រាជាធានីភ្នំពេញ ៖ សមាគមគ្រឹះស្ថានឧត្តមសិក្សាកម្ពុជាបានហៅការបោះឆ្នោតក្រុមប្រឹក្សា រាជធានីក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាខណ្ឌ ក្រុមប្រឹក្សាស្រុក ដែលបានប្រព្រឹត្តទៅ កាលពីថ្ងៃទី២៦ ខែឧសភានេះថា បានប្រព្រឹត្តទៅដោយរលូនគោរពច្បាប់ គោរពសិទ្ធិមនុស្សគ្មានការបង្ខិតបង្ខំ គ្មានអំពើហិង្សា គ្មានការភ័យខ្លាច ជាពិសេសស្ថិតក្នុងបរិយាកាសនយោបាយ ប្រជាធិបតេយ្យសេរីពហុបក្សនេះ បើតាមសេចក្ដីថ្លែងការណ៍ចុះថ្ងៃទី២៦ ខែឧសភានេះ ។
សមាគមគ្រឹះស្ថានឧត្តមសិក្សាកម្ពុជាលើកឡើងថា នៅក្នុងការបោះឆ្នោតជ្រើសរើសក្រុមប្រឹក្សាអាណត្តិទី៣ ឆ្នាំ២០១៩ សមាគមគ្រឹះស្ថានឧត្តមសិក្សាកម្ពុជាដែលមានគ្រឹះស្ថានសិក្សាឯកជនចំនួន១០៦ ជាសមាជិកបានចាត់តាំងសមាជិកចំនួន២៣៤ ដែលជានិស្សិតសាស្ត្រាចារ្យបញ្ញវន្ត គណៈគ្រប់គ្រងគ្រឹះស្ថានសិក្សាគ្រប់ដណ្ដប់ តាមការិយាល័យបោះឆ្នោតទាំង២៥រាជធានីខេត្ត ទូទាំងប្រទេសជាលក្ខណៈចល័ត និងអចល័ត ដើម្បីធ្វើការសង្កេតមើលការបោះឆ្នោតនេះ ។
ផ្អែកតាមការសង្កេតយ៉ាងយកចិត្តទុកដាក់ហ្មត់ចត់ និងប្រកបដោយការទទួលខុសត្រូវលើ ការងារបោះឆ្នោតជ្រើសរើសក្រុមប្រឹក្សានេះ សមាគមគ្រឹះស្ថានឧត្ដមសិក្សាកម្ពុជាបានសង្កេត ឃើញថា ទី១- ការចុះឈ្មោះគណបក្ស ការបើកទីស្នាក់ការគណបក្ស ការលើកស្លាកគណបក្ស ការចុះឈ្មោះភ្នាក់ងារគណបក្ស និងអ្នកសង្កេតការណ៍ជាតិ និងអន្តរជាតិ និងសកម្មភាពឃោសនា រកសំឡេងឆ្នោតសកម្មភាពរបស់អ្នកសង្កេតការណ៍ អ្នកសារព័ត៌មាន បានប្រព្រឹត្តទៅដោយរលូន គ្មានអំពើហិង្សា គ្មានការជាប្រមាថ គ្មានការសម្លុតគំរាមកំហែងគ្នា និងគ្មានការលក់ដូរសន្លឹកឆ្នោត ។ ទី២- ការចុះឈ្មោះអ្នកបោះឆ្នោតការពិនិត្យមើលឈ្មោះ អ្នកបោះឆ្នោតការអញ្ជើញទៅបោះឆ្នោត ពេលតម្រង់ជួរ ពេលចូលទៅបោះឆ្នោត និងត្រឡប់ចេញមកវិញ គឺដោយស្ម័គ្រចិត្ត គ្មានការបង្ខិតបង្ខំប្រកបដោយទឹកមុខរីករាយ ។
ទី៣-ទឹកថ្នាំពណ៌ជ្រលក់ប្រាមដៃ មានគុណភាពល្អ ដែលយកជាការបាន ។ ទី៤- ស្ថានភាពរស់នៅប្រចាំថ្ងៃរបស់ប្រជាពលរដ្ឋមានលក្ខណៈធម្មតា គ្មានភ័យខ្លាចអ្វីទាំងអស់ ។ ទី៥- អាជ្ញាធរដែនដី ដែលត្រូវគ្រប់គ្រងរដ្ឋជាធម្មតា ជាពិសេសគ្រប់គ្រងថែរក្សាសន្តិសុខសង្គម ដោយមិនរើសអើងគណបក្ស ។ ទី៦- មន្ត្រី គ.ជ.ប នៅតាមការិយាល័យអនុវត្តភារកិច្ចរបស់ខ្លួនទៅតាមនីតិវិធីដោយរលូន ក្នុងថ្ងៃបោះឆ្នោតក៏ដូចជា ដំណើរការបោះឆ្នោតការរាប់សន្លឹកឆ្នោត និងការបូកសរុបលទ្ធផលជាដើម ។ ផ្អែកទៅលើលទ្ធផលនៃការសង្កេតខាងលើនេះសមាគមគ្រឹះស្ថានឧត្តមសិក្សាកម្ពុជាបានសន្និដ្ឋានថា «ការបោះឆ្នោតជ្រើសរើសក្រុមប្រឹក្សាអាណត្តិទី៣ ឆ្នាំ២០១៩នេះពិតជាបានប្រព្រឹត្តទៅដោយរលូនគោរពច្បាប់គោរពសិទ្ធិមនុស្សគ្មានការបង្ខិតបង្ខំ គ្មានអំពើហិង្សា គ្មាន ការភ័យខ្លាចគ្មានការលក់ដូរសន្លឹកឆ្នោតស្ងប់ស្ងាត់មានសណ្ដាប់ធ្នាប់ល្អ និងស្ថិតក្នុង បរិយាកាសនយោបាយប្រជាធិបតេយ្យសេរីនិងពហុបក្ស » ។
ចំណែកស្ថាប័ន គ.ជ.ប ជាស្ថាប័នតែមួយគត់របស់ជាតិបានអនុវត្តការបោះឆ្នោតជ្រើសរើសក្រុមប្រឹក្សាអាណត្តិទី៣នេះ ស្របទៅតាមច្បាប់បោះឆ្នោត និងលិខិតបទដ្ឋានគតិយុត្តិ និងបានប្រកាន់យកជំហរអព្យាក្រឹត យុត្តិធម៌ស្អាតស្អំ និងតម្លាភាព ។
សូមបញ្ជាក់ថា ការបោះឆ្នោតជ្រើសរើសក្រុមប្រឹក្សារាជធានីខេត្តក្រុងស្រុកខណ្ឌអាណត្តិទី៣ ឆ្នាំ២០១៩ បានប្រព្រឹត្តិទៅកាលពីថ្ងៃអាទិត្យ ទី២៦ ខែឧសភា ឆ្នាំ២០១៩ ហើយបើតាមការ បញ្ជាក់ពីអ្នកចូលរួមក៏ដូចជា គណៈកម្មាធិការជាតិរៀបចំការបោះឆ្នោត ( គ . ជ . ប ) ដំណើរការ នេះបានប្រព្រឹត្តទៅក្នុងបរិយាកាសមួយល្អគ្មានការរំខានណាមួយនោះទេ ក្នុងក្របខ័ណ្ឌទូទាំងប្រទេស ហើយអង្គបោះឆ្នោតក៏បានចូលរួមយ៉ាងសស្រាក់សស្រាំផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ