រាជធានីភ្នំពេញ ៖ តុលាការសាលាឧទ្ធរណ៍បានបើកសវនាការលើបណ្តឹងឧទ្ធរណ៍ របស់មេដឹកនាំសហជីព៦រូបដែលពាក់ព័ន្ធនឹងព្រឹត្តិការណ៍សោកនាដកម្ម នៅផ្លូវវេង ស្រេងកន្លងមក ដោយសម្រេចលើកលែងការចោទប្រកាន់ចំពោះថ្នាក់ដឹកនាំសហជីពទាំង៦រូប ។
មេសហជីពទាំងនោះរួមមានលោកប៉ាវ ស៊ីណា ,លោកអាត់ ធន់ , អ្នកស្រីម៉ម ញឹម ,លោកជា មុន្នី , អ្នកស្រីយ៉ាង សោភ័ណ្ឌ និងលោក រ៉ុង ឈុន ត្រូវបានសាលាឧទ្ធរណ៍ប្រ កាសកាលពីថ្ងៃទី២៨ ខែឧសភា ឆ្នាំ២០១៩ វេលាម៉ោង២រសៀល ។ នេះបើតាមលោកប៉ាវ ស៊ីណា ប្រធានសម្ព័ន្ធសហជីពចលនាកម្ពុជាបានឲ្យដឹងលើបណ្តាញសង្គម ។
ប្រភពបានបន្តថា ក្រោយពីបញ្ចប់ការសួរដេញដោលសភាព្រហ្មទណ្ឌនៃសាលាឧទ្ធរ ណ៍បានសម្រេចឲ្យថ្នាក់ដឹកនាំសហជីពទាំង៦នាក់ដោយសម្រេចមាន១-ទទួលបណ្តឹង របស់ថ្នាក់ដឹកនាំសហជីពទុកជាត្រឹមត្រូវតាមទម្រង់ និងគតិច្បាប់ ។ ២- បដិសេធ សាលក្រមសាលាដំបូងរាជធានីភ្នំពេញចោល ។ ៣- ឱ្យឈ្មោះប៉ាវ ស៊ីណា , ជា មុន្នី, យ៉ាង សោភ័ណ្ឌ ,ម៉ម ញឹម, អាត់ ធន់, និងរ៉ុង ឈុន រួចខ្លួនពីបទចោទ ។
សូមរំលឹកថា កាលពីព្រឹកថ្ងៃទី០៧ ខែធ្នូ ឆ្នាំ២០១៨ សាលាដំបូងរាជធានីភ្នំពេញបានបើកសវនាការជំនុំជម្រះលើសំណុំរឿងមេដឹកនាំសហជីពចំនួន០៦រូបពាក់ព័ន្ធនឹង ករណីដឹកនាំធ្វើបាតុកម្មនៅមុខសួនឧស្សាហកម្ម កាណាឌីយ៉ា និងផ្លូវវ៉េងស្រេង កាល ពីចុងឆ្នាំ២០១៣ និងដើមឆ្នាំ២០១៤ ។ នៅក្នុងសវនាការកាលនោះមានលោក អ៊ឹម វណ្ណៈ ជាចៅក្រមជំនុំជម្រះ លោកលី សុផាណា ព្រះរាជអាជ្ញារងនៃអយ្យការអមសាលា ដំបូងរាជធានីភ្នំពេញជាតំណាងអយ្យការ និងលោកវុន សុជាតិ ជាក្រឡាបញ្ជីសវនាការ ។
សូមបញ្ជាក់ថា មេដឹកនាំសហជីពទាំង៦រូបខាងលើត្រូវបានចោទប្រកាន់ចំនួន៤ករណី ១-បទល្មើសហិង្សាដោយចេតនាមានស្ថានទម្ងន់ទោស ។ ២-បទ ធ្វើឲ្យខូចខាតដោយ ចេតនាមានស្ថានទម្ងន់ទោស ។ ៣-បទគំរាមកំហែងថា នឹងធ្វើឲ្យខូចខាតដែលភ្ជាប់នូវ បញ្ជាអ្វីមួយ ។ ៤-បទប្រើមធ្យោបាយ ដើម្បីជាឧបសគ្គដល់ចរាចរណ៍សាធារណៈ ប្រព្រឹត្ត នៅចំណុចមុខសួនឧស្សាហកម្មកាណាឌីយ៉ា ផ្លូវវ៉េងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិសែនជ័យ រាជធានីភ្នំពេញ បទល្មើសដែលមានចែងឲ្យផ្តន្ទាទោសតាមបញ្ញាត្តិមាត្រា២១៨ , មាត្រា ៤១១ , មាត្រា ៤២៤ នៃក្រមព្រហ្មទណ្ឌ និងមាត្រា៧៨នៃច្បាប់ស្តីពីចរាចរណ៍ផ្លូវគោក ។
កាលពីពេលកន្លងមកសម្តេចតេជោ ហ៊ុនសែន នាយករដ្ឋមន្ត្រីធ្លាប់បានបញ្ជាក់ថា ថ្នាក់ ដឹកនាំសហជីពទាំងនេះមិនបានជាប់ពាក់ព័ន្ធនឹងករណីបាតុកម្មនោះទេ ដោយស្នើឲ្យ ថ្នាក់ដឹកនាំសហជីពទាំងនេះរកសាក្សី ដើម្បីដាក់ពាក្យបណ្តឹងនៅសាលាឧទ្ធរណ៍ ជំទាស់នឹងសាលដីការសាលាដំបូងផងដែរ ៕
ចែករំលែកព័តមាននេះ