ទីផ្សារអចលនទ្រព្យចិនអាចនឹងផ្អាកវិធានការទប់ស្កាត់ហានិភ័យ
ប្រទេសចិន ៖ ក្រុមហ៊ុន Macquarie Capital Ltd បានប្រាប់ដល់ភ្នាក់ងារសារព័ត៌មាន Asia Times កាលពីថ្ងៃទី…
ប្រទេសចិន ៖ ក្រុមហ៊ុន Macquarie Capital Ltd បានប្រាប់ដល់ភ្នាក់ងារសារព័ត៌មាន Asia Times កាលពីថ្ងៃទី ២០ខែឧសភាកន្លងមកថា ទីផ្សារអចលនទ្រព្យរបស់ប្រទេសចិនអាចនឹងទទួលបានអត្ថប្រយោជន៍ពីភាពមិនប្រាកដប្រជាសេដ្ឋកិច្ចខណៈដែលជួបនឹងសង្គ្រាមពាណិជ្ជកម្មព្រោះប្រទេសចិននឹងផ្អាកការចេញវិធានការរឹតបន្តឹងសម្រាប់វិស័យអចលនទ្រព្យ។
លោក David Ng Ka-chun ដែលជាប្រធានផ្នែកស្រាវជ្រាវអចលនទ្រព្យក្នុងហុងកុងនិងប្រទេសចិននៅ Macquarie បាននិយាយថា “សេដ្ឋកិច្ចប្រទេសចិនកំពុងតែជួបប្រទះនឹងឧបសគ្គកាន់តែច្រើនខណៈដែលធ្លាក់ក្នុងសង្គ្រាមពាណិជ្ជកម្មជាមួយនឹងសហរដ្ឋអាមេរិក។ ទីផ្សារអចលនទ្រព្យមិនមានឱកាសច្រើនក្នុងការមើលឃើញវិធានការរឹតបន្តឹងក្នុងឆ្នាំនេះទេ”។ លោកបានបន្តថា “តាំងពីខែតុលាមុនមក ពួកយើងមើលឃើញតម្លៃអចលនទ្រព្យកើនឡើង ៥%ក្នុងទីក្រុងធំៗ និងទីក្រុងបន្ទាប់បន្សំទីពីរក្នុងប្រទេសចិន… តម្លៃផ្ទះដែលទើបតែសាងសង់រួចក្នុងប្រទេសចិនអាចនឹងបន្តកើនឡើងបន្ថែមទៀតក្នុងឆមាសទី២នាឆ្នាំនេះ”។
យោងទៅតាមការិយាល័យស្ថិតិជាតិរបស់ប្រទេសចិនបានឲ្យដឹងថា តម្លៃផ្ទះដែលទើបតែសាងសង់រួចក្នុងប្រទេសចិនកើនឡើងបាន០.៥%ជារៀងរាល់ខែក្នុងទីក្រុងបេកាំង ០.៣%ក្នុងទីក្រុងសៀងហៃ ១.១% ក្នុងទីក្រុង Guangzhou និង ០.៤% ក្នុង Shenzen កាលពីខែមេសា។ អត្រាលូតលាស់ប្រចាំឆ្នាំវិញស្មើ ៣.៥% ក្នុងទីក្រុងបេកាំង, ១.៥% ក្នុងទីក្រុងសៀងហៃ, ១៣.៣% ក្នុងទីក្រុង Guangzhou និង ០.៧% ក្នុង Shenzen។
ប៉ុន្តែការតានតឹងឡើងនៃសង្គ្រាមពាណិជ្ជកម្មរវាងសហរដ្ឋអាមេរិកនិងប្រទេសចិនអាចនឹងជួយដល់ទីផ្សារអចលនទ្រព្យក្នុងប្រទេសចិន។
លោក Larry Hu ដែលជាប្រធានផ្នែកផលិតផលសេដ្ឋកិច្ចនិងទីផ្សារនៅ Macquarie បាននិយាយថា ក្រៅពីគោលនយោបាយហិរញ្ញវត្ថុនិងរូបិយវត្ថុទូទៅហើយ តំណាងរាស្ត្រក្នុងប្រទេសចិនអាចងាកទៅវិធានការដទៃដូចជាបន្ធូរការរឹបន្តឹងលើហិរញ្ញវត្ថុរដ្ឋាភិបាលក្នុងតំបន់ និងគោលនយោបាយអចលនទ្រព្យជាដើម។ លោក Ng បានបន្ថែមទៀតថា បើទោះជាទីក្រុងផ្សេងៗមានគោលនយោបាយខុសៗគ្នាពិតមែនក្តី និន្នការរួមគឺងាកទៅកាន់ការបន្ធូការរឹតបន្តឹងច្រើនជាង។ កែសម្រួលដោយ៖ សុឃាក់
