រាជធានីភ្នំពេញ ៖ កាលពីវេលាម៉ោង៩និង៣០នាទីយប់ថ្ងៃទី២៣ ខែ ឧសភា ឆ្នាំ ២០១៩ កម្លាំងសមត្ថកិច្ចនគរបានការិយាល័យព្រហ្មទណ្ឌកំរិតស្រាលរាជធានីភ្នំពេញ បានធ្វើការស្រាវជ្រាវ និងឈានដល់ការឃាត់ខ្លួនជនសង្ស័យម្នាក់នៅចំណុចមុខផ្ទះលេខ១៩អា ផ្លូវលេខ៣២៤ សង្កាត់បឹងសាឡាង ខណ្ឌទួលគោក រាជធានីភ្នំពេញ ខណៈដែលជនសង្ស័យម្នាក់នេះធ្លាប់ជាប់ពន្ធនាគារច្រើនលើក លុះពេលចេញមកវិញបានធ្វើសកម្មភាពឆក់កាបូបពីស្ត្រីម្នាក់ទៀតនោះ ហើយក៏ត្រូវសមត្ថកិច្ចចាប់ខ្លួនដាក់ពន្ធនាគារជាថ្មីទៀត ។
ជនសង្ស័យម្នាក់ខាងលើឈ្មោះ ចាន់ សុខពៅ ហៅសុង ពៅ ហៅ ពៅអាម៉ាប់ ភេទប្រុស អាយុ៣២ឆ្នាំ មុខរបរ និងទីលំនៅមិនពិតប្រាកដ ។
លោកវរសេនីយ៍ឯក ប៊ុន សន្យា នាយការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញបានឲ្យដឹងថា កាលពីវេលាម៉ោង៣និង២០នាទីរសៀលថ្ងៃទី២០ ខែឧសភា ឆ្នាំ២០១៩ មានករណីជនសង្ស័យម្នាក់ជិះម៉ូតូមួយគ្រឿងបានធ្វើសកម្មភាពឆក់កាបូបយួរដៃពណ៌ផ្ទៃមេឃពីស្ត្រីរងគ្រោះម្នាក់ ដែលបានប្រព្រឹត្តនៅចំណុចផ្លូវលេខ១៦៣ កែងផ្លូវលេខ៤១៨ ក្រុម២១ ភូមិ៣ សង្កាត់ទួលទំពូង២ ខណ្ឌចំការមន រាជធានីភ្នំពេញ ។
មន្ត្រីនគរបាលព្រហ្មទណ្ឌបានឱ្យដឹងបន្តថា បន្ទាប់ពីមានករណីឆក់ខាងលើកើតឡើងនោះ កម្លាំងសមត្ថកិច្ចរបស់លោកបានបើកការស៊ើបអង្កេត និងស្រាវជ្រាវ រហូតឈានដល់ការឃាត់ខ្លួនជនសង្ស័យម្នាក់ឈ្មោះ ចាន់ សុខពៅ ហៅ អាម៉ាប់ នេះ ។ ជនសង្ស័យដែលមានរហស្សនាមថា អាម៉ាប់ នេះធ្វើសកម្មភាពឆក់ច្រើនលើកមកហើយ និងត្រូវបានសមត្ថកិច្ចចាប់ខ្លួនជាច្រើនលើក និងស្ទើរគ្រប់បណ្តាខណ្ឌផងដែរ ប៉ុន្តែឈ្មោះ អាម៉ាប់ នេះ លុះពេលចញពីពន្ធនាគារវិញនៅតែធ្វើសកម្មភាពឆក់ដដែល ។
មន្ត្រីនគរបាលព្រហ្មទណ្ឌឲ្យដឹងបន្តទៀតថា វត្ថុតាងចាប់យកពីជនសង្ស័យឈ្មោះ អាម៉ាប់ រួមមានម៉ូតូមួយគ្រឿងម៉ាកហុងដាឃ្លីក ពណ៌ទឹកប្រាក់ ស៊េរីឆ្នាំ២០១៩ ពាក់ស្លាកលេខ ភ្នំពេញ ១HQ-៣២១៧ ជាមធ្យោបាយជិះធ្វើសកម្មភាព ។
មន្ត្រីនគរបាលព្រហ្មទណ្ឌបានឱ្យដឹងបន្តទៀតថា មុនពេលចាប់ខ្លួន ជនសង្ស័យបានធ្វើសកម្មភាពឆក់កាបូបពីជនរងគ្រោះម្នាក់ឈ្មោះ Zhang LiLi ភេទស្រី អាយុ៤២ឆ្នាំ ជាជនជាតិចិន កាន់លិខិតឆ្លងដែនលេខ E១៨១៧០៦២៤ ស្នាក់នៅភូមិរាម ឃុំរាម ស្រុកព្រៃនប់ ខេត្តព្រះសីហនុ ជាបុគ្គលិកក្រុមហ៊ុនហើយនៅក្នុងកាបូបយួរដៃពណ៌ផ្ទៃមេឃ មានដូចជា លិខិតឆ្លងដែនចំនួន១, ប្រាក់ចំនួន៥០០០ដុល្លារ, ទូរសព្ទ័ដៃចំនួន២គ្រឿង និងបណ្ណ័បើកបររថយន្ត១ច្បាប់ ។
បច្ចុប្បន្ន ជនសង្ស័យ និងវត្ថុតាងត្រូវបានសមត្តកិច្ចកសាងសំណុំរឿងបញ្ជូនទៅសាលាដំបូងរាជធានីភ្នំពេញដើម្បីចាត់ការតាមនីតិវិធី ៕
ចែករំលែកព័តមាននេះ