គូឡាឡាំពួរ ៖ យោងតាមសេចក្តី រាយការណ៍របស់ភ្នាក់ងារសារព័ត៌មាន Channel NewsAsia កាលពីថ្ងៃអាទិត្យបានឲ្យដឹងថា ម៉ាឡេស៊ីបានសម្រេចបានភាពជោគជ័យមួយចំនួនក្នុងការកាត់បន្ថយការប្រើប្រាស់ប្លាស្ទិកដែលអាចប្រើបានតែម្តង ជាពិសេសគឺការប្រើប្រាស់ថង់ប្លាស្ទិកតាមផ្សារទំនើបជាដើម។
Penang គឺជារដ្ឋដំបូងក្នុងប្រទេសម៉ាឡេស៊ីដែលចាប់ផ្តើមយុទ្ធនាការមិនប្រើថង់ប្លាស្ទិកនៅផ្សារទំនើបកាលពីឆ្នាំ ២០១១ ហើយរដ្ឋាភិបាលកំពុងតែចង់ហាមឃាត់ការប្រើប្រាស់រាល់ប្លាស្ទិកដែលប្រើបានតែម្តងទៀតផង។
យ៉ាងណាក្តីការប្រើប្រាស់ប្លាស្ទិចទាំងនេះតាមផ្សារ និងតូបលក់អាហារតូចៗនៅតែកើតមានឡើងដដែល។ អាជីវកម្មតូចៗជាទូទៅគាំទ្រការខិតខំថែរក្សាបរិស្ថាន ប៉ុន្តែអ្នកលក់អាហារតាមតូបតូចៗព្រួយបារម្ភពីការចំណាយនៃការមិនប្រើប្រាស់ប្លាស្ទិច។
អ្នកដែលព្រួយបារម្ភពីបរិស្ថានបាននិយាយថា សង្គ្រាមប្រឆាំងនឹងប្លាស្ទិកដែលប្រើប្រាស់បានតែម្តងមិនមានប្រសិទ្ធិភាពឡើយលុះត្រាតែតួអង្គដទៃដូចជាក្រុមហ៊ុនផលិតប្លាស្ទិក និងអតិថិជនចូលរួមដែរ។ ដើម្បីកាត់បន្ថយការប្រើប្រាស់ប្លាស្ទិកទាំងនេះបន្ថែមទៀត រដ្ឋមន្ត្រីក្រសួងថាមពល វិទ្យាសាស្ត្រ បច្ចេកវិទ្យា បរិស្ថាន និងបម្រែ បម្រួលបរិយាកាសគឺអ្នកស្រី Yeo Bee Yin បានចេញគម្រោងសម្រាប់ការបញ្ឈប់ការប្រើប្រាស់ប្លាស្ទិកដែលអាចប្រើបានតែម្តងទាំងស្រុងក្នុងឆ្នាំ ២០៣០។
គម្រោងនេះមានបីដំណាក់កាល។ រវាងឆ្នាំ ២០១៩ ដល់ ២០២១ រដ្ឋាភិបាលនឹងគិតថ្លៃ ០.០៥ដុល្លារលើថង់ប្លាស្ទិចតាមផ្សារទំនើប និងភោជនីយដ្ឋាននានា។ ថវិកាដែលត្រូវបានប្រមូលមកនឹងត្រូវបានប្រគល់ទៅរដ្ឋាភិបាលតាមរដ្ឋនីមួយៗ។ ដំណាក់កាលទីពីរនិងទីបីគឺកំឡុងពីឆ្នាំ ២០២២ ទៅ ២០២៥ និង ២០២៦ ទៅ ២០៣០។
មកដល់ពេលនេះ ប្រសិទ្ធិភាពនៃគោល នយោបាយខាងលើនៅមិនទាន់ច្បាស់នៅឡើយទេ។ អ្នកស្រី Siti Nirbaiyah Nadzmi ដែលជាអគ្គលេខាធិការបស់រដ្ឋមន្ត្រីក្រសួងព័ត៌មានបានប្រាប់ថា “ដោយមានការខិតខំប្រឹងប្រែងផ្សព្វផ្សាយ និងមានគម្រោងជាច្រើនដែលត្រូវបានគាំទ្រដល់ភាគីចូលរួម និងអតិថិជន ពួកយើងសង្ឃឹមថានឹងមានការផ្លាស់ប្តូរវិជ្ជមានរហូតឈានដល់ការឈប់ប្រើប្រាស់ប្លាស្ទិកដែលប្រើបានតែម្តងទាំងស្រុងក្នុងឆ្នាំ ២០៣០”។ (កែសម្រួលដោយ ៖ បុប្ផា)
ចែករំលែកព័តមាននេះ