ថៃស្នើសុំសងសឹក ពុយ វណ្ណៈ ក្រោយខូចជើងទឹកទី៤
- ភ្នំពេញ
ក្រោយពីកីឡាករកម្ពុជា ពុយ វណ្ណៈ វាយផ្ដួលកីឡាករថៃ Phat Numchhuok ឱ្យបោះបង់ការប្រកួតក្នុងទឹកទី៤ កាលពីថ្ងៃទី២៦ ឧសភា ព្រោះតែខូចជើងដំណំ…
ក្រោយពីកីឡាករកម្ពុជា ពុយ វណ្ណៈ វាយផ្ដួលកីឡាករថៃ Phat Numchhuok ឱ្យបោះបង់ការប្រកួតក្នុងទឹកទី៤ កាលពីថ្ងៃទី២៦ ឧសភា ព្រោះតែខូចជើងដំណំ…
ក្រោយពីកីឡាករកម្ពុជា ពុយ វណ្ណៈ វាយផ្ដួលកីឡាករថៃ Phat Numchhuok ឱ្យបោះបង់ការប្រកួតក្នុងទឹកទី៤ កាលពីថ្ងៃទី២៦ ឧសភា ព្រោះតែខូចជើងដំណំ អ្នករៀបចំកម្មវិធីបានអះអាងថា ភាគីខាងថៃ បានស្នើឱ្យលោកធ្វើការផ្គូរផ្គងឱ្យមួយគូនេះ ប៉ះគ្នាម្ដងទៀត ដោយសារតែភាគីថៃយល់ថា ការចាញ់របស់ខ្លួន គឺគ្រាន់តែជារឿងភ្លាត់ស្នៀត។ នេះបើយោងតាមការបញ្ជាក់របស់អ្នករៀបចំព្រឹត្តិការណ៍ដោយផ្ទាល់។
លោក ញាណ សុធី អ្នករៀបចំការប្រកួតប្រចាំនៅទូរទស្សន៍ SEATV បានថ្លែងបញ្ជាក់ថា ការប្រកួតរវាងកីឡាករទាំងពីរខាងលើ គ្រាន់តែជាជំនួបសាកល្បងសមត្ថភាពប៉ុណ្ណោះ ដោយកីឡាករកម្ពុជា ឡើងប្រកួតដើម្បីការការពារកិត្តិយសក្នុងនាមជាកីឡាករមានបទពិសោធន៍ ដែលបាត់មុខយូរ ហើយកីឡាករថៃ ត្រូវការបំផុតគឺដណ្ដើមជ័យជម្នះឱ្យខានតែបានក្នុងនាមជាជើងខ្លាំងម្នាក់កំពុងឡើងកូដនៅក្នុងប្រទេសថៃ។
មួយគូនេះ បើមើលមួយភ្លែត កីឡាករថៃ សមនឹងឈ្នះច្រើនជាង ស្របគ្នាដែលគេក៏វាយចេញត្រូវចំគោលដៅបានច្រើន នៅពេលការប្រកួតបើកប្រកួតភ្លាមៗ។ លោកថា កីឡាករកម្ពុជាទើបតែរកចំណុចខ្សោយកីឡាករថៃឃើញក្រោយបញ្ចប់ទឹកទី១ប៉ុណ្ណោះ ដោយគេចាប់ផ្ដើមទាត់ជើងក្រោមម្ដងហើយម្ដងទៀត ទើបកីឡាករថៃដែលខូចជើងទៅហើយ បោះបង់ការប្រកួតក្នុងទឹកទី៤។
លោកថា ការប្រកួតនៅក្នុងថ្ងៃនោះ ទាំងកីឡាករកម្ពុជា និងថៃ សុទ្ធតែបញ្ចេញសមត្ថភាពបានល្អ ហើយបើកុំតែ ពុយ វណ្ណៈ សំណាងវាយត្រូវចំណុចសំខាន់បណ្ដាលឱ្យកីឡាករថៃត្រូវបាក់ជន្ទល់ម្ដង ក៏ប្រហែលជាមិនអាចរកចំណុចខ្សោយត្រូវ ហើយប្រកួតបានឈ្នះដោយស្រួលបានបែបនេះដែរ ទើបខាងភាគីថៃយល់ថា កូនសិស្សរបស់គេខូចជើងដោយសារភ្លាត់ប្រហែស និងស្នើឱ្យដាក់សងសឹកក្នុងពេលឆាប់ៗ។
លោកថា បានទទួលសំណើរ និងមានគម្រោងដាក់ឱ្យមួយគូនេះឡើងប្រកួតឡើងវិញជាថ្មីទៀតហើយ តែរង់ចាំឱ្យកីឡាករថៃ និង ពុយ ចណ្ណៈ បានត្រៀមខ្លួន និងមានពេលឱ្យគ្រប់គ្រាន់សិន ដើម្បីចង់ដឹងថា បើប៉ះគ្នាម្ដងទៀត តើអ្នកណានឹងឈ្នះ? ៕ (កែសម្រួលដោយ ៖ បុប្ផា)
ចែករំលែកព័តមាននេះ