ចុះពិនិត្យចិនកំពុងរកស៊ីលើដីប៉ៃលិន…មានអ្នកអត់ច្បាប់មែន
- ប៉ៃលិន
ខេត្តប៉ៃលិន ៖ កាលពីព្រឹកថ្ងៃទី២៧ ឧសភា លោកជំទាវ ជា លាភ អភិបាលរងខេត្ត លោកជំទាវ ស៊ុំ…
ខេត្តប៉ៃលិន ៖ កាលពីព្រឹកថ្ងៃទី២៧ ឧសភា លោកជំទាវ ជា លាភ អភិបាលរងខេត្ត លោកជំទាវ ស៊ុំ ហៀង ប្រធានសភាពាណិជ្ជកម្មខេត្ត លោកសុខ សាធីម ប្រធានមន្ទីរពាណិជ្ជកម្មខេត្ត និងអាជ្ញាធរពាក់ព័ន្ធបានធ្វើការចុះត្រួតពិនិត្យ និងធ្វើបច្ចុប្បន្នភាពលើស្លាកសញ្ញាអាជីវកម្ម និងច្បាប់អាជីវកម្មដ ែលជនជាតិចិនកំពុងប្រកបរបរនៅលើទឹកដីខេត្តប៉ៃលិន ស្ថិតនៅចំណុចភូមិផ្សារព្រំ ឃុំស្ទឹងកាច់ ស្រុកសាលាក្រៅ ។ ជាលទ្ធផលក៏បានរកឃើញថា មានជនជាតិចិនប្រកបរបរអាជីវកម្មអត់ច្បាប់អនុញ្ញាតត្រឹមត្រូវចំនួន១០កន្លែង និងសរសេរអក្សរចិននៅខាងលើអក្សរខ្មែរមួយកន្លែងផងដែរ ។
លោកសុខ សាធីម ប្រធានមន្ទីរពាណិជ្ជកម្មខេត្ត បានធ្វើការណែនាំ និងពន្យល់ដល់ជនជាតិចិន ដែលជាម្ចាស់ហាងអំពីច្បាប់ស្តីពីសហគ្រាសពាណិជ្ជកម្ម ច្បាប់ស្តីពីវិធានពាណិជ្ជកម្ម និងបញ្ជីពាណិជ្ជកម្ម ច្បាប់ស្តីពីពាណិជ្ជនាម ព្រមទាំងនីតិវិធី ក្នុងការស្នើសុំនាមករណ៍ផ្លូវការ សម្រាប់អាជីវកម្ម ឬក្រុមហ៊ុននៅក្នុងប្រទេសកម្ពុជា ។
លោកបន្តថា ត្រូវបំពេញលក្ខខណ្ឌបីចំណុច ៖ ទី១-ត្រូវប្រើប្រាស់អក្ខរាវិរុទ្ធឱ្យបានត្រឹមត្រូវ ចំពោះស្លាកយីហោជាភាសាខ្មែរ ទី២-ការលើកស្លាកយីហោ ត្រូវសុំការអនុញ្ញាតជាមុនពីក្រសួង ឬមន្ទីរពាណិជ្ជកម្ម និងស្ថាប័នពាក់ព័ន្ធ និងទី៣-ការដាក់ពាក្យសុំលើកស្លាកយីហោអាជីវកម្ម ត្រូវធ្វើតាមរយៈច្រកចេញចូលតែមួយរបស់សាលារាជធានីខេត្ត» ទើបស្របតាមច្បាប់ត្រឹមត្រូវ ។
លោកបន្ថែមបន្តថា ក្រសួងពាណិជ្ជកម្ម ក៏ដូចជាមន្ទីរពាណិជ្ជកម្មខេត្ត បានជំរុញនិងលើកកម្ពស់បរិយាកាសធុរកិច្ច និងវិនិយោគ ព្រមទាំងការខិតខំពង្រឹងការអនុវត្តន៍ច្បាប់បញ្ញា និងច្បាប់ពាក់ព័ន្ធនៅក្នុងប្រទេសកម្ពុជា ដើម្បីធានាដល់ការលូតលាស់នៃវិស័យឯកជន ដែលបានរួមចំណែកកំណើនសេដ្ឋកិច្ចជាតិ ។
ដូច្នេះ ក្នុងនាមថ្នាក់ដឹកនាំខេត្តសំណូមពរឱ្យជំនាញពាក់ព័ន្ធ ជាពិសេសមន្ទីរពាណិជ្ជកម្ម និងសភាពាណិជ្ជកម្មខេត្ត ត្រូវតែតាមដានត្រួតពិនិត្យ និងណែនាំដល់ម្ចាស់អាជីវកម្មដែលលើកស្លាកយីហោ ដែលខុសច្បាប់ និងខុសអក្ខរាវិរុទ្ធ ត្រូវកែតម្រូវស្រមតាមច្បាប់ ។ (សម្រួលដោយ៖ ស្រីណា)
ចែករំលែកព័តមាននេះ