ខេត្តកំពង់ឆ្នាំង ៖ សេចក្តីរាយការណ៍ឱ្យដឹងថា មនុស្ស២នាក់បានស្លាប់ហេតុការណ៍រន្ទះបាញ់ កើតឡើងកាលពីវេលាម៉ោង០៤ និង៣០នាទីរសៀលថ្ងៃទី២៦ ឧសភា ស្ថិតភូមិចំណុចភូមិខ្សាច់ហាប ឃុំឈើតុំ ស្រុកក្រគរ ខេត្តពោធិ៍សាត់ ខណៈពួកគាត់កំពុងយកក្របីទៅឃ្វាល ។
សេចក្តីរាយការណ៍បន្តថា ជនរងគ្រោះទាំង២នាក់ ម្នាក់ឈ្មោះ ជា សាន្ត អាយុ៦០ឆ្នាំ និងម្នាក់ទៀតឈ្មោះ ជា នៅ អាយុ២២ឆ្នាំ មានទីលំនៅភូមិថ្នល់ ឃុំពេជចង្វា ស្រុកបរិបូរណ៍ ។ ប៉ុន្តែជនរងគ្រោះទាំងពីរនាក់ បានយកក្របីទៅមើលថែនៅឃុំឈើតុំ ស្រុកក្រគរ ខេត្តពោធិ៍សាត់ ។
ប្រភពបន្ត មុនពេលកើតហេតុ ពួកគាត់ទាំងពីរនាក់យកក្របីទៅឃ្វាលនៅចំណុចជិតចំការដំឡូង ជាការដ្ឋានចិន ពេលនោះក៏មានភ្លៀង ផ្គរ និងរន្ទះ មកបាញ់ចំជនរងគ្រោះដែលកំពុងឃ្វាលក្របី បណ្តាលឱ្យស្លាប់យ៉ាងអាណោចអាធ័មបំផុត ។ ជនរងគ្រោះឈ្មោះនៅ ត្រូវបានរន្ទះបាញ់រហែកខោអាវ ស្ទើរសល់តែខ្លួនទទេរដេកផ្កាប់មុខ រីឯបុរសឈ្មោះសាន្ត ឃើញនៅមានខោអាចស្លាប់ដេកផ្កាប់មុខ ។
សមត្ថកិច្ចនៅមូលដ្ឋានកន្លែងកើតហេតុ បានចុះពីនិត្យធ្វើកោសល្យវិច្ច័យបានបញ្ជាក់ថា ជនរងគ្រោះពិតជាស្លាប់ដោយសាររន្ទះបាញ់ពិតប្រាកដមែន រូចបានប្រគល់សពទៅក្រុមគ្រួសារ ដឹកយកមកធ្វើបុណ្យនៅលំនៅដ្ឋាន នៅស្រុកបរិបូរណ៍ ខេត្តកំពង់ឆ្នាំងវិញ ។
ជាការកត់សម្គាល់ បច្ចុប្បន្ននេះ គឺកំពុងប្រឈមខ្លាំងបំផុតចំពោះករណីរន្ទះបាញ់នេះ ព្រោះវាតែងតែបង្កគ្រោះថ្នាក់ទាំងមនុស្ស និងសត្វរហូតបាត់បង់ជីវិតបែបនេះ ។ ដូច្នេះ សូមបងប្អូនទាំងអស់ ត្រូវតែបង្កើនការប្រុងប្រយ័ត្នលើសុវត្ថិភាពខ្លួនឯងឱ្យបានខ្ពស់បំផុត ។ (សម្រួលដោយ៖ ស្រីណា)
ចែករំលែកព័តមាននេះ