រាជធានីភ្នំពេញ ៖ ធនាគារអភិវឌ្ឍន៍អាស៊ី ហៅកាត់ថា ADB បានអនុម័តឥណទានសម្បទានចំនួន៧,៦៤លានដុល្លារអាមេរិក ដើម្បីគាំទ្រដល់ការសាងសង់ឧទ្យានថាមពលពន្លឺព្រះអាទិត្យដែលមានកម្លាំង១០០មេហ្កាវ៉ាត់ នៅកម្ពុជា ដែលគម្រោងនេះនឹងជួយកម្ពុជា អភិវឌ្ឍន៍ធនធានថាមពលកកើតឡើងវិញ ធ្វើពិពិធកម្មថាមពលនិងពង្រឹងការប្រកួតប្រជែងនៃសេដ្ឋកិច្ច ។
ក្នុងកញ្ចប់ហិរញ្ញប្បទានសម្រាប់គម្រោងឧទ្យានជាតិថាមពលពន្លឺព្រះអាទិត្យនេះ ក៏មានឥណទានសម្បទានចំនួន១១លានដុល្លារ និង៣លានដុល្លារជាហិរញ្ញប្បទានឥតសំណងផងដែរ ។ ហិរញ្ញប្បទានឥតសំណងនេះ ទទួលបានពីមូលនិធិអាកាសធាតុយុទ្ធសាស្ត្រ តាមរយៈកម្មវិធីពង្រីកថាមពលកកើតឡើងវិញ ។ បន្ថែមពីនេះទៀត ក៏មានហិរញ្ញប្បទានឥតសំណងសម្រាប់ជំនួយបច្ចេកទេសចំនួន៥០ម៉ឺនដុល្លារ ដែលផ្ដល់ដោយមូលនិធិអ៊ីអេស៊ា និងភាពជាដៃគូរចំណេះដឹង នៃសាធារណៈរដ្ឋកូរ៉េ ដើម្បីគាំទ្រដល់ការអភិវឌ្ឍសមត្ថភាពរបស់អគ្គិសនីកម្ពុជា និងអាជ្ញាធរអគ្គិសនីកម្ពុជា ដែលជានិយ័តករអគ្គិសនីជាតិ អំពីបច្ចេកវិទ្យាបម្លែងពន្លឺទៅជាថាមពលអគ្គិសនិ និងការរៀបចំផែនការឧទ្យានថាមពលពន្លឺព្រះអាទិត្យ ។ នេះបើយោងតាមសេចក្តីប្រកាសព័ត៌មានរបស់ ADB ចុះផ្សាយថ្ងៃទី ២៤ ខែឧសភា ម្សិលមិញនេះ។
លោក ប្រាឌីប ថារ៉ាកាន (Pradeep Tharakan) ប្រធានក្រុមអ្នកឯកទេសខាងផ្នែកការបម្រែបម្រួលអាកាសធាតុប្រចាំធនាគារអភិវឌ្ឍន៍អាស៊ី បានអោយដឹងថា ការមានប្រភពថាមពលដែលគួរឱ្យជឿជាក់បាន មាននិរន្តរភាព និងតម្លៃសមរម្យ មានសារៈសំខាន់ខ្លាំងណាស់សម្រាប់ការអភិវឌ្ឍសេដ្ឋកិច្ចរបស់ប្រទេសដែលកំពុងមានការរីកចម្រើនយ៉ាងឆាប់រហ័ស ដូចជាកម្ពុជា ។ ជំនួយរបស់ ADB និងមិនគ្រាន់តែជួយធ្វើពិពិធកម្មប្រភពថាមពលរបស់កម្ពុជា តាមរយៈការអភិវឌ្ឍថាមពលពន្លឺព្រះអាទិត្យប៉ុណ្ណោះទេ វាក៏នឹងជួយឱ្យកម្ពុជា សម្រេចបាននូវគោលដៅកាត់បន្ថយឧស្ម័នផ្ទះកញ្ចក់របស់ខ្លួន យោងតាមកិច្ចព្រមព្រៀង ស្ដីពីអាកាសធាតុនៅទីក្រុងប៉ារីសផងដែរ ។
គួរបញ្ជាក់ថា គម្រោងឧទ្យានជាតិថាមពលពន្លឺព្រះអាទិត្យនឹងជួយអគ្គិសនីកម្ពុជា ដែលជាសេវាផ្គត់ផ្គង់អគ្គិសនីជាតិរបស់កម្ពុជា អាចសាងសង់ឧទ្យានជាតិថាមពលពន្លឺព្រះអាទិត្យដែលមានកម្លាំង១០០មេហ្កាវ៉ាត់ ព្រមទាំងហេដ្ឋារចនាសម្ព័ន្ធពាក់ព័ន្ធដទៃទៀតរួមមាន ផ្លូវចេញចូលរបង និងប្រព័ន្ធបង្ហូរទឹក ក្នុងខេត្តកំពង់ឆ្នាំង ។
គម្រោងនេះដែរ ក៏នឹងកសាងប្រព័ន្ធបញ្ជូនអគ្គិសនី ដែលតភ្ជាប់ទៅនឹងបណ្ដាញចែកចាយចម្បងនៅក្បែររាជធានីភ្នំពេញ ដែលនឹងអនុញ្ញាតឱ្យគម្រោងនេះ អាចផ្គត់ផ្គង់ថាមពលទៅបណ្ដាញចែកចាយជាតិបានផងដែរ ។ ការផ្ដល់ឥណទានដល់កម្ពុជាក្នុងការអភិវឌ្ឍថាមពលអគ្គិសនីនេះ ត្រូវបានគេមើលឃើញថាស្របពេលកម្ពុជាកំពុងជួបប្រទះបញ្ហាកង្វះខាតថាមពលអគ្គិសនីប្រើប្រាស់ប្រចាំថ្ងៃ ជាក់ស្ដែងចរន្តអគ្គិសនី ត្រូវបានផ្ដាច់ស្ទើរតែរាល់ថ្ងៃ កាលពីមុនប៉ុន្មានថ្ងៃមុននេះ ដោយសារតែតម្រូវការកើនឡើងជាងការរំពឹងទុក ៕ កែសម្រួលដោយ ៖ សុឃាក់
ចែករំលែកព័តមាននេះ