ខេត្តស្វាយរៀង ៖ យុវជនម្នាក់ជិះម៉ូតូលឿនដូចហោះជ្រុលទៅបុកគូទរថយន្តមួយគ្រឿងលាន់ដូចរន្ទះ បណ្តាលឲ្យស្លាប់ភ្លាមៗនៅកន្លែងកើតហេតុ ចំណែកយុវជនម្នាក់ទៀតបានរងរបួសធ្ងន់ ។
ហេតុការណ៍ខាងលើនេះបានកើតឡើងកាលពីវេលាម៉ោង១រំលងអាធ្រាត្រឈានថ្ងៃទី២៧ ខែឧសភា ឆ្នាំ២០១៩ នៅលើកំណាត់ផ្លូវជាតិលេខ១ ស្ថិតក្នុងភូមិបាក់រនាស់ សង្កាត់សង្ឃ័រ ក្រុងស្វាយរៀង។
បើតាមសមត្ថកិច្ចនគរបាលក្រុងស្វាយរៀងបានឱ្យដឹងថា ភាគីខាងរថយន្ដដែលម៉ូតូបុកពីក្រោយនេះមិនស្គាល់ម៉ាកនោះទេ គ្រាន់តែដឹងថាជារថយន្ដប្រភេទដឹកទំនិញធុនធំ ក្រោយកើតហេតុអ្នកបើកបររថយន្តបានបើកគេចពីកន្លែងកើតហេតុ ។ចំណែកភាគីខាងម៉ូតូមួយគ្រឿងជិះគ្នា២នាក់ ម៉ាកហុងដា PCX ពណ៌ខ្មៅ ពាក់ផ្លាកលេខ ស្វាយរៀង ១O- ៤៨៤៩ (ពាក់ផ្លាកលេខក្លែងក្លាយ) បើកបរដោយឈ្មោះវ៉ោន សំណាង ភេទប្រុស អាយុ២០ឆ្នាំ មុខរបរកម្មកររោងចក្រ រស់នៅភូមិប្រសូត្រ ឃុំប្រសូត្រ ស្រុកស្វាយទាប ខេត្តស្វាយរៀង បានស្លាប់នៅកន្លែងកើតហេតុ រីឯអ្នករួមដំណើរម្នាក់ឈ្មោះយស់ វ៉ាន់ណេត ភេទប្រុស អាយុ២០ឆ្នាំ មុខរបរកម្មកររោងចក្រ រស់នៅភូមិពោធិ៍វង្ស ឃុំប្រសូត្រ ស្រុកស្វាយទាប ខេត្តស្វាយរៀង បានរងរបួសបាក់ជើង។
តាមប្រភពដដែលបានបន្តទៀតថា មុនកើតហេតុ មានរថយន្ដប្រភេទដឹកទំនិញធុនធំមួយគ្រឿងបើកបរពីលិចទៅកើត លុះមកដល់កន្លែងកើតហេតុ ស្រាប់តែមានម៉ូតូមួយគ្រឿងជិះគ្នា២នាក់បើកបរក្នុងទិសដៅស្របគ្នា និងក្នុងល្បឿនយ៉ាងលឿន បានបុកពីក្រោយរថយន្តដឹកទំនិញធុនធំលាន់ដូចរន្ទះ បណ្តាលឱ្យអ្នកបើកបរម៉ូតូស្លាប់នៅនឹងកន្លែងកើតហេតុ និងអ្នករួមដំណើរម្នាក់បានរងរបួសបាក់ជើង រីឯម៉ូតូបានរងការខូចខាតយ៉ាងដំណំ ។ ចំណែករថយន្តដឹកទំនិញបានបើកគេចបាត់ស្រមោល ។
ក្រោយពេលកើតហេតុ ម៉ូតូមួយគ្រឿងដែលរងការខូចខាតត្រូវបានសមត្ថកិច្ចយកទៅរក្សាទុកនៅអធិការក្រុងស្វាយរៀង រីឯអ្នករងរបួសធ្ងន់ម្នាក់ត្រូវបានបញ្ជូនទៅព្យាបាលនៅមន្ទីរពេទ្យខេត្តស្វាយរៀង ចំណែកសពជនរងគ្រោះត្រូវបានប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ