រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោក សុខ ឥសាន បានបញ្ជាក់ថាអ្នកដែលចង់ឲ្យបក្សប្រឆាំងរស់ឡើងវិញ គឺចង់ឲ្យលទ្ធិប្រជាធិបតេយ្យនៅកម្ពុជាបាត់បង់ ។ ការអះអាងនេះ បន្ទាប់ពីសមាជិកបក្សសង្គ្រោះជាតិចង់ឲ្យមានវត្តមានគណបក្សសង្គ្រោះជាតិដែលតុលាការកំពូលរំលាយ កាលចុងឆ្នាំ២០១៧ឡើងវិញ ។
យ៉ាងណាក្តីលោកសុខ ឥសាន បានសរសេរលើបណ្តាញសង្គមតេឡេក្រាម យ៉ាងដូច្នេះថា ការចង់ឲ្យអតីតបក្សប្រឆាំងរស់ឡើងងវិញមិនមែនជាការស្តាលទ្ធិប្រជាធិបតយ្យទេ តែគឺជាការសម្លាប់នីតិរដ្ឋនៅកម្ពុជា ។ លោកបន្តថា អតីតបក្សប្រឆាំងមិនមែនជាអាទិទេពទេ គឺ អតីតបក្សប្រឆាំងក៏ដូចជា គណបក្សនានាដែលមាននៅកម្ពុជា ស្មើគ្នា ចំពោះមុខច្បាប់ មិនមែនប៉ះពាល់មិនបាននោះទេ ។ មិនមែនអត់ពីអតីតបក្សប្រឆាំងមួយនេះ កម្ពុជាអត់លទ្ធិប្រជាធិបតេយ្យទេ។
លោកបន្តថា លទ្ធិប្រជាធិបតេយ្យ និងសិទ្ធិមនុស្សនៅកម្ពុជា មិនល្អឥតខ្ចោះទេ តែបាន និងកំពុងមានការវិវត្តន៍រីកចម្រើន ។ ដូច្នេះ អត់មានលិចលង់ដែលត្រូវស្តានោះទេ មានតែខិតខំពង្រឹងថែមជាបន្តបន្ទាប់ជានិច្ច ជាកាល ដើម្បីឲ្យវារឹងមាំ និងស្ថិតស្ថេរ ។
លោក យ៉ែម បុញ្ញាឬទ្ធិន អតីតអ្នកនាំពាក្យគណបក្សប្រឆាំងបានលើកឡើងថា លោកចង់ឲ្យការស្តាលទ្ធិប្រជាធិបតេយ្យ គោរពសិទ្ធិមនុស្ស ព្រមទាំងមានការដោះលែងលោក កឹម សុខា អតីតប្រធានគណបក្សសង្គ្រោះជាតិ ដែលកំពុងស្ថិតនៅក្នុងផ្ទះមិនអាចចេញទៅបានទេ ។ លោកថា នៅពេលដែលយើងគិតថា ខ្មែរជាបងជាប្អូន (ភាតរភាព) មានមាតាកម្ពុជាតែមួយ មិនសម្លឹងគិតថា ខ្មែរជាសត្រូវ និងចាត់ទុកថាមតិរាស្ត្រជាកញ្ចក់របស់រដ្ឋ ពេលនោះកម្លាំងជាតិនឹងខ្លាំង…៕ កែសម្រួលដោយ ៖ សុឃាក់
ចែករំលែកព័តមាននេះ