ប្រទេសអុីរ៉ង់ ៖ រដ្ឋមន្ត្រីការបរទេស អុីរ៉ង់ លោកMOHAMMAD JAWAD ZARIFកាលពីថ្ងៃទី២៥ឧសភា បានបរិហារ ការបញ្ជូនទាហានបន្ថែមរបស់អាមេរិកមកកាន់តំបន់មជ្ឈឹមបូព៌ាថា ជាការគំរាមកំហែងមួយចំពោះសន្តិភាពអន្តរជាតិ ក្នុងពេលដែលកំពុងមានភាពតានតឹងខ្លាំងរវាងប្រទេសជាសត្រូវនឹងគ្នាទាំង២នោះ។
សហរដ្ឋអាមេរិកប្រកាសកាលពីថ្ងៃទី២៤ឧសភា ពីការដាក់ពង្រាយទាហាន១៥០០នាក់បន្ថែមទៀតនៅមជ្ឈឹមបូព៌ា ដោយលើកពីការគំរាមកំហែងដែលនៅតែមាន ប្រឆាំងកងទ័ពអាមេរិក ចេញពីបណ្ដាមេដឹកនាំនៃរដ្ឋាភិបាល អុីរ៉ង់ ។ នៅសេតវិមានប្រធានាធិបតីអាមេរិក លោកដូណាល់ត្រាំថ្លែងថា យើងនឹងបញ្ជូនទាហានក្នុងចំនួនមិនច្រើនមួយទៅកាន់មជ្ឈឹមបូព៌ានាពេលនេះ។ នោះជាទាហានប្រមាណជា១៥០០នាក់។ លោកអះអាងបែបនេះមុនពេលចេញដំណើរទៅកាន់ប្រទេសជប៉ុន។
រដ្ឋមន្ត្រីការបរទេស អុីរ៉ង់ មានប្រតិកម្មថា ការបង្កើនវត្តមានយោធាអាមេរិកក្នុងតំបន់យើងនេះ មានគ្រោះថ្នាក់ខ្លាំងណាស់ ហើយជាការគំរាមកំហែងមួយចំពោះសន្តិសុខអន្តរជាតិ ដែលគេត្រូវធ្វើការប្រឈមមុខ។
ប្រមុខមន្ទីរប៉ង់តាហ្គោនលោកPATRICK SHANAHAN ក្នុងសេចក្ដីប្រកាសមួយគូសបញ្ជាក់ថា ការបន្ថែមទ័ពអាមេរិកនេះគឺសំដៅកែលម្អដល់កិច្ចការពារនិងសន្តិសុខរបស់កងទ័ពអាមេរិក ដោយគិតទៅដល់ការគំរាមកំហែងជាប់ពីសំណាក់ អុីរ៉ង់ ក្នុងនោះមានកងឆ្មាំបដិវត្តន៍ អុីរ៉ង់ ។ នោះជាចម្លើយតបដោយមានការប្រុងប្រយ័ត្ន ចំពោះការគំរាមកំហែងគួរឲ្យជឿជាក់ពីសំណាក់ អុីរ៉ង់ ៕ (កែសម្រួលដោយ ៖ បុប្ផា)
ចែករំលែកព័តមាននេះ