ខេត្តកំពង់ស្ពឺ ៖ ទីតាំងមួយកន្លែងស្ថិតក្នុងភូមិអូរកូនត្រុំ ឃុំត្រែងត្រយឹង ស្រុកភ្នំស្រួច បានត្រូវគេប្រទះ
ឃេីញគ្រាប់បែកប្រភេទទម្លាក់ពីលេីយន្ដហោះមួយគ្រាប់ កាលពីថ្ងៃទី២៧ខែឧសភា វេលាម៉ោងប្រមាណ១២ និង៣០នាទីថ្ងៃត្រង់ ។ បន្ទាប់ពីប្រទះឃើញ កម្លាំងនគរបាលសហការជាមួយអង្គភាពកម្ចាត់មីន(CMAC) ក៏បានទៅពិនិត្យយកគ្រាប់ខាងលេីចេញពីក្នុងរណ្ដៅដី គឺជាគ្រាប់បែកម៉ាក MK82ប្រភេទ២៧៥មីលី្លម៉ែត្រ ទម្ងន់២៤១គីទ្បូក្រាម ប្រវែង១៦៨សង្ទីម៉ែត្រ ។
គ្រាប់បែកនេះ ផលិតនៅសហរដ្ឋអាមេរិកដែលបន្សល់ទុកនៅច្រេីនកន្លែងខុសៗគ្នា ត្រូវបានរកឃេីញជាបន្ដបន្ទាប់ ។ ចំណែកគ្រាប់បែកដែលរកឃើញពេលនេះ គឺខណៈគ្រឿងចក្រកាយដីធ្វើស្រះទឹកនៅភូមិកូនត្រុំ ឃុំអូរ ស្រុកភ្នំស្រួច ស្ថិតក្នុងដីរបស់ឈ្មោះ អួង សុភ័ណ្ឌ ជាស្មៀនឃុំអូរ ឃើញគ្រាប់ក្នុងដីជម្រៅប្រហែល៥ម៉ែត្រ ។
តាមការបញ្ជាក់របស់មន្ដ្រី CMAC ឲ្យដឹងថា គ្រាប់បែកនេះ តាមការពិនិត្យគឺមិនទាន់ផ្ទុះឆេះទេ មូលហេតុអាចមកពីការទម្លាក់នោះដោយស្ថានភាពចាំបាច់បំផុត ទេីបមិនទាន់ផ្ទុះ ហើយបច្ចុប្បន្នកម្លាំង CMAC បានដឹកចេញពីទីតាំងដេីម្បីយកទៅកម្ទេចចោលតាមលក្ខណៈបច្ចេកទេស ។ ចំពោះស្ថានភាពគ្រាប់នេះបើក្នុងករណីមិនយកតាមបច្ចេកទេសទេ គឺអាចបង្កគ្រោះថ្នាកជាយថាហេតុ ។
គ្រាប់បែកប្រភេទ MK82 គឺជាគ្រាប់បែកទម្លាក់ពីលើយន្តហោះបេ៥២ របស់សហរដ្ឋអាមេរិក ដែលបានទម្លាក់នៅក្នុងឆ្នាំ១៩៧៣លើទឹកដីកម្ពុជា ៕ (សម្រួលដោយ៖ ស្រីណា)
ចែករំលែកព័តមាននេះ