រាជធានីភ្នំពេញ ៖ ជាផ្នែកមួយនៃការជួយដល់ការអភិវឌ្ឍន៍កំពង់ផែស្វយ័ត្រក្រុងព្រះសីហនុ ដែលជាកំពង់ផែទឹកជ្រៅតែមួយគត់របស់កម្ពុជានោះ ប្រទេសជប៉ុននឹងផ្តល់នូវជំនួយឥតសំណងថ្មីមួយទៀត នូវទឹកប្រាក់ចំនួន ២០០លានយ៉េនជប៉ុន (ប្រមាណជិត ២លានដុល្លារអាមេរិក) សម្រាប់ការអនុវត្តកម្មវិធីអភិវឌ្ឍន៍សេដ្ឋកិច្ចនិងសង្គម-សាងសង់ស្ថានីយ៍កុងតឺណឺ…
រាជធានីភ្នំពេញ ៖ ជាផ្នែកមួយនៃការជួយដល់ការអភិវឌ្ឍន៍កំពង់ផែស្វយ័ត្រក្រុងព្រះសីហនុ ដែលជាកំពង់ផែទឹកជ្រៅតែមួយគត់របស់កម្ពុជានោះ ប្រទេសជប៉ុននឹងផ្តល់នូវជំនួយឥតសំណងថ្មីមួយទៀត នូវទឹកប្រាក់ចំនួន ២០០លានយ៉េនជប៉ុន (ប្រមាណជិត ២លានដុល្លារអាមេរិក) សម្រាប់ការអនុវត្តកម្មវិធីអភិវឌ្ឍន៍សេដ្ឋកិច្ចនិងសង្គម-សាងសង់ស្ថានីយ៍កុងតឺណឺ នៅខេត្តព្រះសីហនុ ។
បើតាមការឲ្យដឹងលោក លូ គឹមឈន់ ប្រតិភូរាជរដ្ឋាភិបាលទទួលបន្ទុកអគ្គនាយកកំពង់ផែស្វយ័តក្រុងព្រះសីហនុ បានមានប្រសាសន៍ថា «បរិមាណកុងតឺន័រឆ្លងកាត់កំពង់ផែស្វយ័តក្រុងព្រះសីហនុ បានកើនឡើងជាបន្តបន្ទាប់ ដែលទាមទារអោយកំពង់ផែអន្តរជាតិមួយនេះ ត្រូវការពង្រីកវិសាលភាពបន្ថែមទៀតដើម្បីទទួលកំណើនកុងតឺន័រពីនាវាដែលបានចូលចត ក្នុងពេលកំពង់ផែទឹកជ្រៅថ្មីមួយទៀតគ្រោងនឹងដាក់ដំណើរការទទួលនាវាកាន់តែធំផងដែរ» ។
ពិធីផ្លូវការសម្រាប់ការផ្តល់នូវជំនួយឥតសំណងរបស់ប្រទេសជប៉ុនខាងលើនឹងត្រូវធ្វើឡើងនៅក្នុងដំណើរចូលរួមសន្និសីទអន្តរជាតិលើកទី២៥ ស្ដីពី «អនាគតរបស់អាស៊ី» របស់សម្ដេចតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា រយៈពេល ៣ ថ្ងៃគិតចាប់ពីថ្ងៃទី ២៩-៣១ ខែឧសភា នាទីក្រុងតូក្យូប្រទេសជប៉ុន ដែលសម្តេចតេជោបានចាកចេញពីកម្ពុជានិងបានដឹកនាំគណៈប្រតិភូជាន់ខ្ពស់កម្ពុជាចេញទៅជប៉ុននៅព្រឹកថ្ងៃទី ២៨ ខែឧសភា ម្សិលមិញនេះ សម្រាប់ការអញ្ជើញបំពេញទស្សនកិច្ចការងារនៅប្រទេសជប៉ុន ។នៅក្នុងឱកាសនោះផងដែរ សម្តេចតេជោ ក៏នឹងមានជំនួបផ្លូវការជាមួយនាយករដ្ឋមន្ត្រីជប៉ុន លោក ស៊ីនហ្ស៊ូ អាបេ (Shinzō Abe) ហើយក្នុងជំនួបនេះនាយករដ្ឋមន្ត្រីទាំងពីរ នឹងអញ្ជើញធ្វើជាសាក្សីនៃពិធីចុះហត្ថលេខាប្តូរសារ ដើម្បីទទួលបានថវិកាប្រមាណ២លានដុល្លារអាមេរិកពីជប៉ុន ក្នុងការសាងសង់កំពង់ផែស្វយ័តក្រុងព្រះសីហនុ ។ នេះបើយោងតាមហ្វេសប៊ុកផេកផ្លូវការរបស់សម្ដេច តេជោហ៊ុន សែន ចុះថ្ងៃទី ២៨ ខែឧសភា ។
ប្រភពដដែលបានបញ្ជាក់ថា សម្តេចនឹងមានជំនួបទ្វេភាគីជាមួយនាយករដ្ឋមន្ត្រីជប៉ុន ហើយនាយករដ្ឋមន្ត្រីទាំងពីរ នឹងធ្វើជាសាក្សីក្នុងការចុះហត្ថលេខាលើលិខិតផ្លាស់ប្តូរសារព្រមព្រៀង ស្តីពីការផ្តល់ជំនួយឥតសំណងរបស់ជប៉ុន សម្រាប់គម្រោងអភិវឌ្ឍន៍ប្រទេសកម្ពុជាចំនួន២ រួមមាន៖ ទី១)- ការអនុវត្តកម្មវិធីអភិវឌ្ឍន៍សេដ្ឋកិច្ច និងសង្គម (សាងសង់ស្ថានីយកុងតឺណឺ ដែលមានទឹកប្រាក់ ២០០លានយ៉េនជប៉ុន ឬប្រមាណជិត២លានដុល្លារអាមេរិក និង ទី២ ការអនុវត្តគម្រោងអាហារូបករណ៍អភិវឌ្ឍន៍ធនធានមនុ ស្សដែលមានទឹកប្រាក់ ៣៣៩លានយ៉េនជប៉ុនឬប្រមាណ ជាង៣លានដុល្លារអាមេរិក ។
សូមរម្លឹកថាថ្នាក់ដឹកនាំប្រទេសកម្ពុជាកំពុងតែរៀបចំផែនការមេ (Master Plan) ក្នុងគោលបំណងប្រែក្លាយខេត្តព្រះសីហនុ ឱ្យទៅជាតំបន់សេដ្ឋកិច្ចពិសេសពហុបំណង (Multipurpose Special Economic Zone) ។ ព្រមជាមួយគ្នានោះផងដែរ អាជ្ញាធរពាក់ព័ន្ធក៏បាននឹងកំពុងខិតខំបង្កើនគុណភាពសេវាកម្មអោយកាន់តែប្រសើរឡើង តាមរយៈការបំពាក់បន្ថែមនូវគ្រឿងចក្រទំនើបៗ ការពង្រឹងសមត្ថភាព និយោជិតកម្មករ ព្រមទាំងការបំពាក់ប្រព័ន្ធស្វ័យប្រវត្តិ សំដៅបង្កើនល្បឿនប្រតិបត្តិការ និងកាត់បន្ថយហានិភ័យនានា ក៏ដូចជាពេលវេលារបស់អតិថិជន និងអ្នកប្រើប្រាស់ផែ ។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអោយដឹងថា បន្ទាប់ពីចំណតផែពហុបំណងនៅក្នុងកំពង់ផែអន្តរជាតិក្រុងព្រះសីហនុ បានសម្ពោធដំណើរការជាផ្លូវការ ឃើញថាកំនើនកុងតឺន័រចូលចត នៅក្នុងកំពង់ផែហាក់មានកំណើនគួរអោយកត់សម្គាល់ ។ ជាក់ស្ដែង ក្នុងរយៈពេល បី ខែដំបូងដើមឆ្នាំ ២០១៩នេះ បរិមាណកុងតឺន័រឆ្លងកាត់កំពង់ផែស្វយ័តក្រុងព្រះសីហនុមានចំនួនជា១៣ម៉ឺន TEUs ។ លោកបន្តថា ដើម្បីពង្រីកវិសាលភាពនៃការដឹកជញ្ជូនតាមផ្លូវទឹកអោយកាន់តែច្រើនថែមទៀតនោះ កំពង់ផែស្វយ័តក្រុងព្រះសីហនុបានចុះហត្ថលេខាប្តូរសារជាមួយប្រទេសជប៉ុន ដើម្បីទទួលប្រាក់កម្ចី សាងសង់ចំណតកំពង់ផែទឹកជ្រៅថ្មីមួយ មានជម្រៅទឹក ១៤ម៉ែត្រកន្លះមានតម្លៃសរុបប្រមាណ២០៣លានដុល្លារអាមេរិក ។ គម្រោងចំណតកំពង់ផែទឹកជ្រៅនេះ នឹងសាងសង់ចាប់ផ្ដើមនៅឆ្នាំ ២០២០ និងគ្រោងបញ្ចប់នៅចុងឆ្នាំ ២០២៣ រឺ ដើមឆ្នាំ២០២៤ ។
លោក ស៊ុន ចាន់ថុល មានប្រសាសន៍បញ្ជាក់ថា «តាមរយៈចំណតកំពង់ផែទឹកជ្រៅថ្មីនេះ នឹងអនុញ្ញាតអោយនាវាធុនធំចូលចត និងលើកដាក់ទំនិញបាន ។ មិនតែប៉ុណ្ណោះវានឹងអាចបញ្ចុះតម្លៃការដឹកជញ្ជូនតាមផ្លូវសមុទ្រនៅក្នុងប្រទេសកម្ពុជាកាន់តែនៅ
ទាប » ។ បើតាមលោក ស៊ិន ចន្ធី ប្រធានសមាគមភ្នាក់ងារបញ្ជូនទំនិញកម្ពុជា បានមានប្រសាសន៍ផងដែរថា បច្ចុប្បន្ននេះមធ្យោបាយដឹកជញ្ជូនទំនិញដែលសកម្ម និងសំខាន់ជាងគេសម្រាប់កម្ពុជានោះ គឹការដឹកតាមផ្លូវទឹក ហើយយើងមានកំពង់ផែអន្តរជាតិទឹកជ្រៅតែមួយគត់នៅខេត្តព្រះសីហនុ ។
លោកបានបន្តថា «យើងមានមធ្យោបាយដឹកជញ្ជូនទំនិញចេញក្រៅប្រទេសមានច្រើនបែបដែរ ដូចជាផ្លូវអាកាស ផ្លូវគោក និងផ្លូវទឹក តែការដឹកតាមផ្លូវទឹកគឺចំណាយអស់តិចជាងគេ ដូច្នេះហើយបើសិនជារដ្ឋាភិបាលបានអភិវឌ្ឍន៍បន្ថែមទៀតលើមធ្យោបាយដឹកតាមផ្លូវទឹក និងការសាងសង់ហេដ្ឋារចនាសម្ព័ន្ធតភ្ជាប់ពីបណ្ដាខេត្តទៅកាន់កំពង់ផែ បានល្អ នោះ វាកាន់តែងាយស្រួលសម្រាប់អ្នកដឹកជញ្ជូនរបស់យើង» ។ លោកបានបន្តថា ពេលនេះរដ្ឋាភិបាលបាននិងកំពុងសាងសង់ផ្លូវល្បឿនលឿនមួយហើយ ដែលតភ្ជាប់ពីភ្នំពេញ ទៅកាន់ខេត្តព្រះសីហនុ ដូចនេះនៅពេលដែលផ្លូវនេះរួចរាល់ នឹងធ្វើឱ្យសកម្មភាពដឹកជញ្ជូនទំនិញ ទៅកាន់កំពង់ផែកាន់តែខ្លាំងឡើងនឹងអស់ថ្លៃចំណាយកាន់តែតិច ដូច្នេះកម្ពុជាអាចបញ្ជូនទំនិញទៅក្រៅប្រទេសកាន់តែច្រើននិងចំណាយពេលខ្លី ។
គួរបញ្ជាក់ថាយោងតាមរបាយការណ៍របស់កំពង់ផែស្វយ័តក្រុងព្រះសីហនុ ក្នុងរយៈបីខែដំបូង កំពង់ផែនេះរកបានចំណូលប្រមាណ៦៩ពាន់លានរៀល ឬប្រមាណជាង ១៧លានដុល្លារអាមេរិក កើនឡើងជាង១៧ភាគរយធៀបនឹងរយៈពេលដូចគ្នាកាលពីឆ្នាំចាស់ ៕ កែសម្រួលដោយ ៖ សុឃាក់
ចែករំលែកព័តមាននេះ