ខេត្តព្រះសីហនុ ៖ សេចក្តីរាយការណ៍បឋមបានឲ្យដឹងថា កាលពីរសៀលថ្ងៃទី២៦ ខែឧសភា ឆ្នាំ២០១៩ មានការភ្ញាក់ផ្អើលមួយបានកើតឡើង ក្រោយពេលដែលគេបានឃើញម៉ូតូមួយគ្រឿងជិះគ្នា២នាក់ ដឹកសពជនរងគ្រោះមិនស្គាល់អត្តសញ្ញាណម្នាក់យកទៅទម្លាក់ចោលនៅមុខការដ្ឋានសំណង់មួយកន្លែង ហើយជនសង្ស័យទាំង២នាក់នោះគេចខ្លួនបាត់ ។
តាមសេចក្តីរាយការណ៍បានបន្តថា ក្រោយកើតហេតុ សមត្ថកិច្ចមូលដ្ឋានបានចុះទៅដល់កន្លែងកើតហេតុ និងបានរាយការណ៍ជាបន្តបន្ទាប់រហូតមាននគរបាលបច្ចេកទេសចុះទៅពិនិត្យសពជនរងគ្រោះ ដែលត្រូវជនមិនស្គាល់អត្តសញ្ញាណយកទៅទម្លាក់ចោលនៅចំណុចមុខការដ្ឋានសំណង់ ហាវ វិន លក់គ្រឿងសំណង់អន្តរជាតិខេត្តព្រះសីហនុ ស្ថិតក្នុងក្រុមទី១១ ភូមិ១ សង្កាត់លេខ១ ក្រុងព្រះសីហនុ ខេត្តព្រះសីហនុ ។
តាមការសមត្ថកិច្ចរបស់ពិនិត្យបានឱ្យដឹងថា សពជនរងគ្រោះជាបុរស មានអាយុប្រហែល៤០ឆ្នាំ ពាក់អាវយឺតដៃខ្លី ពណ៌ស មានសរសេរអក្សចិនពីមុខ ស្លៀកខោយឺតជើងវែងពណ៌ខ្មៅ សង្ស័យជាអំពើឃាតកម្ម ។
បន្ទាប់ពីនគរបាលពិនិត្យរួច សពជនរងគ្រោះត្រូវបានដឹកយកទៅរក្សាទុកនៅមន្ទីរពេទ្យបង្អែកចំការចេក ដើម្បីធ្វើការស្រាវជ្រាវរកអត្តសញ្ញាណ និងក្រុមគ្រួសារជនរងគ្រោះ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ។ (កែសម្រួលដោយ ៖ ធីតា)
ចែករំលែកព័តមាននេះ