រាជធានីភ្នំពេញ ៖ តារាកំប្លែងអ្នកនាង ខ្ញុង បានរង្គាសចិត្តយ៉ាងខ្លាំងចំពោះការរិះគន់ពីមហាជនមួយចំនួន ដែលបានវាយប្រហារមកលើរូបនាងដែលបានបង្អួតសម្ភារៈនិយមនិងមានតម្លៃថ្លៃ។
តារារូបនេះបានទទួលការរិះគន់ និងការវាយប្រហារមួយចំនួនពីមហាជន បន្ទាប់ពីមួយរយៈចុងក្រោយនេះ នាងតែងតែបង្ហាញនូវសម្ភារៈលម្អមួយចំនួន ជាពិសេសការទិញរថយន្តថ្មីដែលមានតម្លៃរាប់ម៉ឺនដុល្លារ។
អ្នកនាង ស្រេង សុកាន់ដា ហៅ ខ្ញុង បានលើកឡើងថា «ខ្ញុំបង្ហាញអ្វីគ្រប់យ៉ាងដែលខ្ញុំមាន ព្រោះខ្ញុំចង់បញ្ជាក់ថា ការប្រឹងប្រែងតស៊ូរបស់ខ្ញុំ វាមិនអត់ប្រយោជន៍នោះទេ។ ខ្ញុំសុខចិត្តឱ្យអ្នកឯងថា ខ្ញុំអួត វាប្រសើរជាងឱ្យអ្នកឯងដៀលខ្ញុំថា មីអត់កំណើតដែរ» ។
ជាការកត់សម្គាល់ការបង្ហាញនូវសម្ភារៈដែលមានតម្លៃថ្លៃរបស់អ្នកនាង ខ្ញុង នាពេលនេះហាក់មិនមានអ្វីចម្លែកឡើយ ក្នុងពេលការងារសិល្បៈរបស់នាងកំពុងតែកាក់កបខ្លាំង។
ក្រៅពីសម្តែងកំប្លែងប្រចាំស្ថានីយទូរទស្សន៍ CTN អ្នកនាង ខ្ញុង ក៏មានការកាក់កបខ្លាំងនៅក្នុងការដើរច្រៀងកាត់សក់តាមរោងការផ្សេងៗ ក្រៅពីនោះនាងក៏មានមុខរបរលក់សាច់ក្រក និងត្រីប្រហុក ផ្អក តាមអនឡាញផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ