោយបុរសជាជនដៃដល់គិតថា ជនរងគ្រោះលបលួចមានទំនាក់ទំនងស្នេហាជាមួយនឹងប្រពន្ធរបស់ខ្លួន ។ អំពើឃោរឃៅនេះ កើតឡើង កាលពីវេលាម៉ោងប្រមាណ៥និង៣០នាទីល្ងាចថ្ងៃទី២៧ ឧសភា នៅផ្ទះលេខ១៤៣ ផ្លូវលេខ២៨៦ សង្កាត់់ទួលស្វាយព្រៃទី២ ខណ្ឌចំការមន ។ ប្រភពពីមន្ត្រីនគរបាលឱ្យដឹងថា បុរសជាជនរងគ្រោះឈ្មោះ
ផុន សាលីន អាយុ២៩ឆ្នាំ មានស្រុកកំណើតនៅខេត្តតាកែវ ចំណែកឯបុរសជាជនដៃដល់ឈ្មោះ ឈុន ឌីម អាយុ២៦ឆ្នាំ ទាំង២នាក់ស្នាក់នៅផ្ទះកើតហេតុខាងលើជាមួយគ្នា ។
មុនពេលកើតហេតុ តាមរយៈការថតដោយកាមេរ៉ាសុវត្ថិភាព គេឃើញបុរសជាជនរងគ្រោះកំពុងអង្គុយចុចទូរស័ព្ទលេងនៅមុខហាង ។ ខណៈនោះ ស្រាប់តែបុរសជាជនដៃដល់ដើរមកពីក្រោយ ដោយនៅនឹងដៃមានកាន់ដែកបំពង់ទីបមួយដើមផង បានវាយជនរងគ្រោះ ដោយមិនប្រណីដៃចំក្បាលបណ្តាលឲ្យបែកក្បាលហូរឈាមដួលដេកទៅលើឥដ្ឋការ៉ូ ហើយជនដៃដល់ក៏រត់គេចខ្លួនបាត់ស្រមោល ។
ប្រភពព័ត៌មានដដែលឲ្យដឹងទៀតថា ក្រោយពេលកើតហេតុ ក្រុមបុគ្គលិករបស់ហាងថតរូបខាងលើក៏នាំគ្នាយកជនរងគ្រោះទៅកាន់មន្ទីរសម្រាកព្យាបាលវិសាលសុខ តែដោយអាការធ្ងន់ពេកមន្ទីរព្យាបាលនេះមិនហ៊ានទទួល ក៏បញ្ជូនបន្តទៅមន្ទីរពេទ្យកាល់ម៉ែត ។ ដោយសាររបួសមានសភាពធ្ងន់ណាស់ទៅហើយ ក្រុមគ្រួសារក៏ព្យាយាមបញ្ជូនទៅសង្គ្រោះនៅឯប្រទេសវៀតណាមទៀត តែជាអកុសលជនរងគ្រោះក៏បានស្លាប់ទៅ ។
ពាក់ព័ន្ធនឹងការផ្ទុះអំពើហិង្សាវាយសម្លាប់នេះ ត្រូវបានប្រភពព័ត៌មានអះអាងថា កើតឡើងដោយសារតែបុរសរងគ្រោះនិងបុរសជាជនដៃដល់ធ្លាប់មានទំនាស់រឿងស្នេហាត្រីកោណនាពេលកន្លងមក ដោយជនដៃដល់ចោទថា ជនរងគ្រោះលបលួចមានស្នេហាជាមួយនឹងប្រពន្ធរបស់ខ្លួន ។
សពបុរសរងគ្រោះ ត្រូវបានក្រុមគ្រួសារបញ្ជូនយកទៅធ្វើបុណ្យតាមប្រពៃណីនៅស្រុកកំណើតឯខេត្តតាកែវ ។ តាមប្រភពពីមន្ត្រីសមត្ថកិច្ចមូលដ្ឋានមួយរូបឱ្យដឹងទៀតថា ករណីបុគ្គលិករបស់ហាងថតរូបយីហោ«ល្អពេញចិត្ត» វាយសម្លាប់គ្នានេះ គឺបានកើតឡើងតាំងពីវេលាម៉ោងប្រមាណ៥ន ិង៣០នាទីល្ងាចថ្ងៃទី២៧ ខែឧសភាមកម្ល៉េះ ប៉ុន្តែទាល់តែមកដល់ព្រឹកថ្ងៃទី២៨ ខែឧសភា ទើបម្ចាស់ផ្ទះរាយការណ៍ប្រាប់សមត្ថកិច្ចឱ្យដឹងពីរឿងនេះ និងចុះមកត្រួតពិនិត្យកន្លែងកើតហេតុ ។ (សម្រួលដោយ៖ ស្រីណា)
ចែករំលែកព័តមាននេះ