រាជធានីភ្នំពេញ ៖ ប្រទេសកម្ពុជានឹងមានច្បាប់មួយបើកអនុញ្ញាតឲ្យមានការដាំដុះ និងការប្រើប្រាស់ផលិតផលឬស្សី និងផ្តៅជាលក្ខណៈអន្តរជាតិ ដើម្បីជួយលើកកម្ពស់ពីជីវភាពរបស់ប្រ ជាពលរដ្ឋមួយកម្រិតទៀត ។ លោកវេង សាខុន…
រាជធានីភ្នំពេញ ៖ ប្រទេសកម្ពុជានឹងមានច្បាប់មួយបើកអនុញ្ញាតឲ្យមានការដាំដុះ និងការប្រើប្រាស់ផលិតផលឬស្សី និងផ្តៅជាលក្ខណៈអន្តរជាតិ ដើម្បីជួយលើកកម្ពស់ពីជីវភាពរបស់ប្រ ជាពលរដ្ឋមួយកម្រិតទៀត ។ លោកវេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទបានលើកឡើងសិក្សាលើសេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងស្ដីពីការបង្កើតអង្គការបណ្ដាញអន្តរជាតិសម្រាប់ឫស្សី និងផ្តៅនៅរសៀលថ្ងៃទី២៧ ខែឧសភា ឆ្នាំ២០១៩ នៅវិមានរដ្ឋសភាថា អង្គការបណ្ដាញអន្តរជាតិសម្រាប់ឫស្សី និងផ្តៅ ដែលហៅកាត់ថា អ៊ីនបា (INBAR : Intern ational Network for Bamboo and Rattan) គឺជាអង្គការអន្តររដ្ឋាភិបាលមួយបង្កើតឡើងនៅឆ្នាំ១៩៩៧ ដោយសន្ធិសញ្ញាដែលបានតម្កល់ទុកនៅអង្គការសហប្រជាជាតិ ។
លោកបន្តថា គោលនយោបាយ និងផែនការយុទ្ធសាស្ត្ររបស់អង្គការនេះ គឺដើម្បីលើកកម្ពស់ជីវភាពប្រជាពលរដ្ឋ និងកែប្រែទម្លាប់ប្រជាពលរដ្ឋពីការប្រើប្រាស់ឈើមកប្រើប្រាស់ឫស្សី និងផ្តៅតាមរយៈការអភិវឌ្ឍន៍ការងារដាំដុះ និងការកែច្នៃឫស្សី និងផ្តៅតាមគោលការណ៍អភិវឌ្ឍន៍ បៃតង ។ លោករដ្ឋមន្ត្រីបានបន្តថា ការចូលសមាជិកភាពអង្គការបណ្ដាញអន្តរជាតិសម្រាប់ឫស្សី និងផ្តៅ គឺបើកចំហសម្រាប់ប្រទេសទាំងឡាយណាដែលជាសមាជិកនៃអង្គការសហប្រជាជាតិ ។
គិតត្រឹមខែកញ្ញា ឆ្នាំ២០១៨នេះ អង្គការបណ្ដាញអន្តរជាតិសម្រាប់ឫស្សី និងផ្តៅមានសមាជិកសរុបចំនួន៤៣ប្រទេស ។ រដ្ឋសមាជិកអាស៊ានដែលមិនទាន់បានចូលជាសមាជិកអង្គការបណ្ដាញអន្តរជាតិសម្រាប់ឫស្សី និងផ្តៅមានចំនួន៤ គឺកម្ពុជា ប្រ៊ុយណេ សិង្ហបុរី និងឡាវ ។ លោកវេង សាខុន ក៏បានលើកឡើងទៀតថា ចំពោះការចូលជាសមាជិកពេញសិទ្ធិនៃអង្គការបណ្តាញអន្តរជាតិសម្រាប់ឫស្សី និងផ្តៅ គឺតម្រូវឲ្យមានការសម្រេចជាផ្លូវការពីរដ្ឋាភិបាលតាមរយៈការដាក់តម្កល់នូវឯកសារលិខិតូបករណ៍នៃការផ្ដល់សច្ចាប័ន ។
ដោយឡែក សម្រាប់ព្រះរាជាណាចក្រកម្ពុជាក៏ដូចជា ប្រទេសផ្សេងទៀតដែលមិនទាន់បានដាក់តម្កល់នូវឯកសារលិខិតូបករណ៍នៃការផ្ដល់សច្ចាប័ននេះអាចចូលរួមប្រជុំបានតាមការអញ្ជើញក្នុងឋានៈជាអ្នកសង្កេតការណ៍ប៉ុណ្ណោះ ។ លោកគូសបញ្ជាក់ថា«នៅពេលដែលកម្ពុជាបានចូលជាសមាជិកពេញសិទ្ធិ កម្ពុជានឹងទទួលបាននូវផលប្រយោជន៍ជាច្រើនតាមរយៈការបណ្ដុះបណ្ដាល និងកសាងសមត្ថភាពការផ្តល់ប្រឹក្សាជំនាញ ការផ្ដល់ជំនាញគម្រោងបច្ចេកទេស ការអភិវឌ្ឍ ការកែច្នៃឫស្សី និងផ្តៅ និងការគ្រប់គ្រងប្រកបដោយនិរន្តរភាព ។
មិនត្រឹមតែប៉ុណ្ណោះវានឹងជួយជំរុញឲ្យមានការដាំដុះ និងការប្រើប្រាស់ផលិតផលធ្វើអំពីឫស្សី និងផ្តៅកាន់តែមានការរីកចម្រើនឡើងថែមទៀតនៅប្រទេសកម្ពុជា កាត់បន្ថយការប្រែប្រួលអាកាសធាតុ គ្រោះមហន្តរាយធម្មជាតិ និងជួយបន្សាំមជ្ឈដ្ឋានព្រមទាំងស្តារគម្របព្រៃឈើឡើងវិញឆ្លើយតបទៅនឹងគោលនយោបាយវិស័យ ព្រៃឈើជាតិ និងផែនការយុទ្ធសាស្ត្រអភិវឌ្ឍន៍ជាតិរបស់កម្ពុជា» ។
លោកជា វ៉ាន់ដេត ប្រធានគណៈកម្មការផែនការវិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹកនៃរដ្ឋសភា និងលោកឈាង វុន គណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភាបានថ្លែងអំណរគុណចំពោះវត្តមានរបស់ លោករដ្ឋមន្ត្រី និងសហការី ដែលបានអញ្ជើញចូលរួមប្រជុំជាមួយគណៈកម្មការជំនាញរបស់រដ្ឋសភា ក្នុងការពិនិត្យសិក្សាលើសេចក្តីព្រាងច្បាប់ ស្តីពីការអនុម័តយល់ព្រមលើកិច្ចព្រមព្រៀងស្ដីពីការបង្កើតអង្គការបណ្ដាញអន្តរជាតិសម្រាប់ឫស្សី និងផ្តៅ ៕ កែសម្រួលដោយ ៖ សុឃាក់
ចែករំលែកព័តមាននេះ