សហរដ្ឋអាមេរិក ៖ ក្រោយចុងសប្ដាហ៍ពោរពេញដាយភាពធូរស្បើយក្នុងអារម្មណ៍ តាមរយៈការវាយកូនគោលជាមួយនាយករដ្ឋមន្ត្រីជប៉ុនលោកស៊ីនហ្សូអាបេ និងការទស្សនាការប្រកួតកីឡាបោកចំបាប់ស៊ូម៉ូ ប្រធានាធិបតីអាមេរិកលោកដូណាល់ត្រាំ កាលពីថ្ងៃទី២៧ ឧសភា បង្ហាញនូវភាពគួរឲ្យភ្ញាក់ផ្អើល ដោយលើកពីការគោរពគ្នាដ៏ធំធេងមួយ រវាងសហរដ្ឋអាមេរិកនិងកូរ៉េខាងជើង ហើយសម្រាលវោហាសាសន៍លើអុីរ៉ង់។
ពេលបើកការជួបគ្នាកំពូលជាមួយនាយករដ្ឋមន្ត្រីជប៉ុនលោកត្រាំថ្លែងថា រឿងល្អៗនឹងកើតមានជាមួយកូរ៉េខាងជើង។ យើងបានត្រួសត្រាយផ្លូវជាច្រើន។ ការគោរពគ្នាល្អមួយបានបង្កើតឡើង រហូតដល់ពិតណាស់ជាការគោរពគ្នាដ៏ធំមួយ រវាងសហរដ្ឋអាមេរិកនិងកូរ៉េខាងជើង។ លោកចង់និយាយសំដៅលើការជួបគ្នាកំពូល២លើក ជាមួយមេដឹកនាំកូរ៉េខាងជើងលោកគីមជុងអ៊ុនកាលពីខែមិថុនា២០១៨នៅសិង្ហបុរីបន្ទាប់មកនៅក្រុងហាណូយនាខែកុម្ភៈ ទោះបីការជួបគ្នាចុងក្រោយនោះបានបញ្ចប់ដោយបរាជ័យក្ដី។
ចាប់តាំងពីពេលនោះមក ការចរចាគ្នាស្ដីពីការរំសាយនុយក្លេអ៊ែរត្រូវជាប់គាំង ហើយក្រុងព្យុងយ៉ាងបានធ្វើនាដើមខែឧសភាការសាកល្បងមីសីុលរយៈខ្លីនានា។ ប៉ុន្តែលោកត្រាំបាននិយាយសម្រាលរួចហើយចំពោះសកម្មភាពទាំងនោះ។ លោកថាកូរ៉េខាងជើងគ្រាន់តែបាញ់សាកអាវុធតូចៗប៉ុណ្ណោះ ដែលនាំឲ្យមានការរំខានដល់មនុស្សមួយចំនួនក្នុងប្រទេសខ្ញុំ និងក្នុងប្រទេសឯទៀតៗប៉ុន្តែពុំមែនខ្ញុំឡើយ។
លោកស៊ីនហ្សូអាបេតែងលើកជាទៀងទាត់ពីគ្រោះថ្នាក់សម្រាប់ជប៉ុន ចំពោះបណ្ដាមីសីុលរយៈខ្លីកូរ៉េខាងជើង។ ស្ដីពីបញ្ហាកូរ៉េខាងជើងលោកត្រាំនិងលោកអាបេ គ្រោងលើកមកនិយាយគ្នា នារសៀលថ្ងៃទី២៧ឧសភា ពិសេសពីបញ្ហាជនជាតិជប៉ុនដែលត្រូវចាប់ពង្រត់ទៅកូរ៉េខាងជើង កាលពីទសវត្សឆ្នាំ១៩៧០និង១៩៨០ ក្នុងគោលបំណងបណ្ដុះបណ្ដាល ចារបុរសកូរ៉េខាងជើង តាមរយៈការបង្រៀនពីវប្បធម៌និងភាសាជប៉ុន។
លោកអាបេដែលចាត់ទុករឿងនោះថាសំខាន់ចំពោះនយោបាយក្នុងប្រទេស ធ្លាប់បានស្នើដល់លោកត្រាំ ឲ្យលើកបញ្ហានោះក្នុងការពិភាក្សារបស់លោក ជាមួយលោកគីមជុងអ៊ុន។ លោកអាបេខ្លួនឯងក៏បង្ហាញជាច្រើនលើក ពីបំណងចង់ជួបជាមួយមេដឹកនាំកូរ៉េខាងជើងដែរ។
នៅជប៉ុនលោកត្រាំក៏ប្រកាន់យកឥរិយាបថ បែបបង្រួបបង្រួមមួយចំពោះអុីរ៉ង់ផងដែរ ខណៈទំនាក់ទំនងកំពុងមានភាពតានតឹងរួចហើយ រវាងក្រុងវ៉ាស៊ិនតោននិងក្រុងតេហេរ៉ង់ដែលមានការបំពុលខ្លាំង ចាប់តាំងពីដើមខែនេះមក។ លោកត្រាំថ្លែងថា ខ្ញុំជឿជាក់ដែលអុីរ៉ង់ចង់និយាយគ្នា ហើយបើគេចង់និយាយនោះយើងនឹងនិយាយគ្នា។ យើងនឹងចាំមើលថាតើមានអ្វីកើតមាន ប៉ុន្តែរឿងមួយខ្ញុំមានការប្រាកដក្នុងចិត្តគឺៈ លោកស៊ីនហ្សូអាបេបើតាមសារព័ត៌មានថាគ្រោងធ្វើដំណើរទៅកាន់ប្រទេសនោះ ព្រោះលោកមានទំនាក់ទំនងជិតដិតជាមួយបណ្ដាមេដឹកនាំអុីរ៉ង់។
មុននេះលោកត្រាំក្លាយជាមេដឹកនាំបរទេសដំបូងគេដែលបានជួបគាល់ព្រះចៅអធិរាជថ្មីជប៉ុនណារូហ៊ីតូ៕ (កែសម្រួលដោយ ៖ បុប្ផា)
ចែករំលែកព័តមាននេះ