រាជធានីភ្នំពេញ ៖ ជនសង្ស័យម្នាក់ធ្វើសកម្មភាពលួចកាច់.កម៉ូតូបានសម្រេច ហើយបណ្តើរចេញពីក្នុងឌឿងហែមមិនបានប្រយ័ត្នក៏ត្រូវប្រជាពលរដ្ឋប្រទះឃើញចាប់បានវាយទ្រោមខ្លួនរួចប្រគល់ទៅអោយខាងសមត្ថកិច្ចយកទៅសួរនាំនៅប៉ុស្តិ៍នគរបាលវត្តភ្នំ ហេតុការណ៍នេះបានកើតឡើង កាលពីវេលាម៉ោង២និង១៥នាទីរំលងអធ្រាត្រឈានចូលថ្ងៃទី២៧ ខែឧសភា នេះ តាមបណ្តោយផ្លូវ110 នៅចំណុចក្បែរខារ៉ាអូខេរ៉ូម៉ាតិច ស្ថិតនៅក្នុងសង្កាត់វត្តភ្នំ ខណ្ឌដូនពេញ ។
ជនសង្ស័យមានឈ្មោះយឹម វាស្នារ ភេទប្រុស អាយុ១៩ឆ្នាំ ស្នាក់នៅម្តុំផ្សារចាស់ ខណ្ឌដូន ពេញ ។
សាក្សីដែលឃើញហេតុការណ៍បានអោយដឹងថា មុនពេលកើតហេតុគេបានឃើញម៉ូតូមួយគ្រឿងម៉ាក SCOOPY ពណ៌ពងមាន់ ពាក់ស្លាកលេខភ្នំពេញ1GC-6819 ចតទុកនៅក្នុងឌឿងហែមក្បែរនឹងផ្លូវ19 ខណៈពេលដែលកើតហេតុខាងលើនេះ ក៏ស្រាប់តែលេចមុខជនសង្ស័យម្នាក់មានឈ្មោះដូចខាងលើនេះបានធ្វើសកម្មភាពលួចកាច់.កម៉ូតូបានសម្រេច ហើយបណ្តើរចេញភ្លាមៗនោះដែរក៏មានប្រជាពលរដ្ឋប្រទះឃើញស្រែកថា ចោរៗទើបជនសង្ស័យភ័យស្លន់ស្លោកពេកក៏រត់ទៅដល់ចំណុចកើតហេតុខាងលើ ត្រូវបានប្រជាពលរដ្ឋក្របួចជាប់នាំគ្នាវាយមួយដៃមួយជើង បណ្តាលអោយរងរបួសយ៉ាងដំណំ ហើយនៅកន្លែងកើតហេតុរកឃើញកាំបិតមួយចេញពីក្នុងខ្លួនជនសង្ស័យទៀតផង ។
ក្រោយពេលកើតហេតុជនសង្ស័យខាងលើនេះ ត្រូវបានសមត្ថកិច្ចកសាងសំណុំរឿងបញ្ចូនទៅកាន់តុលាការ ដើម្បីចាត់ការទៅតាមនីតិវិធី ៕ កែសម្រួលដោយ ៖ សុឃាក់
ចែករំលែកព័តមាននេះ