រាជធានីភ្នំពេញ ៖ យុវជន៣នាក់ព្រួតគ្នាវាយប្រតាយប្រតប់ជាមួយនឹងបុរសម្នាក់ទៀតដែលកំពុងជិះម៉ូតូដឹកប្រពន្ធ ដោយសារតែយុវជនទាំង៣នាក់ខឹងបុរសម្នាក់នោះស្រែកប្រាប់ថា «ជិះម៉ូតូរេពេញផ្លូវ ប្រយ័ត្នជិះម៉ូតូចូលរថយន្ត»។
ហេតុការណ៍ខាងលើបង្កឲ្យមានការណ៍ភ្ញាក់ផ្អើលកាលពីវេលាម៉ោង៩យប់ថ្ងៃទី២៧ ខែឧសភា ឆ្នាំ២០១៩ ត្រង់ចំណុចស្តុបផ្សារដីហុយ តាមបណ្ដោយផ្លូវហាណូយកែងនិងផ្លូវ១៩៨៦ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
ភាគីខាងយុវជនទាំងបីនាក់ខាងលើរួមមាន ១-ឈ្មោះ ទិត្យ សុភក្រ័ ភេទប្រុស អាយុ២៨ឆ្នាំ ជាកម្មករសំណង់ ២- ឈ្មោះ វ៉ាន់ ចាន់ថា ភេទប្រុស អាយុ២៤ឆ្នាំ ជាកម្មករសំណង់ និង៣-ឈ្មោះ សុខ វិសាល ភេទប្រុស អាយុ២០ឆ្នាំ ជាកម្មករសំណង់ ។ យុវជនទាំង៣នាក់នេះស្នាក់នៅក្នុងភូមិគោកឃ្លាង សង្កាត់គោកឃ្លាង ខណ្ឌសែនសុខ ហើយយុវជនទាំង៣នាក់ជិះម៉ូតូមួយគ្រឿងម៉ាកស៊ុយហ្សុ៊យគីស្មាសរីវ៉ូ ពណ៌ខ្មៅ ពាក់ស្លាកលេខ ភ្នំពេញ ១AQ-៤២៨៧ ។
ចំណែកខាងភាគីខាងប្តីប្រពន្ធទាំង២នាក់ខាងលើ ក្នុងនោះបុរសជាប្តីដែលរងគ្រោះឈ្មោះ ឡយ សុធារិទ្ធ អាយុ៣១ឆ្នាំ ជាមន្ត្រីរាជការ ស្នាក់នៅភូមិរោងចក្រ សង្កាត់គោកឃ្លាង ខណ្ឌសែនសុខ និងប្រពន្ធមិនស្គាល់អត្តសញ្ញាណ។ ប្តីប្រពន្ធទាំង២នាក់ជិះម៉ូតូមួយគ្រឿងម៉ាក ហុងដាវ៉េវ ពណ៌ខ្មៅ ពាក់ស្លាកលេខ កំពង់ចាម ១I-២៤៨៣ ។
តាមប្រភពពីសមត្ថកិច្ចមូលដ្ឋានបានអោយដឹងថា នៅមុនពេលកើតហេតុ គេឃើញប្តីប្រពន្ធ២នាក់ខាងលើជិះម៉ូតូមួយគ្រឿង ធ្វើដំណើរតាមបណ្ដោយហាណូយ ក្នុងទិសដៅពីត្បូងទៅជើង លុះមកដល់ចំណុចផ្លូវរថភ្លើងដែលប្រសព្វជាមួយនឹងផ្លូវហាណូយ ប្តីប្រពន្ធទាំង២នាក់ក៏បានឃើញយុវជនទាំង៣នាក់ខាងលើជិះម៉ូតូមួយគ្រឿងបើកបរក្នុងទិសដៅស្របគ្នា ក្នុងស្ថានភាពស្រវឹង ដោយបើកម៉ូតូរេពេញផ្លូវ ។
តាមប្រភពដដែលបានបន្តថា ពេលនោះបុរសជាប្តីឃើញយុវជនទាំង៣នាក់ខាងលើជិះម៉ូតូរេពេញផ្លូវពេក ខ្លាចក្រែងកើតមានគ្រោះថ្នាក់ចរាចរណ៍ដល់ពួកគេ និងអ្នកដទៃទៀតនោះ ទើបបុរសជាប្តីបានជិះម៉ូតូទៅក្បែរយុវជនទាំង៣នាក់នោះ ហើយក៏ស្រែកប្រាប់ថា «អាអូនអែងស្រវឹងមែន? ជិះម៉ូតូរេខ្លាំងម្ល៉េះ ប្រយ័ត្នជិះចូលឡានណាអាអូន» ។ ភ្លាមៗនោះ ក៏មានយុវវ័យម្នាក់ក្នុងចំណោមគ្នា៣នាក់បានឆ្លើយមកវិញថា «អត់អីទេបង មកពីរវល់ជាប់និយាយទូរស័ព្ទ» បន្ទាប់មកបុរសជាប្តីរួមជាមួយប្រពន្ធក៏បានជិះម៉ូតូដឹកគ្នាបន្តដំណើរទៅមុខទៀតជាធម្មតា។
តាមប្រភពដដែលបន្តទៀតថា លុះប្តីប្រពន្ធទាំង២នាក់ជិះម៉ូតូមកដល់ចំណុចកើតហេតុខាងលើ ក៏ស្រាប់តែយុវជនទាំងបីនាក់ខាងលើជិះម៉ូតូតាមមកពីក្រោយដែរ ហើយថែមទាំងស្រែកដាក់ប្តីប្រពន្ធទាំង២នាក់នោះថា «ហ្អែងចង់យ៉ាងម៉េច?» ពេលនោះបុរសជាប្តីក៏ឈប់ ហើយចុះពីលើម៉ូតូ រួចក៏ត្រូវយុវជនទាំង៣នាក់នោះព្រួតគ្នាវាយ បណ្តាលឲ្យបុរសជាប្តីជ្រុះមួកសុវត្ថិភាព និងបាក់ធ្មេញខាងមុខចំនួនពីរដើម ចំណែកយុវជនម្នាក់ក្នុងចំណោម៣នាក់បានរងរបួសរយះដៃខាងស្ដាំ។ ភ្លាមៗនោះបុរសជាប្តីក៏បានរើសមួកសុវត្ថិភាពរបស់ខ្លួន រួចប្រតាយប្រតប់ទៅលើយុវជនទាំង៣នាក់វិញ បង្កអោយមានការភ្ញាក់ផ្អើលដល់ប្រជាពលរដ្ឋដែលធ្វើដំណើរតាមផ្លូវនាំគ្នាជួយឃាត់ស្ទើរមិនចង់ជាប់។ ក្រោយមកក៏មានសមត្ថកិច្ចមូលដ្ឋានបានចុះមកធ្វើការអន្តរាគមន៍នាំទាំងភាគីខាងយុវជនទាំង៣នាក់ និងភាគីខាងប្តីប្រពន្ធទាំង២នាក់ទៅធ្វើការសាកសួរផងដែរ។
ក្រោយពីសមត្ថកិច្ចធ្វើការសួរនាំ យុវជនទាំង៣នាក់ខាងលើបានឆ្លើយថា ពួកគាត់ពិតជាបានវាយទៅលើបុរសរងគ្រោះខាងលើពិតប្រាកដមែន គឺព្រោះតែខឹងបុរសរងគ្រោះស្រែកជេរថាឲ្យពួកគាត់។ ដោយឡែកបុរសជាប្តីដែលរងគ្រោះបានឆ្លើយថា គាត់មិនបានស្រែកជេរប្រមាថទៅលើយុវជនទាំង៣នាក់ខាងលើនោះទេ គឺគាត់គ្រាន់តែមានបំណងល្អ ព្រោះឃើញស្រវឹងជិះម៉ូតូរេពេញផ្លូវខ្លាំងពេក។
ក្រោយមានការសួរនាំ និងធ្វើការសម្របសម្រួលពីសមត្ថកិច្ចប៉ុស្តិ៍នគរបាលរដ្ឋបាលភ្នំពេញថ្មីរួចមក ទើបភាគីខាងយុវជនទាំង៣នាក់ដឹងកំហុសក៏សុំទោស និងសម្របសម្រួលជាមួយភាគីខាងប្តីប្រពន្ធទាំង២នាក់ដែលរងគ្រោះ ដោយភាគីខាងយុវជនទាំង៣នាក់ចេញសងថ្លៃព្យាបាលរបួសចំនួន២០០ដុល្លារឲ្យទៅភាគីខាងប្តីប្រពន្ធដែលរងគ្រោះ និងធ្វើកិច្ចសន្យាដើម្បីបញ្ចប់រឿង ៕
ចែករំលែកព័តមាននេះ