រាជធានីភ្នំពេញ៖ អ្នកនាងចន ច័ន្ទលក្ខិណា បានវាយបកតបវិញភ្លាមទៅកាន់ស្ត្រីម្នាក់ដែលរិះគន់លោកហេង ឡុង ចំពោះរឿងលោកឧកញ៉ាឡេង ណាវ៉ាត្រា យកលុយរៀលជាច្រើនទៅជួយមន្ទីរពេទ្យគន្ធបុប្ផា ។ ការរិះគន់របស់ស្ត្រីនោះបន្ទាប់ពីលោកហេង ឡុង ជាគូស្នេហ៍អ្នកនាងចន ច័ន្ទលក្ខិណា បានបង្ហោះសារតបទៅមហាជនដែលរិះគន់រឿងយកលុយរៀលមើលទៅយ៉ាងច្រើនសន្ធឹកទៅជូនមន្ទីរពេទ្យគន្ធបុប្ផាពីឧកញ៉ាវ័យក្មេងរូបនោះ ។
លោកហេងឡុងបានចាត់ទុកការរិះគន់នោះថា ជាការប្រមាថលើក្រដាសប្រាក់រៀលខ្មែរ ហើយលោកនឹងប្រើក្រដាស១០០រៀលពេលចូលរួមកម្មវិធីនេះដូចគ្នានៅឆ្នាំក្រោយ ។ ការសរសេរបែបនេះធ្វើឲ្យស្ត្រីម្នាក់សម្តែងការហួសចិត្ត ហើយបង្ហោះសារឆ្លើយតបវិញថា «ហេង ឡុងអើយលោកហេង ឡុង បើលុយលោកហេងឡុងឯងទៀត មិនដឹងលោកឯងអំនួតយ៉ាងណាទេ ។
គាំទ្រឧកញ៉ាស៊ីណាវ៉ាត្រាធ្វើបានត្រឹមត្រូវ សម្រាប់ការងារសប្បុរសធម៌ជួយដល់មន្ទីរពេទ្យកុមារ តែការគាំទ្រលុយខ្មែររហូតដូរក្រដាស៥០០រៀល ខ្ញុំគិតថាមិនមែនជាគំនិតលោកទេ ច្បាស់ជាទីប្រឹក្សាណាមួយរបស់លោកផ្តល់យោបល់បែបនេះរហូតត្រូវបានមិត្តអ្នកអានគិតថា រាងជោរបន្តិចហើយ។ សុំទោសដែលនិយាយ ត្រង់ៗ ព្រោះមាត់ខ្ញុំស៊ីអំបិលប្រហុក មិនសូវបានញ៉ាំអាហារឆ្ងាញ់ក៏ពិតមែន តែសុំចេញយោបល់តិចតួចថា លោកគួរដាក់ក្រដាស១ម៉ឺន ឬ២ម៉ឺនរៀលវិញល្អជាជាង។ ចៀសវាងគេរិះគន់ធ្វើបុណ្យយកមុខ តាមពួកជោរ តែយ៉ាងណាក៏គាំទ្ររាល់សកម្មភាពមនុស្សធម៌របស់លោកឧកញ៉ាណាវ៉ាត្រាជានិច្ច »។
សារនេះបានធ្វើឲ្យប្រធានសមាគមសិល្បករខ្មែរអ្នកនាងចន ច័ន្ទលក្ខិណា ឆ្លើយតបវិញភ្លាមៗ ។ នាងបានបង្ហោះសារទៅវិញកាលពីថ្ងៃទី២៧ ឧសភា ២០១៩ថា «មាត់នាងមិនត្រឹមស៊ីអំបិលប្រហុកទេ ស៊ីទាំងសិចហុកទៀត ឮគេប្រាប់ថាក្នុង Group អ្នកណាៗមិនដឹងមាត់ដ៏សែនចំអេសចំអាសរបស់នាង កុំថាតែស្រី សូម្បីតែ ប្រុសៗក៏ញញើតនឹងសម្តីដ៏សែនរោលរាលដុតអារម្មណ៍សិចរបស់នាងដែរ ។
សុំទោសដែលនិយាយត្រង់ដូចគ្នា នាងព្យាយាមគេចមិនរិះគន់ឡេង ណាវាត្រា តែអូសហេង ឡុង មកវាយប្រហារ មានបំណងអ្វី ? ឬក៏នាងខ្លាចឧកញ៉ាខឹង ? ឮថាចូលចិត្តអែបអបតាមស៊ីពែ អ្នកធំៗណាស់យើងហ្នឹង អុីចឹងមែនអត់ ? នាងព្យាយាមនិយាយប៉ះពាល់ពួកខ្ញុំច្រើនដងហើយ តែខ្ញុំមិនតប កុំញយពេក កុំបានចិត្តពេក កុំឃើញពួកខ្ញុំចូលធ្វើការក្រោយ នាងៗចង់ជាន់ស្រេចតែចិត្ត ឃើញគេមិនតបចេះតែជាន់គេរហូត នាងមើលអំពើរបស់នាងផង ។ មានអ្នកហាមមិនឲ្យខ្ញុំផុសថាសុទ្ធតែគ្នាឯង តែគ្នាឯងខ្លះមិនសប្បាយចិត្តជាមួយអ្នកខំប្រឹងធ្វើការឲ្យល្អទេ ។ ចិត្តអំណត់មានព្រំដែន »៕ (កែសម្រួលដោយ ៖ បុប្ផា)
ចែករំលែកព័តមាននេះ