រាជធានីភ្នំពេញ ៖ គម្រោងអគារខុនដូ និងអគារពាណិជ្ជកម្មថ្មីមួយ បានលេចរូបរាងឡើង នៅតំបន់ទួលសង្កែខណ្ឌឬស្សីកែវ ភាគខាងជើងរាជធានីភ្នំពេញ ហើយនឹងជំរុញអោយវិស័យអចលនទ្រព្យ ជាពិសេសសក្ដានុពលវិនិយោគអចលនទ្រព្យនៅតំបន់នោះផ្ទាល់តែម្ដង ។ យ៉ាងណាមិញ អ្នកជំនាញអចលទ្រព្យក៏បានបញ្ជាក់ឲ្យដឹងផងដែរថាបញ្ហាប្រឈមធំបំផុត សម្រាប់អ្នករស់នៅក្នុងខុនដូ ឬអាផាត់មិន គឺពិបាកក្នុងការរកចំណតយានយន្ត ដូច្នេះតាមរយៈបទពិសោធន៍នេះ គឺអ្នកអភិវឌ្ឍន៍ខុនដូ និងអាផាត់មិន គួរពិចារណាឲ្យបានដិតដល់ថាត្រូវរក្សាចំណតអោយធំៗកម្រិតណាសម្រាប់ផ្តល់ជូនអតិថិជនដែលរស់នៅក្នុងខុនដូ ឬអាផាត់មិនរបស់ខ្លួន កាន់តែមានភាពងាយស្រួលនិងអាចទាក់ទាយចំណង់ចិត្តរបស់អតិថិជន ។
បើតាម លោក ចាន់ តៃអាន ម្ចាស់គម្រោងមជ្ឈមណ្ឌលពាណិជ្ជកម្ម ្រថាយ អុឹមស្ថិតនៅតំបន់ទួលសង្កែ ខណ្ឌឬស្សីកែវ បានឲ្យដឹថា ការមកបណ្ដាក់ទុនវិនិយោគគម្រោងដ៏ធំដែលមានទឹកប្រាក់ប្រមាណ ៧ពាន់លានយន់ឬ ប្រមាណជាង១ពាន់លានដុល្លារអាមេរិក មិនមែនជាការចៃដន្យទេ គឺភាគីវិនិយោគិនចិន បានសិក្សាស្វែងយល់យ៉ាងច្បាស់ពីសក្ដានុពលវិនិយោគ នៅក្នុងប្រទេសកម្ពុជា ជាពិសេសទំនាក់កាទូតរវាងកម្ពុជា និងចិន ក៏កាន់តែស្អិតរមួតឡើងពីមួយឆ្នាំមួយទៅមួយ ដែលជាហេតុធ្វើអោយពួកយើងជាវិនិយោគិនមកពីប្រទេសចិន មានជំនឿទុកចិត្ត ហ៊ានបោះទុនរាប់ពាន់លានដុល្លារលើវិស័យនេះ ។
លោកបន្តថា «ការបង្កើតអគារខុនដូ និងពាណិជ្ជកម្មដ៏ធំនេះ នៅតំបន់ទួលសង្កែនឹងជំរុញសក្ដានុពលបន្ថែមទៀត ទៅវិស័យអចលនទ្រព្យ និងអាចទាក់ទាញវិនិយោគិននានា ចាប់អារម្មណ៍វិនិយោគក្នុងវិស័យ អចលនទ្រព្យនៅក្នុងតំបន់នេះផ្ទាល់» ។ លោកបន្តទៀតថា «នៅពេលឆាប់ៗខាងមុខនេះ អគារដ៏ធំនេះនឹងត្រូវសង់រួចរាល់ ហើយពេលនោះ វានឹងបង្ហាញអោយកាន់តែច្បាស់ពីភាពទាក់ទាញវិនិយោគិនផ្សេងៗ ងាកមកចាប់អារម្មណ៍នៅតំបន់ទួលសង្កែ» ។
បើតាមអ្នកជំនាញអចលនទ្រព្យមួយរូប លោក ហេរ៉ូ សុជាតិ បានអោយដឹងថា នៅពេលដែលមានគម្រោងធំណាមួយចាប់ផ្ដើមប្រកាសសាងសង់ វាបានធ្វើអោយតម្លៃអចលនទ្រព្យនៅតំបន់នោះស្ទុះងើបម្ដងរួចទៅហើយ ហើយនៅពេលដែលចាប់ផ្ដើមសាងសង់តម្លៃអលនទ្រព្យនឹងស្ទុះងើបម្ដងទៀត ដោយឡែកនៅតំបន់ទួលសង្កែនេះ យើងអាចចាត់ទុកថា គម្រោង អគារខុនដូ និងពាណិជ្ជកម្ម ្រថាយ អុឹម គឺជាគម្រោងធំជាងគេមួយ ដែលទាញអោយមានការវិនិយោគបន្តបន្ទាប់ទៀតនៅពេលអនាគត ។
លោកពីង សេរី នាយកប្រតិបត្តិក្រុមហ៊ុន អចលនទ្រព្យ Angkor Real Estate បានលើកឡើងថា តម្រូវការខុនដូ និងអាផាត់មិន នៅកម្ពុជា រយៈពេល៥ឆ្នាំខាងមុខ នឹងមានកំណើនខ្ពស់ ដូច្នេះវិនិយោគិនគួរតែផ្គត់ផ្គង់តម្រូវការចាប់ពីពេលនេះតទៅ តែអ្នកអភិវឌ្ឍន៍ក៏គួរតែគិតគូរអោយច្បាស់លាស់ផងពីបរិបទសាងសង់ខុនដូ និងអាផាត់មិន។
លោកពន្យល់ថា «បញ្ហាប្រឈមសម្រាប់អ្នករស់នៅក្នុងខុនដូ ឬអាផាត់មិន គឺពិបាកក្នុងការរកចំណតយានយន្ត ហើយនេះជាបទពិសោធន៍សម្រាប់អ្នកអភិវឌ្ឍន៍ខុនដូ និងអាផាត់មិន ដែលត្រូវរក្សាចំណតអោយធំៗ សម្រាប់អតិថិជនដែលរស់នៅក្នុងខុនដូ ឬអាផាត់មិនរបស់ខ្លួន » ។ លោកបន្តថា សក្ដានុពលសម្រាប់អភិវឌ្ឍន៍ខុនដូ និងអាផាត់មិន នៅក្នុងប្រទេសកម្ពុជា គឺនៅតែមានភាពទូលាយនៅឡើយ ពីព្រោះរយៈពេលខាងមុខ ប្រជាពលរដ្ឋកម្ពុជាកាន់តែច្រើនឡើយនឹងងាកមករស់នៅក្នុងខុនដូ ជាក់ស្ដែងនៅប្រទេសថៃក៏មិនខុសពីកម្ពុជាពេលនេះដែរ កាលពីមុនពលរដ្ឋថៃ ចូលចិត្តរស់នៅ ផ្ទះជាប់ដី តែក្រោយមកពួកគេក៏បានផ្លាស់ប្តូរមករស់នៅក្នុងអគារសហកម្មសិទ្ធិវិញម្ដង ។
លោក ច្រឹក សុខនីម ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា ក៏បានមានប្រសាសន៍ផងដែរថា ការវិនិយោគវិស័យអចលនទ្រព្យនឹងនៅតែមានភាពល្អប្រសើរឡើងនៅក្នុងរយៈពេល៥ឆ្នាំទៅមុខទៀត ដោយសារតែស្ថានភាពសេដ្ឋកិច្ចកម្ពុជា ត្រូវការស្ថាប័នធំៗ ព្យាករណ៍ថានឹងល្អប្រសើរ ជាក់ស្ដែងក្នុងឆ្នាំ២០១៩នេះ កំណើនសេដ្ឋកិច្ចកម្ពុជា ត្រូវបានគេព្យាករណ៍ថានឹងមានកំណើនរង្វង់៧ភាគរយ ពោលគឺនៅមានភាពរឹងមាំដដែល ។ តាមរបាយការណ៍របស់ក្រសួងរៀបចំដែនដីនគរូបនីយកម្មនិងសំណង់បានបញ្ជាក់ថា ក្នុងរយៈពេល៤ខែដើមឆ្នាំ ២០១៩នេះទុនវិនិយោគក្នុងវិស័យសំណង់នៅកម្ពុជាមានប្រមាណ ២.៧៤២លានដុល្លារអាមេរិកកើនឡើង៦៧ភាគរយបើធៀបនឹងរយៈពេលដូចគ្នាក្នុងឆ្នាំ ២០១៨ ៕ កែសម្រួលដោយ ៖ សុឃាក់
ចែករំលែកព័តមាននេះ