រាជធានីភ្នំពេញ ៖ ស្ត្រីចំណាស់ម្នាក់ត្រូវអ្នកជិតខាងចាត់ទុកថា ជាជនទុរគត ទោះជាគាត់មានប្ដី និងកូនដល់ទៅ៤នាក់ក្ដី ប៉ុន្តែប្ដីបានសម្រេចចិត្តចាកចោលគាត់ បាត់ដំណឹងមិនដឹងជាដើរអណ្ដែតត្រសែតទៅដល់ណា ស្លាប់ឬក៏រស់ឡើយ។ ចំណែកកូនប្រុសម្នាក់ស្លាប់…
រាជធានីភ្នំពេញ ៖ ស្ត្រីចំណាស់ម្នាក់ត្រូវអ្នកជិតខាងចាត់ទុកថា ជាជនទុរគត ទោះជាគាត់មានប្ដី និងកូនដល់ទៅ៤នាក់ក្ដី ប៉ុន្តែប្ដីបានសម្រេចចិត្តចាកចោលគាត់ បាត់ដំណឹងមិនដឹងជាដើរអណ្ដែតត្រសែតទៅដល់ណា ស្លាប់ឬក៏រស់ឡើយ។ ចំណែកកូនប្រុសម្នាក់ស្លាប់ រីឯកូនស្រីពៅម្នាក់ទៅធ្វើការនៅឯប្រទេសថៃបាត់ដំណឹងឈឹង ហើយកូនប្រុសម្នាក់ទៀត និងកូនស្រីម្នាក់ផ្សេងទៀតបានទុកគាត់ចោលមិនដែលទៅមើលគាត់១ឆ្នាំកន្លងមកហើយ។
សព្វថ្ងៃគាត់ស្នាក់នៅតែម្នាក់ឯង នៅក្នុងបន្ទប់ផ្ទះជួលមួយកន្លែងទំហំប្រហែល៣ម៉ែត្រ៤ជ្រុងប៉ុណ្ណោះ ស្ថិតនៅក្នុងភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
ហើយការរស់នៅនោះ ស្ថិតក្នុងស្ថានភាពលំបាកយ៉ាងខ្លាំង ដោយសារតែលោកយាយមានជំងឺប្រចាំកាយដើរមិនរួច គ្មានប្រាក់សម្រាប់ព្យាបាលជំងឺទេ រង់ចាំតែថ្ងៃស្លាប់មកដល់តែប៉ុណ្ណោះ កុំថាឡើយប្រាក់សម្រាប់ព្យាបាលជំងឺនោះ សូម្បីតែអាហារសម្រាប់ការហូបចុកក៏គ្មានផង។ ចំណែកការស្នាក់នៅវិញ បានម្ចាស់ផ្ទះជួលមិនយកប្រាក់ជារៀងរាល់ខែ មិនតែប៉ុណ្ណោះម្ចាស់ផ្ទះជួល រួមជាមួយអ្នកជិតខាងបានជួយផ្ដល់បាយទឹកសម្រាប់ជាអាហារប្រចាំថ្ងៃដល់រូបគាត់ថែមទៀតផង។
នៅក្នុងស្ថានភាពលំបាករកទីបំផុតគ្មានបែបនេះ លោកយាយបានលើកដៃសំពះតាមរយៈកាសែតកោះសន្តិភាពដង្ហើយហៅសុំការសណ្ដោសប្រណីពីសម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចគតិបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា រួមជាមួយសប្បុរសជននានា មេត្តាជួយដល់លោកយាយនូវនាទីចុងក្រោយផង។
លោកយាយដ៏កំសត់ខាងលើបាននិយាយថា លោកយាយមិនចង់ស្លាប់ទេ ចង់រស់ និងចង់ជាសះស្បើយពីជំងឺនេះខ្លាំងណាស់ ដើម្បីបានរស់នៅប៉ុន្មានឆ្នាំទៀតមើលការអភិវឌ្ឍន៍របស់ប្រទេសជាតិនឹងគេ ប៉ុន្តែពេលនេះលោកយាយគ្មានប្រាក់សម្រាប់ព្យាបាលជំងឺឡើយ ទើបសុំឲ្យសម្ដេចទាំងទ្វេ និងសប្បុរសជនជួយដល់លោកយាយផង។ កន្លងមក អាជ្ញាធរសង្កាត់បានជួយផ្ដល់ជាអំណោយម្ដងដែរ ក្រោយមកក៏ស្ងាត់ទៅវិញដោយអាជ្ញាធរនិយាយថា មិនមានលទ្ធភាពជួយគាត់ទៀតឡើយ។
លោកយាយរៀបរាប់បន្តថា លោកយាយឈ្មោះ អៀង សុធីតា អាយុ៦៨ឆ្នាំ មានស្រុកកំណើតនៅសង្កាត់លេខ៤ ក្រុងភ្នំពេញ មានឪពុកឈ្មោះ អៀង ស្រឿង និងអ៊ុំប្រុសឈ្មោះ អៀង សាយ ដែលពួកគាត់ទាំង២នាក់គឺជាជាងគំនូរ និងចម្លាក់ព្រះវិហារព្រះកែវ ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។ (កែសម្រួលដោយ ៖ បុប្ផា)
ចែករំលែកព័តមាននេះ